Петрово 2. Послание соборъное еже писалъ ко всемъ хрестианомъ • Поведая яко о вере Христове мудрици сего света сут мертви • И невинность жития нашего иже у Бога приятно естъ • А имат главы 3 •
Навчаеть Апостолъ верующихъ дабы ся правые веры Христовы держали а не прелщалися яко Той естъ воистинну Сынъ Божій •
1 Симонъ Петръ рабъ, и посланникъ Ісусъ Христовъ • Случившимся в равночесную веру с нами, во правде Бога нашего, и Спасителя Ісуса Христа •
2 Благодать вамъ и миръ да умножится, во познание Божие, и Ісуса Господа нашего •
3 Яко вся намъ от божественныя сылы Его, яже к животу, и ко благочестию подана сут разумомъ призвавшего насъ, славою и добродетелию Своею •
4 Имъ же честная нам и великая обетования даровашеся • Да сих ради будемъ Божественаго естства причастници, отбегающе иже в мире похотное тли •
5 Самое же тщание все приложше, подадите в вере вашей добродетель • Во добродетели же разумъ •
6 В разуме ж воздеръжание • Во воздержаніи пакъ терпение, во терпении же благочестие •
7 Во благочестии братолюбие • И во братолюбіи любовь •
8 Сим бо сущимъ въ васъ, и множащимся • Не празны, ни безплодни поставлени будете во познаніи Господа нашего Ісуса Христа •
9 А емуже несть сихъ, слепъ ест, и рукою путя щупаеть • Забывъ приемъ очищение от древнихъ своих грехъ •
10 Темже братия моя более потщитеся да звание, и изъбрание ваше твердо створите • Сия бо чиняще не согрешите никогдаже •
11 И тако обилно подасться вам входъ во вечное Царство Господа нашего и Спаса Ісуса Христа •
12 Сего ради не обленюся вам всегда воспоминати о сих, яко ведущим и утверженымъ, в настоящей истинне •
13 И праведно мню дондеже есмъ во семъ телеси, воставляти вас воспоминаниемъ
14 вемъ убо иже воскоре ест отложение телеси моего • Яко и Господь нашъ Ісусъ Христосъ сказа мне •
15 И буду всегда пилен, дабы и вы по моемъ исходе, о сих часто паметь чинили,
16 не умудреным бо баснемъ последовавше сказахом вамъ Господа нашего Ісуса Христа силу и пришествие • Но самовидци бывши Оного величествию •
17 Приял бо от Бога Отца честь и славу, гласу пришедшу к Нему таковому от велелепныя славы • Сей естъ Сын Мой возлюбленный о Немже Азъ благоизволихъ •
18 И сий гласъ мы слышахомъ с небеси съшедшъ, внегда быхомъ с Нимъ на горе святе •
19 И имамы известъные пророческие слова, ихъже послухающе добре чините, яко светилнику сияющу во темне месте, дондеже день озарить • И денница восияеть во серцехъ вашихъ •
20 Сия прежде верующе яко всякое пророчество книжное, не бываеть по розуму людскому,
21 не волею бо человеческою сказано бысть когда пророчество • Но от Духа Свята водими глаголаша светіи Божіи человеци •
Нашли в тексте ошибку? Выделите её и нажмите:
Ctrl + Enter
Послание Петрово второе, 1 глава. Библия Скорины.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте.
Public Domain — общественное достояние.
2024, bible.by & biblia.by.