2 Петрово

Симонъ Петръ рабъ, и посланникъ Ісусъ Христовъ • Случившимся в равночесную веру с нами, во правде Бога нашего, и Спасителя Ісуса Христа • Благодать вамъ и миръ да умножится, во познание Божие, и Ісуса Господа нашего • Яко вся намъ от божественныя сылы Его, яже к животу, и ко благочестию подана сут разумомъ призвавшего насъ, славою и добродетелию Своею • Имъ же честная нам и великая обетования даровашеся • Да сих ради будемъ Божественаго естства причастници, отбегающе иже в мире похотное тли • Самое же тщание все приложше, подадите в вере вашей добродетель • Во добродетели же разумъ • В разуме ж воздеръжание • Во воздержаніи пакъ терпение, во терпении же благочестие • Во благочестии братолюбие • И во братолюбіи любовь • Сим бо сущимъ въ васъ, и множащимся • Не празны, ни безплодни поставлени будете во познаніи Господа нашего Ісуса Христа • А емуже несть сихъ, слепъ ест, и рукою путя щупаеть • Забывъ приемъ очищение от древнихъ своих грехъ •

Темже братия моя более потщитеся да звание, и изъбрание ваше твердо створите • Сия бо чиняще не согрешите никогдаже • И тако обилно подасться вам входъ во вечное Царство Господа нашего и Спаса Ісуса Христа • Сего ради не обленюся вам всегда воспоминати о сих, яко ведущим и утверженымъ, в настоящей истинне • И праведно мню дондеже есмъ во семъ телеси, воставляти вас воспоминаниемъ вемъ убо иже воскоре ест отложение телеси моего • Яко и Господь нашъ Ісусъ Христосъ сказа мне • И буду всегда пилен, дабы и вы по моемъ исходе, о сих часто паметь чинили, не умудреным бо баснемъ последовавше сказахом вамъ Господа нашего Ісуса Христа силу и пришествие • Но самовидци бывши Оного величествию • Приял бо от Бога Отца честь и славу, гласу пришедшу к Нему таковому от велелепныя славы • Сей естъ Сын Мой возлюбленный о Немже Азъ благоизволихъ • И сий гласъ мы слышахомъ с небеси съшедшъ, внегда быхомъ с Нимъ на горе святе • И имамы известъные пророческие слова, ихъже послухающе добре чините, яко светилнику сияющу во темне месте, дондеже день озарить • И денница восияеть во серцехъ вашихъ •

Сия прежде верующе яко всякое пророчество книжное, не бываеть по розуму людскому, не волею бо человеческою сказано бысть когда пророчество • Но от Духа Свята водими глаголаша светіи Божіи человеци •

Быша жъ и илъже пророци в людехъ • Якоже и у васъ будуть лъжи учители, иже внесуть ериси погибелные, и искупльшего их Владыки отметающеся, приводяще сами собе скорую погибель • И мнози последовати будуть их нечистотамъ, имиже путь истинный похулится • И въ лихоимстве словы прикритыми вас покупят • Ихъже судъ искони не замедлить, и загинутие их не воздремлеть •

Аще убо Богъ ангеломъ согрешившимъ не отпустилъ, но пленицами мрака свезавъ, предалъ до часу суда, мучимы блюсти • И перваго мира не пощаде, но само осмаго Ноя правде проповедника сохрани, потопъ на весъ миръ нечествуюшимъ наведе •

И грады Содомъския, и Гоморския сожегъ, разорениемъ осуди • Образъ хотящимъ нечествовати положи • И праведнаго Лота обидема от сквернаго их жития изъбави • Видением бо, и слышаниемъ праведный, живяй посреде их, на каждый день, душу праведную безаконными делы их мучаше •

Весть Господь благочестивыя от смерти изъбавляти, неправедныя же во день судный мучимы блюсти • Найболеи тыя ониже воследъ плотския, сверныя похоти ходять, и о господьстве не одбають • Гордіи, собе угодни, славы не трепещуть, иныхъ хулять • Внегда Ангели крепостию и силою болшіи суще, нетерпять на ся от Господа укоризнена суду • Сіи же яко скоти неразумніи естствомъ бывше, во погибель и тлю, в нихже не ведять творяще, во исътленіи своемъ загынуть • Приемлюще мъзду неправедну • Сласть мняще дневную пищу, сквернители порочници • Питающеся льстями своими • Ядуще с вами, очи же имуще полны любодеания, и не престающа греха, прельщающе душе неутверженыя серце имуще навчено лихоимству, сынове клятвы • Ониже оставивши правыі путь, заблудиша последовавши пути Валаамову сына Восорова, иже мъзду неправедну возлюби • Обличение же имелъ своего безумия, осел говядо немое человеческимъ гласом провещавши, возбрани пророку безаконие • Сии суть яко источници безводни, и мъглы от ветръ преносимы ихъже мракъ тмы во веки блюдется, прегордая бо в суете вещающе, прельщають во похоть плоти нечистотами, воистинну отбегше • Иже во блуде жившая, свободу имъ обещавают, сами раби суще тлению от кого убо кто победится, тому и поработится • Аще бо отбегше сквернъ мира сего, познаниемъ Господа и Спаса нашего Ісуса Христа • Сим же паки соплетшеся побежаются • Быша имъ последняя горей первых • Лучши бо было имъ не познати путя правды, нежли познавши отвратитися от него иже бе преданъ святыми заповедьми • Се случися имъ истинная сия притча: песъ возвращаяся на свою блевотину, и свинія омывшися, во калъ тимения •

Сие убо возлюбленніи второе пишу вамъ послание, в немже возбужаю васъ, воспоминаниемъ чистаго смысла • Дабы есте паметовали прежде реченныя глаголы от святыхъ пророкъ, и заповеди Апостолъ Господа нашего и Спаса, сее первей ведуще яко пріидуть во дни последние ругатели, по своих похотяхъ ходяще, и глаголюще: игде ест обетование пришествия Его? Отнеле бо отци успоша, вся тако пребыва от начала создания • Тогоже хотящимъ ведати, съкрито ест пред ними • Яко небеса быша исперва и земля от воды и водою составлена Божіимъ словомъ: темже тогдашній миръ водою потопленъ бывъ погибе • Нынешняя же небеса и земля, тымже словом Божіимъ сокровена суть, огню блюдома въ день суда, и погибели нечестивых человековъ • Едино же се да не утаится от вас возлубленніи • Иже единъ день у Господа, яко тысеща летъ • И тысеща летъ, яко единъ день • Не коснит Господь обетованіи Своими, якоже неціи коснение мнять • Долго же терпит о нас не хотяй некия погубити, но всехъ въ покаяние вместити • Приидеть убо день Господень яко тать в нощи, в онже небеса восъкоре изменятся, и составы сожигаемы разорятся • Земля пак и яже на ней сут дела згорять, симже всемъ разоряемым яковым подобаеть быти намъ, во святых пребываниих, и благочестиих • Ожидающимъ, и тъщащимся пришествия Божия дню, во иже небеса горема разорятся, и составы опаляемы распустятся • Небеса ж нова, и землю нову по обетованию Его чаемъ, в нихже правда живеть • Темже возлюбленніи сих ожидающе поспешите, да нескверни, и непорочни Тому обрящетеся въ мире • И Господа нашего долъготерпение во спасение имейте • и во всехъ епистолахъ по тому же глагола о сих речахъ • В нихже суть некая, еже ненавчени, и неутверъжени развращают • Яко и прочая Писания ко своей погибели • Вы убо возлюбленніи прежде ведуще сия хранитеся, да не нечистыми лестьми сведени бывше отпадете своего утвержения, но растите благодатию и разумом Господа нашего Спаса Ісуса Христа • Тому слава, и ныне и во дни века амин •