1 Петрово

Петръ Апостолъ Ісусъ Христовъ, пришельцем разсеанымъ живущим въ Понту, и Галатіи, Каппадокіи, Асіи и Вифініи • Изъбранным по прозърению Бога Отца, ко освещинию Святого Духа во послушание и окропление Крови Ісусъ Христовы • Благодать вамъ и миръ да умножится •

Благославенъ Богъ и Отець Господа нашего Ісуса Христа, Онъже по мнозей своей милости, породилъ насъ во упование живо, воскресениемъ Ісусъ Христовымъ от мертвых • В наследие нетленно, и нескверно, и невъведаемо, соблюдено на небесехъ вамъ • Иже силою Божиею храними в вере, во спасение еже готово ест явитися во время последнее • О немъже радуйтеся, мало ныне прискорбни бывше аще потреба ест в различных напастехъ • Да искушение вашея веры, много честнейшее злата гыбнуща огнемъ искушена • Знайдется во похвалу, и честь, и славу во откровеніи Ісусъ Христове, Егоже не видавши любите, и в Негож не зряще верите, и верующе радоватися будете радостию неизглаголанною, приемлюще конъчину веры вашее спасение душамъ •

О семъ спасеніи взыскаша, и спыташа пророци • Иже о вашей пріидущей благодати прорекоша • Испытающе въ каково, или въ кое время будеть, еже являаше в них Духъ Святый, прежде сведетелствуя о Христовыхъ страстехъ, и о пріидущей славе имъ же открися яко не сами собе, но вамъ служаху сими • Еже ныне возвещаются вамъ, теми иже благовестиша Еивангелие Духомъ Святым посланымъ с небеси, на Негож жадають ангели возирати • Сего ради препоясавше чресла помышления вашего, трезвящеся досконале уповайте, на приносимую вамъ благодат откровениемъ Ісусъ Христовымъ, яко чада послушания, не преобразующеся первыми неведения вашего похотями • Но позвавшему вы Святому и сами святи во всемъ животе будте • Понеж писано ест: Святи будете, яко Азъ святъ есмъ • И аще Отца призываите нелицемерна, судяща каждому по деломъ его • Во страсе ж пришествия вашего время поживите • Ведуще яко не тленнымъ сребромъ, или златомъ избавистеся от суетнаго вашего жития, отци преданаго • Но честною Кровию, яко Агньца непорочна, и нескверна, Христа • Проразумеваема убо прежде сложения мира, явльшего же ся во последняя лета вас деля, иже Его ради веруете въ Бога, воздвигащего и изъ мертвыхъ, и славу Ему давша • Яко да вера ваша, и упование будеть на Бога • Душе ваше очистивше во послушаніи истинне духомъ • Во братолюбии нелицемерне, от чиста серца, друг друга любите прилежно, порожени не от семени исътленна, но неизътленна • Словомъ живаго Бога, и пребывающего во веки • Зане же всяка плоть яко трава, и всяка слава человеча яко цветъ травный, и сосше трава, и цветъ ея отпаде • Слово же Господьне пребываеть во веки, и сее ест слово благовествованное въ васъ •

Сего ради отложивше всяку злобу, и всяку лесть, и лицемерие, и зависть, и вся клеветы • Яко новороженніи младенци, словесное, и нескверъное млеко возлюбите • Да о нем возрастете во спасение • Понеже въкусисте яко добръ ест Господь • Къ Нему и приступите къ каменю живу • От человекъ убо заверженъ, от Бога же изъбранъ, и честенъ • И сами яко камение живо жиздитеся, въ храмъ духовенъ, светительство свято, вознести жертвы духовны благоприятны Богови Ісусъ Христом • Занеже пишеть во Писаніи: се полагаю во Сионе камень краюуголный, изъбранъ, честенъ, и веруяй в Онь не постыдится • Вамъ убо верующим честенъ естъ • А противящимся, камень егоже не брегоша зиждущие, сей бысть во главу углу • И камень претыкания, и камень соблазна • О немже претыкаются противящеися слову, и не веряще тому в немже исполнены быша • Вы пакъ родъ изъбранъ, царское свещение, языкъ святъ, людие обновления • Яко да добродетели Того возвестите, Он же от темностей призвалъ васъ во чудный Свой светъ • Иже иногда не людее бесте, ныне еже людие Божіи • Непоміловани, ныне же помиловани бывше •

Возлюбленіи молю васъ яко пришелъцевъ, и гостей • Отгребайтеся от плотскихъ похотей, иже воюють на душу • И житие ваше имеіте добро во языцех • Да о томъ о немже клевещут на васъ, яко на злочинцевъ • От добрых делъ вашихъ видевше прославят Бога, во день посещения •

Повинитеся убо всякому созданию человечию Господа ради: аще царю, яко преобъладающему • Или княземъ, яко от него посланымъ, на отмщение злодеемъ • Во похвалу же добродеемъ • Яко то ест воля Божия добро чинящи обуздовати безумных людей невежство • Будьте свободни, не яко прикровение имуще злости свободу • Но яко раби Божіи, всехъ чтите, братьство возлюбите • Бога бойтеся • Царя честуйте •

Раби поддани будте во всякомъ страсе господаремъ своимъ • Не толико добрымъ и кротким, но и строптивымъ • Сей убо имать благодать, кто совести ради Божия терпить скорби, и стражеть без вины • И кая похвала естъ аще согрешающе мучими терпите? Но естъ ли добро чиняще и стражуще терпите • То ест благодат от Бога, и на сее возвани бысте • Иже греха не сотвори, не обретеся лесть во устех Его • Онъже укаряемъ не укарял и мучим, не грозилъ • Предал же Ся Судящему Праведенъ сый • Иже грехи наша Самъ вознесе на теле Своемъ на древо, да от грех избывше правдою поживемъ • Егоже язъвою исцелесте, бесте бо яко овца блудяще, но возвратистеся ныне къ Пастырю и Посетителю душъ вашихъ •

Також и жены повинуйтеся мужем своимъ, да и тіи ониже противятся словомъ Божіимъ • Женскимъ житиемъ навращены будут • Егда узрят со страхомъ случено чистое житие ваше • Имъже дасть не внешнее плетение власъ и обложение злата, или одеание рызъ, лепоту • Но потаемныи серца человекъ во неистленіи кроткаго, и любезнаго духа еже естъ пред Богомъ многоцененъ •

Тако бо и прежде святыя жены уповающе на Бога, украшаху себе повинующеся мужемъ своимъ • Яко Сарра послуша Авраама, господиномъ того зовущи • Еяже бысте дщеры добро чиняще, и не боящеся ни единого страха •

Мужи по тому же въкупе разумно живите, яко немощнейшему сосуду женскому, чьсти уделяюще, якож наследницам благодатней жизни, не прекажающе собе въ молитвахъ своихъ •

Наконец же будте вси единомысльни, отдатливи, братолюбци, милосердни, смиреномудри, не воздающе зла за зло, или досаждения за досаждение • Но более благословите воспять, ведуще яко на се звани бысте, да благословение наследите •

Кто убо хощеть животъ любити, и видети дни добры • Удержи языкъ свой от зла, и устне его да не глаголють ильсти • Уклонися от злости, и сотвори благо възыщи миру, и постигай и • Занеж очи Господьни на праведныя, и уши Его въ молитву их, лице же Господьне на творящихъ злая • И кто озлобить васъ, естъ ли же доброму миловници будете? Но аще и страждете правды ради, блажени есте • Страха ж их не бойтеся, и ни смущайтеся • Господа же Бога светите во серцехъ ваших • И будте готови всегда къ ответу вопрошающему вас слова о вашемъ упованіи, со кротостию и страхомъ, совесть имуще добру • Да о немже клевещуть на васъ яко злодеи постыдяться, искушающе ваше доброе о Христе житие • Лепей бо добро чиняще, аще воля Божия естъ, пострадати • Нежели зло творяще • Занужъ и Христосъ единова за грехи наша пострада • Праведникъ, за неправедники • Да насъ приведет Богови, умерщвенъ бывъ плотию, и оживъ духомъ • О Немже и сущимъ во темници духомъ, сошедъ, проповедаше, противльшимся иногда • И тымъ выображениемъ ныне и насъ спасаеть крещение • Не плотския отложая скверны, но совести добрый упрошая въ Бога, воскресениемъ Ісусъ Христовымъ • Онъже естъ одесную Бога, вошедъ на небо • Покорившимся Ему Ангеломъ, и Властемъ, и Силамъ •

Христу убо пострадавшу плотию за васъ, и вы въ ту жъ мысль вооружитеся • Занеже пострадавый плотию преставаеть от греха, да к тому не в человеческой похоти, но въ воли Божией останочные лета во плоти поживем • Довлееть бо намъ, яко и во мимошедшее время нашего жития волю языческую чинихом, ходяще во сквернствах, во похотех злыхъ, во обжарствах, во пианствахъ, и во нечистых идолослужениехъ • О немъже дівящеся не сходящимся вамъ въ то же блуда слиание, хулять васъ • Иже воздадут ответъ, готовому Судіи живых и мертвых • На се бо и мертвымъ благовестися, да суд пріимуть по человеку плотию • И живи будут по Бозе духом • Всем воистинну речем конець приближися • Сего ради трезвитеся, и чуйте на молитвахъ • Прежде всехъ юже к собе любовъ вставичну имуще, занеже любовь покриваеть множство грехов • Будте страннолюбци другъ друга без роптания, каждый якоже приятъ дарование сами к собе тако послугуйте, яко добрые строители различное благодати Божией • Аще кто глаголеть, да глаголеть яко словеса Божия • Аще кто служить, да служить яко от крепости, юже подаеть ему Богъ • Во всем да прославится Богъ, Ісусъ Христом, Емуже слава и держава во веки веком амин •

Братие не дивитеся иже во васъ, разозжению ко искушению вашему бываему, яко чужду вамъ пригодящуся • Но яко приобщаетеся Христовым страстемъ, радуйтеся • Да и во явление славы Его возрадуетеся веселящеся • Аще укаряеми бываете о имени Христове блажени есте • Яко славы Божией Духъ на васъ почиваеть, онеми убо хулится, а вами прославляеться • Да никтоже от васъ постражеть яко убійца, или тать, или злочинца, или чуждихъ речей похытител • Пак ли же кто яко хрестианинъ постражеть, да не стыдится, но да прославляеть Бога во части сей, яко и время ест начати судъ от дому Божія • Аще ли прежде починает от вас, и что будет за конец противящимся Божию Евангелию? И аще праведник едва спасется, немилостивый, и грешник где явится? Темже страждущіи по воли Божией, яко верну Жизителю предаете душа своя с добрыми делы •

Презвитеровъ иже в васъ суть молю • Яко и самъ есмъ презветеръ и сведетель Христовым страстем, и приидущей славе, еже имать явитися Обещникъ: Пасите еже у васъ ест, стадо Христово • Посещающе не нуждею, но волею, не мытом злымъ, но усердно • Ни яко обладающе людми, но яко образъ бывающе стаду • И тако от явльшегося пастыремъ Началника, приимете неуведаемый венець славы • По тому ж и младіи повинитеся старейшим, и вси другъ другу покаряющеся смиреномудрие стяжите • Занеж Богъ гордымъ противится, смиреным же даеть благодать •

Смиритеся убо под крепкую руку Божию, да васъ вознесет во время посещения • Всю печал свою возверзите Нань яко Той попечется о васъ • Трезвитеся и чуйте • Супостатъ убо вашъ диаволъ яко левъ рикая ходить, искый кого поглотити • Емуже противтеся тверде верою ведуще яко та же страдания терпять иже во всемъ мире вамъ братия • Богъ пакъ всякой благодати, призвавый васъ во вечную Свою славу, о Христе Ісусе • Мало пострадавшим, Той совершить вы, утвердить, укрепит, и уставить • Тому слава и держава во веки векомъ аминь •

Силуаномъ вамъ братомъ вернымъ, якоже мню въмале написахъ • Моляй, и засведетельствуя, сей быти истинней благодати Божіей в нейже стоите • Поздравляеть вас иже во Вавилоне соизбранная вам церков • И Марко сынъ мой • Целуйте себе въкупе лобзаниемъ любве • Миръ вамъ всемъ о Христе Ісусе • Аминь •