1 Сїѧ҄ словеса̀ кни́ги, ю҆́же написа̀ варѹ́хъ сы́нъ нирі́инъ, сы́на маасе́ева, сы́на седекі́ина, сы́на а҆саде́ева, сы́на хелкі́ина въ вавѷлѡ́нѣ,
2 въ пѧ́тое лѣ́то, въ седмы́й де́нь мц҇а, во вре́мѧ, въ не́же взѧ́ша халде́є ї҆ер҇ли́мъ и҆ пожго́ша є҆го̀ ѻ҆гне́мъ.
3 И҆ прочтѐ варѹ́хъ словеса̀ кни́ги сеѧ̀ во ѹ҆́шы ї҆ехоні́и сы́на ї҆ѡакі́ма царѧ̀ ї҆ѹ́дина и҆ во ѹ҆́шы всѣ́хъ люді́й приходѧ́щихъ ко кни́зѣ,
4 и҆ во ѹ҆́шы си́льныхъ и҆ сынѡ́въ ца́рскихъ и҆ во ѹ҆́шы старѣ́йшинъ, и҆ во ѹ҆́шы всѣ́хъ люді́й ѿ ма́ла и҆ до вели́ка и҆́хъ, всѣ́хъ живѹ́щихъ въ вавѷлѡ́нѣ при рѣцѣ̀ сѹ́дъ.
5 И҆ пла́кахѹсѧ, и҆ постѧ́хѹсѧ, и҆ молѧ́хѹсѧ моли́твами пред̾ гд҇емъ,
6 и҆ собра́ша сребро̀, ѩ҆́коже когѡ́ждо можа́ше рѹка̀,
7 и҆ посла́ша во ї҆ер҇ли́мъ ко ї҆ѡакі́мѹ жерцѹ̀ вели́комѹ, сы́нѹ хелкі́инѹ сы́на салѡ́млѧ и҆ ко жерцє́мъ и҆ ко всѣ҄мъ лю́демъ, и҆̀же ѡ҆брѣто́шасѧ съ ни́мъ во ї҆ер҇ли́мѣ,
8 внегда̀ взѧ̀ сосѹ́ды хра́ма гд҇нѧ и҆знесє́ныѧ ѿ хра́ма возврати́ти на зе́млю ї҆ѹ́динѹ, въ десѧ́тый де́нь мц҇а сива́нъ, сосѹ́ды срє́брѧны, ѩ҆̀же сотворѝ седекі́а сы́нъ ї҆ѡсі́инъ ца́рь ї҆ѹ́динъ,
9 повнегда̀ преселѝ навѹходоно́соръ ца́рь вавѷлѡ́нскїй ї҆ехоні́ю и҆ кнѧ҄зи, и҆ ѹ҆́зники и҆ си҄льныѧ и҆ лю́ди землѝ ѿ ї҆ер҇ли́ма, и҆ введѐ ѧ҆̀ (свѧ҄заны) въ вавѷлѡ́нъ.
10 И҆ реко́ша: сѐ, посла́хомъ къ ва́мъ сребро̀, да кѹ́пите на сребрѣ̀ всесожжє́нїѧ за грѣ́хъ и҆ ѳѷмїа́мъ, и҆ сотвори́те же́ртвѹ и҆ вознеси́те на же́ртвенникъ гд҇а бг҃а на́шегѡ,
11 и҆ моли́тесѧ за житїѐ навѹходоно́сора царѧ̀ вавѷлѡ́нскагѡ и҆ за житїѐ валтаса́ра сы́на є҆гѡ̀, да бѹ́дѹтъ дні́е и҆́хъ, ѩ҆́коже дні́е небе́снїи, на землѝ.
12 И҆ да да́стъ гд҇ь крѣ́пость на́мъ и҆ да просвѣти́тъ ѻ҆́чи на́ши, и҆ да живе́мъ под̾ сѣ́нїю навѹходоно́сора царѧ̀ вавѷлѡ́нска и҆ под̾ сѣ́нїю валтаса́ра сы́на є҆гѡ̀, да рабо́таемъ и҆̀мъ дни҄ мнѡ́ги и҆ ѡ҆брѧ́щемъ благода́ть пред̾ ни́ми.
13 И҆ моли́тесѧ за на́съ ко гд҇еви бг҃ѹ на́шемѹ, ѩ҆́кѡ согрѣши́хомъ гд҇еви бг҃ѹ на́шемѹ, и҆ не ѿврати́сѧ ѩ҆́рость гд҇нѧ и҆ гнѣ́въ є҆гѡ̀ ѿ на́съ до сегѡ̀ днѐ.
14 И҆ прочти́те кни́гѹ сїю̀, ю҆́же посла́хомъ къ ва́мъ, и҆сповѣ́дати въ домѹ̀ гд҇ни въ де́нь пра́здника, во дни҄ годовы҄ѧ,
15 и҆ да рече́те: гд҇ѹ бг҃ѹ на́шемѹ пра́вда, а҆ на́мъ стыдѣ́нїе ли́цъ, ѩ҆́коже де́нь се́й, человѣ́кѹ ї҆ѹ́динѹ и҆ живѹ́щымъ во ї҆ер҇ли́мѣ,
16 и҆ царє́мъ на́шымъ и҆ кнѧзє́мъ на́шымъ, и҆ жерцє́мъ на́шымъ и҆ проро́кѡмъ на́шымъ и҆ ѻ҆тцє́мъ на́шымъ:
17 поне́же согрѣши́хомъ пред̾ гд҇емъ
18 и҆ не покори́хомсѧ є҆мѹ̀ и҆ не послѹ́шахомъ гла́са гд҇а бг҃а на́шегѡ ходи́ти въ повелѣ́нїихъ є҆гѡ̀, ѩ҆̀же дадѐ пред̾ лице́мъ на́шимъ.
19 Ѿ днѐ, въ ѻ҆́ньже и҆зведѐ гд҇ь ѻ҆тцы̀ на́шѧ ѿ землѝ є҆гѵ́петски, и҆ до сегѡ̀ днѐ бѣ́хомъ не покарѧ́ющесѧ гд҇еви бг҃ѹ на́шемѹ и҆ ѿмета́хомсѧ, є҆́же не послѹ́шати гла́са є҆гѡ̀.
20 И҆ прильпѐ къ на́мъ ѕло̀ и҆ клѧ́тва, ю҆́же сочинѝ гд҇ь мѡѷсе́ю ѻ҆́трокѹ своемѹ̀ въ де́нь, въ ѻ҆́ньже и҆зведѐ гд҇ь ѻ҆тцы̀ на́шѧ ѿ землѝ є҆гѵ́петскїѧ, да́ти на́мъ зе́млю кипѧ́щѹю млеко́мъ и҆ ме́домъ, ѩ҆́коже де́нь се́й.
21 И҆ не послѹ́шахомъ гла́са гд҇а бг҃а на́шегѡ по всѣ҄мъ словесє́мъ про҇ро́чєскимъ, ѩ҆̀же посла̀ къ на́мъ,
22 и҆ хожда́хомъ кі́йждо на́съ по ра́зѹмѹ се́рдца своегѡ̀ ѕла́гѡ рабо́тати богѡ́мъ и҆нѣ҄мъ, твори́ти ѕла҄ѧ пред̾ ѻ҆чи́ма гд҇а бг҃а на́шегѡ.
Нашли в тексте ошибку? Выделите её и нажмите: Ctrl + Enter

Книга Варуха, 1 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.