1 Іоаново

Иже бе исперва, еже слышахомъ, еже видехомъ очима нашима, еже прозрехом, и руки наше осязаша • О Словеси животнемъ, и животъ явися, и видехомъ, и сведетельствуемъ, и возвещаемъ вамъ животъ вечный • Иже бе у Отца, и явися намъ • Еже видехомъ и слышахомъ поведаемъ вамъ да и вы приобщение имате с нами • Объщение же наше да будеть, со Отцемъ, и Сыномъ Его Ісусъ Христомъ, и Святым Духомъ • И сие пишемъ вамъ, да радость ваша будеть исполнена • То естъ обетование еже слышахомъ, и поведаемъ вамъ • Яко Богъ светъ ест, и тмы в Немъ несть ни единое, аще речем приобщение имамы с Ним и во тме ходимъ, илъжемъ и не творимъ истинны • Аще ли же во свете ходимъ, яко и Сам во свете ест • Приобщение имамы въкупе с Ним, и Кровь Ісуса Христа Сына Его очистить нас от всякого греха •

Возлюбленіи аще речем греха не имамы, себе ильстимъ, и истинны несть в нас • Аще исповедуемъ грехы наша веренъ ест, и праведенъ • Да отпустить нам грехи, и очистить насъ от всякия неправды • Аще речемъ: яко не согрешихомъ лжай творимъ, и слова Его несть в насъ •

Чадца мои сия пишу вамъ да не согрешаете • Аще кто согрешить, Утешителя имамы ку Отцу, Ісуса Христа Праведника • И Той ест очищение о гресехъ наших • Не о нашихъ толико, но и о всемъ мире • И по семъ разумеемъ яко познахомъ И, аще заповеди Его соблюдемъ • Кто глаголеть: яко познахъ И, и заповедей Его не соблюдая, ложъ естъ и правды в нем несть • Иже бо аще соблюдеть слово Его по истинне, в семъ любовъ Божия соверъшается • И по семъ разумеемъ яко в Немъ есмы • И глаголяй в Немъ пребывати, должен естъ, якоже Онъ ходилъ, и самъ такожде ходити •

Возлюбленіи не заповедь нову пишу вамъ, но заповедь ветху, юже иместе исперва: заповедь ветха ест слово еже слышасте искони • Паки заповед нову пишу вамъ: иже ест по истинне в Немъ, естъ по истинне и у васъ • Яко тмы мимоидоша и светъ истинный въже сияеть • Глаголяй себе во свете быти, и брата своего ненавидить, во тме естъ доселе • Любяй брата своего во свете пребываеть, и соблазна в немъ несть • А ненавидяй брата своего во тме естъ, и во тме ходить, и не весть камо идеть, яко тма ослепи очи его • Пишу вамъ чадца яко отпустятся вам грехи именемъ Его • Пишу вам отци яко, познасте Того Онъже искони бе • Пишу вамъ юноше, яко победисте лукаваго • Пишу вамъ дети, яко познасте Отца • Писахъ вамъ отци, яко познасте Исконнаго • Писахъ вамъ юноши, яко крепци есте, и слово Божие у васъ пребываеть • И победисте лукаваго, не любите мира, и яже во мире суть: аще кто любить миръ несть любви Отчая въ немъ • Яко все еже въ мире, похот плотская ест, и похот очима, и гордыни жития, не ест Отца но от мира ест, и миръ преходит и похот его • А творяй волю Божию пребываеть во веки •

Дети последний часъ естъ, и яко слышасте, иже анътихристъ грядеть • И ныне антихристи мнози починають бывати, по тому же разумеваемъ яко последній часъ естъ, от насъ изыдоша, и не быша от насъ, аще бо быша от насъ, пребыли убо беша с нами • Но да явится яко не вси от нас • И вы помазание имате от Святого, и весте вся • Не писах вамъ яко не ведящимъ истинны, но яко ведящим ю и яко всяка лжа от истинны несть • Кто естъ лживъ, точию запираяся, яко Ісусъ несть Христосъ • Сей ест анътихристъ, отметаяся Отца и Сына • Всякъ отметаяся Сына ни Отца имать • Вы убо еже слышасте исперва, в васъ да пребываеть • Аще в вас пребудеть еже исперва слышасте, и вы въ Сыне и Отци пребудете • И се естъ обетование еже Самъ намъ обеща живот вечный • Сия писахъ вамъ о льщащих васъ и вы помазание еже приясте от Него в васъ пребываетъ, и не требуете да кто учить вас • Но яко тоежь помазание учить вас о въсехъ, и истинно ест, и несть ложно, и якоже навчи васъ пребывайте в немъ • И ныне чадца пребывайте о Немъ, и егда явится, имамы дерзновение, и не посрамимся от Него во пришествие Его • Аще весте яко праведникъ ест, разумейте жъ яко всякъ творяй правду от Него родися •

Видите какову любов далъ ест намъ Отець, да чада Божия наречемся, сего ради миръ не весть насъ, яко не позналъ Его • Возлюбленіи ныне чада Божия есмы, и еще не явися что будемъ, вемы ж внегда явится подобни Ему будем понежь узримъ Его, якоже ест • И всякъ имеяй надежду сию Нань оцещаеть себе, якоже Онъ чистъ ест • Всякий чиняй грех и безаконие творить, и грехъ ест безаконие • И весте яко Онъ явися, да грехи наша возметь, и греха в Немъ несть • Всякъ иже о Немъ пребываеть не согрешаеть • Всякъ согрешаяй не виде Его, ни разуме Его • Чадца мои никтоже да прельщаеть васъ, творяй правду праведникъ естъ, якоже и Онъ праведникъ ест • Творяй же грехъ от диявола ест, яко исперва диявол согреши • О семъ явися Сынъ Божій, да разрушит дела дияволя • Всяк рожденый от Бога греха не творить, яко семя Его в немъ пребываеть, и не можеть грешити, яко от Бога рожден естъ • О семъ явлена суть чада Божия, и чада диавола • яко сее ест звестование еже слышасте исперва, да любим друг друга • Не якоже Каинъ от неприязни бе, и закла брата своего, и за кою вину закла и? Яко дела его лукава быша, брата же его праведна, не дивитеся братия моя, аще ненавидит вас миръ, мы вемы яко прейдохом от смерти в живот, яко любим братию, не любяі брата пребывает вес мертвъ • Всякъ ненавидяй брата своего человекоубійца естъ, и весте яко всякій человекоубійца не имать живота вечного в собе пребывающего • О семъ познахом любовь, яко Онъ за насъ душу свою положи, и мы должни есмо за братию душе свое полагати • Онже бо имать имение мира, и видит брата своего требующа, и затворит утробо свою от него • Како любовъ Божия пребывает в немъ? Чадца мои не любимо толико словомъ, а языкомъ, но деломъ и истинною • И по семъ познаемъ яко от истинны есмы, и пред Нимъ смиримъ серца наша, занеже потопляет ли насъ серце наше, болей ест Богъ серца нашего, и знает вся •

Возлюбленніи аще серце наше не потопляеть насъ надежу имамы ко Богу, и чего попросим приимемъ от Него • Яко заповеди Его соблюдаемъ, и вгодная пред Ним творимъ • И сия естъ заповедь Его, да веруемъ во имя Сынае Его Ісуса Христа, и возлюбим другъ друга якоже заповеда • И соблюдая заповеди Его в Немъ пребывает, и той в Нем • И о семъ разумеемъ яко пребываеть в нас от духа иже далъ естъ намъ •

Возлюбленіи не всякому духу веруйте, но искушайте духы аще от Бога суть • Яко мнози илъжи пророци внидоша въ миръ • И по семъ познаете Духъ Божій, всякъ духъ иже исповедуеть Ісуса Христа во плоти пришедша от Бога естъ • И всякъ духъ иже не исповедуеть Ісуса Христа во плоти пришедша от Бога несть • Но сей ест духъ антихристовъ, о немже слышасте яко грядеть, и ныне въ мире естъ • Вы от Бога есте чадца, и победисте техъ, яко болшій ест, иже во васъ • Нежели иже во мире Они от мира суть сего ради от мира глаголють и миръ техъ послушаеть • Мы от Бога есмы • Разумеваяй Бога послушаеть нас, а иже несть от Бога не послушаеть насъ • Возлюбленіи возлюбим друг друга, яко любовь от Бога ест • И всякъ любяй от Бога роженъ естъ, и разумеваеть Бога, не любяй не разумееть Бога, яко Бог любовь естъ • О семъ явися любов Божія в насъ, яко Сына Своего единороднаго посла Богъ въ миръ, да живем о Немъ • В сем ест любовъ, не яко мы возлюбихомъ Бога, но яко Той первее возлюби насъ, и посла Сына Своего, очищение о гресехъ нашихъ • Возлюбленіи естъ ли же тако Богъ возлюби насъ, и мы должни есмы другъ друга любити •

Бога никтоже нигде не виде, аще любим другъ друга, Богъ в нас пребываеть, и любовъ Его совершена ест в нас • О семъ разумеемъ яко в Немъ пребываемъ и Той в нас • Яко от Духа Своего далъ естъ намъ, и мы видехомъ и сведетелствуемъ, яко Отец посла Сына Своего Спасителя миру • Иже аще кто исповесть яко Ісусъ ест Сынъ Божій • Богъ в немъ пребываеть, и той въ Бозе, и мы веровахом и познахом любовь юже имать Богъ в насъ • Богъ любовь ест, и пребывая в любви во Бозе пребываеть, и Богъ в немъ • О семъ совершается любовь с нами, да дръзновение имамы во день судный • Зане якоже Онъ ест, тако и мы есмо въ мире семъ • Страха несть во любви, но совершеная любовь вонъ изгонить страхъ, яко страхъ муку имать • Бояй же ся не совершается во любви • Мы любим Его, яко Той первее возлюби нас •

Аще кто речет: люблю Бога, а брата своего ненавидить ложъ естъ, ибо ненавідяй брата своего, егоже виде • Бога Егоже не виде како можеть любити? И сию заповедь имамы от Него, да любяй Бога, любить и брата своего •

Всякъ веруяй яко Ісусъ ест Сынъ Божій, от Бога рожденъ естъ • И всяк любяй рождьшаго лубит и рожденнаго от Него • По сем разумеемъ яко любимъ чада Божия, егда Бога любимъ, и заповеди Его соблюдаемъ, сия бо естъ милость Божия, да заповеди Его соблюдаемъ, и заповеди Его тяжки не сут • Яко всякій рожденый от Бога побежаеть миръ • И сия естъ победа побежающи миръ вера наша • И кто ест побежаяй миръ, токмо веруяй яко Ісусъ ест Сынъ Божій • Сей пришедый водою, и кровию, и Духомъ Ісусъ Христосъ • Не водою толико, но водою и кровию, и Духъ ест сведетелствуя, понеж Дух естъ истинна • адсутнічае Яко трие суть сведетелствующе, Духъ, и вода, и кровь, и сіи трие воедино суть • Естъ ли же сведетелство человеческое приемлемъ, сведетелство Божие более естъ • Яко сее естъ сведетельство Божие, еже сведетелствова о Сыне Своемъ • Веруяй въ Сына Божия имат сведетелство в собе • Не веруяй Богови илъжа сътворилъ Его, яко не верова во сведетелство, еже сведетелствова Богъ о Сыне Своемъ • И сее ест сведетелство яко животъ вечный далъ намъ Богъ, и сей живот во Сыне Его естъ • Кто имать Сына Божия, имать живот • И не имея Сына Божия живота не имать • Сия писахъ вам верующимъ въ Сына Божия, да весте яко животъ вечный имате • И да веруете во имя Сына Божия • И сия естъ надежа юже имамы къ Богу, аще чего просимъ по воли Его, услышить насъ • И аще вемы яко услышить насъ чего же просим • Вемы иже имамы прошения яже просихом от Него •

Аще кто весть брата своего согрешающа грехъ не ко смерти, да просить зань, и дасть ему животъ, согрешающему не ко смерти • Естъ же грехъ ко смерти: не о том глаголю, помолитися зань • Всяка неправда ест грехъ, и естъ грехъ даже ко смерти • Вемы яко всякій роженый от Бога не согрешаеть, но рожение Божие блюдеть его, и лукавый не прикасается к нему • Вемы яко от Бога есмы, и миръ весь во злом положен естъ • И вемы яко Сынъ Божій пріиде, и далъ намъ разумъ, да познаемъ истиннаго Бога • И да пребудем во истинномъ Сыне Его Ісусе Христе • Сей естъ истинный Богъ, и животъ вечный • Чадца храните себе от требъ идолских аминь •