К Селуняномъ послание второе святаго Апостола Павла • Еже посылаеть от Рима Тіхикомъ • А замыкает в собе главъ тры •
Благодарить Апостолъ Бога о размноженіи во вере, и во любви, и во терпеніи Селунянъ, поведая обидящим их скорое отмщение •
1 Павелъ • И Силуанъ • И Тимофей, церкви Селунстей • О Бозе Отци нашемъ • И Господе Ісусъ Христе •
2 Благодат вамъ и миръ, от Бога Отца нашего, и Господа Ісусъ Христа •
3 Дяковати Богу должни есмо всегда о васъ братие, яко достойно ест • Понеже превозрастаеть вера ваша • И множится любовь единаго кажъдого вокупе •
4 Тако иже мы сами похваляемся вами, во церквахъ Божіихъ • О терпеніи вашемъ и вере, во всехъ гонениахъ и скорбехъ яже приемлете,
5 къ показанию праведнаго суда Божия • Дабы есте сподобилися Царствию Христову, для негоже и терпите •
6 Яко убо праведно ест от Бога воздати оскорбляющимъ васъ, скорбь •
7 Тако и вамъ оскорбляемым отпочиненіе с нами • Во откровеніи Господа Ісуса с небеси, со Ангелы, и силою Его •
8 Во пламени огня дающему отмьщение не ведущимъ Бога • И не послушающимъ Евангелия Господа нашего Ісус Христа •
9 Ониже судъ пріимуть всегибельный вечный • От лица Господьня, и от славы крепости Его •
10 Внегда пріидеть прославитися во святыхъ Своих • И дивен быти во всех веровавших в Него •
Яко уверится сведетелство наше во вас в день онъ •
11 Сего для и молимся всегда за васъ • Да сподобить вы званию своему Богъ нашъ • И исполнить всяко благоволение доброты Своея • И дело веры в силе •
12 Яко да прославиться имя Господа нашего Ісуса Христа о васъ, и вы о Немъ • По благодати Бога нашего, и Господа Ісуса Христа •
