1 Кни́га слове́съ тѡві́та, сы́на тѡвїи́лева, сы́на а҆нанїи́лева, сы́на а҆дѹи́лева, сы́на гаваи́лева, ѿ сѣ́мене а҆сїи́лева, ѿ пле́мене нефѳалі́млѧ,
2 и҆́же плѣне́нъ бѣ̀ во дни҄ є҆немесса́ра са́ра царѧ̀ а҆ссѷрі́йска ѿ ѳі́свы, ѩ҆́же є҆́сть ѡ҆деснѹ́ю кѷді́а нефѳалі́млѧ въ галїле́и вы́ше а҆си́ра. А҆́зъ тѡві́тъ пѹте́мъ и҆́стины ходи́хъ и҆ пра́вды всѧ҄ дни҄ живота̀ моегѡ̀
3 и҆ ми́лѡстыни мнѡ́ги твори́хъ бра́тїи мое́й и҆ ѩ҆зыкѹ моемѹ̀, ше́дшымъ со мно́ю во странѹ̀ а҆ссѷрі́йскѹю въ нїнеѵі́ю:
4 и҆ є҆гда̀ бѣ́хъ во странѣ̀ мое́й въ землѝ ї҄и҃левѣ, ю҆нѣ́и҆шѹ мѝ сѹ́щѹ, все́ пле́мѧ нефѳалі́ма ѻ҆тца̀ моегѡ̀ ѿстѹпѝ ѿ до́мѹ ї҄ер҇ли́млѧ, и҆збра́ннагѡ ѿ колѣ́нъ ї҆и҃левыхъ, є҆́же жре́ти всѣ҄мъ колѣ́нѡмъ: и҆ ѡ҆свѧще́нъ бы́сть хра́мъ ѡ҆бита́нїѧ вы́шнемѹ и҆ созда́нъ бы́сть во всѧ҄ ро́ды вѣ́ка:
5 и҆ всѧ҄ колѣ҄на кѹ́пнѡ ѿстѹпи҄вшаѧ жрѧ́хѹ ваа́ловѣ ю҆́ницѣ, и҆ до́мъ нефѳалі́ма ѻ҆тца̀ моегѡ̀:
6 а҆́зъ же є҆ди́нъ хожда́хъ мно́гажды во ї҆ер҇ли́мъ въ пра́здники, ѩ҆́коже пи́сано є҆́сть всемѹ̀ ї҆и҃лю въ повелѣ́нїи вѣ́чнѣ, нача́тки и҆ десѧти҄ны плодѡ́въ и҆ первострижє́нїѧ и҆мѣ́ѧй,
7 и҆ даѧ́хъ ѧ҆̀ ї҄ере́ємъ сынѡ́мъ а҆арѡ҄нимъ ко ѻ҆лтарю̀: ѿ всѣ́хъ плодѡ́въ десѧти́нѹ даѧ́хъ сынѡ́мъ леѵї҄инымъ слѹжа́щымъ во ї҄ер҇ли́мѣ, и҆ вторѹ́ю десѧти́нѹ продаѧ́хъ, и҆ хожда́хъ и҆ и҆ждива́хъ ѧ҆̀ во ї҄ер҇ли́мѣ на ко́еждо лѣ́то,
8 тре́тїю же даѧ́хъ, и҆́мже подоба́ше, ѩ҆́коже заповѣ́да деввѡ́ра ма́ти ѻ҆тца̀ моегѡ̀,занѐ си́ръ ѡ҆ста́хъ ѿ ѻ҆тца̀ моегѡ̀.
9 И҆ є҆гда̀ бы́хъ мѹ́жъ, поѧ́хъ а҆́ннѹ женѹ̀ ѿ сѣ́мене ѻ҆те́чества на́шегѡ, и҆ роди́хъ ѿ неѧ̀ тѡві́ю.
10 И҆ є҆гда̀ плѣне́ни бы́хомъ въ нїнеѵі́ю, всѧ҄ кра́тїѧ моѧ҄ и҆ и҆̀же ѿ ро́да моегѡ̀ ѩ҆до́ша ѿ хлѣ́бѡвъ ѩ҆зы́ческихъ:
11 а҆́зъ же соблюдо́хъ дѹ́шѹ мою̀ є҆́же не ѩ҆́сти,
12 ѩ҆́кѡ па́мѧтствовахъ бг҃а все́ю дѹше́ю мое́ю.
13 И҆ дадѐ вы́шнїй благода́ть и҆ добро́тѹ пред̾ є҆немесса́ромъ, и҆ бы́хъ є҆гѡ̀ кѹпе́цъ:
14 и҆ и҆до́хъ въ миді́ю и҆ вда́хъ гаваи́лѹ бра́тѹ гаврі́евѹ въ ра́гахъ миді́йскихъ сребра̀ де́сѧть тала҄нтъ.
15 И҆ є҆гда̀ ѹ҆́мре є҆немесса́ръ, воцари́сѧ сеннахирі́мъ сы́нъ є҆гѡ̀ вмѣ́стѡ є҆гѡ̀, и҆ пѹтїѐ є҆гѡ̀ непостоѧ́нни бы́ша, и҆ ктомѹ̀ не возмого́хъ и҆тѝ въ миді́ю.
16 И҆ во дне́хъ є҆немесса́ра ми́лѡстыни мнѡ́ги твори́хъ бра́тїи мое́й:
17 хлѣ́бы моѧ҄ даѧ́хъ а҆́лчѹщымъ и҆ ѡ҆дѣѧ́нїе наги҄мъ, и҆ а҆́ще ко́его ѿ ро́да моегѡ̀ ви́дѣхъ ѹ҆ме́рша и҆ и҆зве́ржена внѣ̀ стѣны̀ нїеѵі́и, погрба́хъ є҆го̀:
18 и҆ а҆́ще ко́его ѹ҆бива́ше сеннахирі́мъ ца́рь, є҆гда̀ прїи́де бѣжа́й ѿ ї҆ѹде́и, погреба́хъ и҆̀хъ ѡ҆́тай: мно́гихъ бо ѹ҆бѝ въ ѩ҆́рости свое́й: и҆ и҆скѡ́ма быва́хѹ ѿ царѧ̀ тѣлеса̀, и҆ не ѡ҆брѣта́хѹсѧ.
19 Ше́дъ же є҆ди́нъ ѿ сѹ́щихъ въ нїнеѵі́и, сказа̀ царю̀ ѡ҆ мнѣ̀, ѩ҆́кѡ погреба́ю и҆̀хъ. И҆ скры́хсѧ. Ѹ҆ѣ́давъ же, ѩ҆́кѡ и҆́щѹтъ мѧ̀ ѹ҆би́ти, ѹ҆боѧ́всѧ ѿидо́хъ:
20 и҆ разгра́блєна бы́ша всѧ҄ и҆мѣ́нїѧ моѧ҄, и҆ не ѡ҆ста́сѧ мѝ ничто́же, кромѣ̀ а҆́нны жены̀ моеѧ̀ и҆ тѡві́и сы́на моегѡ̀.
21 И҆ не преидо́ша дні́е пѧтьдесѧ́тъ, доне́лѣже ѹ҆би́ста є҆го̀ два̀ сы҄на є҆гѡ̀ и҆ бѣжа́ста въ го́ры а҆рара҆тскїѧ: и҆ воцари́сѧ сахерда́нъ сы́нъ є҆гѡ̀ вмѣ́стѡ є҆гѡ̀, и҆ поста́ви а҆хїа́хара а҆наи́ла, сы́на бра́та моегѡ̀, над̾ всѣ́мъ сочисле́нїемъ ца́рствїѧ своегѡ̀ и҆ над̾ всѣ́мъ ѹ҆строе́нїемъ.
22 И҆ просѝ а҆хїа́харъ ѡ҆ мнѣ̀, и҆ прїидо́хъ въ нїнеѵі́ю. А҆хїа́харъ же бѣ̀ вїиоче́рпчїй и҆ над̾ пе́рстнемъ, и҆ ѹ҆прави́тель и҆ сочисли́тель, и҆ поста́ви є҆го̀ сахерда́нъ вторы́мъ: бѣ́ же сы́нъ бра́та моегѡ̀.
Нашли в тексте ошибку? Выделите её и нажмите:
Ctrl + Enter
Книга Товита, 1 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784