Римляномъ

Павелъ рабъ Ісусъ Христов, званъ Апостол, и избран во благовестие Божие, еже прежде обеща пророки Своими во Писаниих святых о Сыне Своемъ • Бывшемъ от семени Давыда по плоти, нареченномъ Сыне Божіи въ силе, по духу святыни • Воскресшемъ изъ мертвых Ісусъ Христе Господу нашем • Имъже прияхом благодат и послание, дабы послушали веры вси языци о имени Его • Межи немижъ то и вы возвани Ісусъ Христу, всемъ иже в Риме есте возлюбленнымъ Божіимъ званымъ святым: милость вамъ и миръ от Бога Отца нашего, и Господа Ісуса Христа • Первее убо благодарю Бога моего Ісусъ Христомъ о всехъ васъ, яко вера ваша возвещается по всемъ свете • Сведетель бо ми ест Богъ Емуже служу духомъ моимъ, во благовествованіи Сына Его • Яко непрестанно о васъ всегда паметь чиню, въ молитвахъ моих моляся • Дабых когда поспешенъ былъ волею Божиею пріити к вамъ, жадаю бо видети васъ, да некое подам дарование вамъ духовно ко утвержению вашему • То естъ, абыхом посполу утешилися общею верою вашею же и моею •

Не хощу в васъ не ведети того братия, яко множицею помышляхъ пріити к вамъ, но возбраненъ бехъ доселе • Да некый плодъ имелъ бых во васъ, якоже и во иных языцехъ • И Еллином бо, и варваромъ • Мудрымъ и немудрымъ, долженъ есмъ • Такожъ по моему усердию, и вамъ сущимъ в Риме благовестити готовъ есмъ • Не стыжу бо ся Евангелиемъ Христовымъ • Сила убо Божия ест ко спасению всякому верующему, Іудеови прежде, таже и Еллинови • Правда Божия открывается в нем от веры в веру • Якоже пишеть: праведникъ от веры живъ будеть •

Явить бо ся гневъ Божій с небеси, на всяко нечестие и неправду, тымъ человеком, ониже правду Божию в неправде задержають • Понеже что ест разумно о Бозе, явлено естъ в них • Богъ же имъ яви • Невидимая бо Его, от создания миру тварми помышляема видятся, також и присносущная Его сила, и Божство • А въ томъ вымовитися пред Нимъ не могуть • Занеже разумевше Бога, не яко Бога просълавиша, или благодариша • Но осуетишеся мышленьми своими • И омрачися неразумное серце их • Глаголюще о собе быти мудри, обуродеша • И измениша славу нетленнаго Бога во подобие образа тленнаго человека, и птиц, и четвероногъ, и гадъ • Сего деля и предалъ ест е Богъ во похоти серць их в нечистоту, дабы привели стыдъ сами на тела своя, иже премениша истинну Божию во лжу • И почтоша и послужиша твари паче Творца • Онъже ест благославенъ во веки аминь •

Для того поддалъ ест их въ жадости неучьтивыя • Яко жены ихъ измениша естьственую подобу свою во презъестственую • Такожъ и мужи оставивше естественую подобу женскаго поглавия, разждегошеся похотию своею друг на друга, муже на мужи студъ содевающе • И возмездие еже подобааше прельсти их въ себе приемлюще •

І якоже не искусиша Бога имети в разуме • Тако и предалъ ест их Богъ в неискусен умъ, чинити неподобная • Исполнены всякия неправды, любодеания, лукавства, лихоимания, полны зависти, убійства, свару, рвения, льсти, злонравия • Насмеватели, клеветники, Богу мерскы, досадителе, величавы, горды, вымыслители злому • Родителемъ непокориви, неразумніи, не ветохранителе, не друголюбителе, не смолвудержителе, немилостиві • Они же познавше оправдания Божия, и таковая чинять, достойни смерьти суть • И не толико иже таковая чинять но и тіи иже волю деють чинящимъ •

Темже безъответенъ еси о человече всякіи судяи иного, в чем бо осужаеши ближнего, самъ себе погубляеши, та же творяи • Вемы убо яко судъ Божій ест по правде, на творящих таковая • Помышляеши ли сее о человече судяй таковая чинящих, а самъ тая же чиниши • Иже ты убежиши от суда Божия? Или о богатестве доброты Его, и ожиданіи, и долготерпеніи погордяеши • Не ведый яко доброта Божия, на покаяние ведет тя? Но по жесточеству твоему, и непокаянному серцу, збираешъ собе гневъ ко дню гнева, и явления праведнаго суда Божия • Онъже воздасть каждому по делом его • Тымъ убо иже во терпеніи чинили дела добрая дасть, славу, и честь, и нетление, ищущимъ живота вечнаго • Онымъ пакъ иже суть сварливи, и противятся правде, повинуются жъ неправде, будеть, ярость и гневъ, скорбь и теснота на всяку душу человека чинящего злое іудея прежде, и еллина •

Слава же, и честь, и миръ всякому чинящему доброе • Іудею прежде, и Еллину • Несть бо на лице зрения у Бога, елици бо без закона согрешиша, беззаконно и погибнуть • А елици въ законе согрешиша, закономъ и осудятся • Непослухачи убо закона праведни суть предъ Богом, но наполнители закона оправдаются •

Егда бо погане, ониже закона не имають, от прирожения законная чинят сие закона не имуще, сами собе суть законъ, иже являють дело закона написано во серцехъ своих • Съпослушествуеть бо имъ совесть их, и помыслы их како имають жаловати, или отвещати • Во день егда судити будеть Богъ, тайная человекомъ • По благовестованию моему Ісусъ Христом • Се ты Іудей именуешися, и почиваеши на законе, и хвалишися о Бозе, и разумееши волю Его, и искушаеши лучшая навчаемъ от закона • Надеяся же себе вождь быти слепымъ, светъ сущимъ во тме, наказатель безумным, учитель младенцемъ якобы имелъ есь образъ разума, и истинны въ законе • И что жъ навчаеши иного а себе не учиши? Проповедуеши не красти а самъ крадеши • Глаголеши не прелюбодеяти, а ты прелюбы твориши • Скаредуяся идолъ, а святокрадеж чиниши • Иже въ законе хвалишися, преступлениемъ закона Бога не честуеши • Имя бо Божие васъ деля хулиться во языцехъ • Якоже писано ест • Обрезание убо ползуеть аще законъ храниши • Аще ли закона преступникъ еси • Обрезание твое, необрезание бысть • А естъ ли же необрезаный, оправдания закона сохранит • То необрезание его во обрезание вменится • И осудить, иже от естства необрезаный, храняй закон • Тебе иже писаниемъ, и обрезаниемъ преступника закону •

Не убо иже яве Іудей называется, сей Іудей естъ • А ни еже явное во плоти обрезание, правое обрезание ест • Но иже во тайне Іудей • И обрезание серца • Духомъ, а не писаниемъ • Емуже похвала не от человекъ, но от Бога естъ •

Что жъ болей надъ иные имуть Іудеи? Или кой пожитокъ ест обрезания? Много воистинну всеми обычай • Найпервей убо, яко зверена имъ быша словеса Божия • Что жъ пакъ, иже не вероваша неціи? Еда ли неверие их веру Божию выпразднило? То не естъ • Естъ убо Богъ правдомовный • А всякий человек ложъ • Якоже пишеть: да оправдишися во словесехъ твоих, и победиши, внегда судят тя • Естъ ли неправда наша правду Божию составляеть • Что речемъ? Еда неправеденъ ест Богъ наводяй гневъ? По обычаю человеческому глаголю • Да не будеть сее при насъ • Понеже како бы судилъ Богъ миру? Аще бо истинна Божия во моей лжи розмножается ко славе Его • Почто жъ еще и азъ яко грешникъ осужаюся • А не яко ругающеися намъ? Ибо неціи рекоша насъ глаголати: вчинимъ злая, да пріидуть намъ добрая • Имъже судъ праведенъ ест •

В чемъ пакъ превышують иномъ Іудеи? Ни в чемъ • Понеже явно вчинихомъ тое, иже Іудеи и Елліни вси под грехомъ быша • Якоже пишет: несть праведенъ никтоже • Несть разумеваяй, несть возыская Бога • Вси уклонишеся въкупе, и непотребни быша: несть чининяй доброты несть и до единого • Гробъ отверстъ горътань их, языки своими льстиве глаголаху • Ядъ аспиденъ подъ устънами ею • Ихъже уста клеветы, и горести полны суть, скоры ноги их ко пролитию крови • Сокрушение и страсть на путехъ их, и пути мирна не познаша • Несть боязни Божіи пред очима ихъ •

Вемы убо вся елика же законъ глаголеть тымъ ониже под законом суть глаголеть, да всяка уста заградятся, и повиненъ будеть весъ миръ Богови • Занеже от делъ закона не оправдится всяка плоть пред Нимъ • Законом бо познание греха ест, ныне же кроме закона, правда Божия явися, сведетелствуема от закона и пророков • И истинна Божия верою Ісусъ Христовою, ко всемъ, и на вся верующая в Онь • И несть разделения, вси бо согрешиша • И лишаются славы Божия • Оправдають же ся даремно Того благодатию, и избавлениемъ иже о Христе Ісусе • Тогожде преложи Богъ смирителя, верою окрови Его, во явление правды Своея, за отпущение прежде бывъшихъ греховъ, во удержаніи Божиемъ, ко явлению истинны Его во нынешнее время в Том, дабы Онъ былъ праведенъ, и оправдалъ тыхъ иже суть от веры Ісусовы •

И где же ныне похвала твоя Іудею? Затворена ест • Которымъ законом, от дел ли? Ни, но законом веры • Мыслимъ убо воистинну верою оправдатися человекомъ без делъ закона или Іудеомъ толико Богъ, а не языком? Ест и языкомъ • Понеже единъ Богъ Онъже оправдить обрезанных от веры • И необрезанных верою • И что ж закон ли разоряемъ верою? Никако, но закон составляем •

І что жъ речемъ Авраама отца нашего обрести по плоти? Естъ ли же Авраамъ от дел оправдася, имат похвалу, но не от Бога • Что же Писание о немъ глаголеть? Верова Авраамъ Богови, и вменися ему во правду •

Делающему бо мзда не вменяется по благодати, но по долгу • А не делающю, верующему же въ Того, иже оправдаеть нечстиваго, вменяется вера его во правду • Якоже и Давыдъ глаголеть, о блаженъстве человека, ему же Богъ вменяеть веру въ правду без делъ закона • Блажени имъже отпустишеся безакония, и имже прикришеся греси • Блаженъ мужъ емуже не въменить Господь греха • Блаженство убо сие, на обрезание ли толико, чили и на необрезание ест? Глаголеть бо, яко вменися Аврааму вера во правду • Како убо въменися? Во обрезаніи ли сущу, или в необрезаніи? Не во обрезаніи, но предъ обрезаниемъ • И потомъ принялъ обрезание во знамя правдивое веры, юже имеаше предъ обрезаніемъ • Дабы былъ отцемъ всемъ верующимъ в необрезаніи, да и темъ вменится вера их въ правду • Бысть же отець обрезанию не толико тымъ, иже обрезуются • Но и тымъ ониже последують стопамъ веры бывшее предъ обрезаниемъ, отца нашего Авраама •

Не законом бо сталося естъ обетование Аврааму • Или семени его, еже наследникомъ быти мирови • Но правдою веры • Аще бо иже от закона, толико тии наследници суть • Испразнися вера, и разорися обетование • Закон бо гневъ соделаваеть • Идеже несть закона, ту ни преступления • Сего ради и от веры наследници суть • Дабы по благодати Божией, изъвестно было обетование всему семени, не толико тымъ иже от закона, но и тымъ иже от веры Авраамовы • Онъже ест отець всем нам • Якоже пишеть: отца многым языком поставих тя • Прям бе пред Богом Ему же верова, оживляющу мертвыя и нарицающу не сущая яко сущая • Онъже безъ упования, на упование вверилъ • Яко быти ему отцемъ многымъ языкомъ, по реченному: се тако будет семя твое яко звезды небесные, и яко песокъ иже при брегу моря • И не изможе верою, и не смотре на плоть свою вже умерщвену, якобы во сту летехъ сый • Ни мертвости ложеснъ Саариныхъ • Во обетованіи же Божиемъ не сумнеся неверованиемъ, но возможе верою, давъ славу Богови • Извесътенъ бывъ, яко то еже обеща Богъ, силен ест и наполнити • Темже и вменися ему во правду • Не писано же ест сее для него толіко, иже вера его вменися во правду • Но и для нас, яко вера наша вменится во правду, иже веруемъ во воскресившего Ісуса Господа нашего изъ мертвых • Онже предан бысть за грехи наша, и воста за оправдания наша •

Оправдани же суще верою миръ имамы къ Богу, Господемъ нашимъ Ісусъ Христомъ, Имъже и приведение обретохомъ, верою во благодать сию • В нейже стоимъ и хвалимся, во упованіи славы Божие • И не точию во упованіи, но и во скорбехъ хвалимся • Ведяще яко скорбь терпение соделаваеть • А терпение, исъкушение • Искушение же упование • Упование жъ не посрамит • Яко любовь Божія излияся во серца наша, Духомъ Святым данымъ намъ •

Христосъ бо сущимъ намъ еще немощнымъ на время, за грешных умре • Едва бо кто за праведника умира • Но еще й за добраго ледва дерзнеть кто умрети • Составляеть же Свою любовь в насъ Богъ понежъ егда еще быхом грешни, Христосъ за нас умре • Многымъ более оправдани ныне, Кровию Его спасемся от гнева •

Аще бо врази суще пременихомся ко Богу, смертию Сына Его • Многымъ паче пременшеся спасени будемъ въ животе Его • И не толико сее, но и хвалимся о Бозе Господемъ нашимъ Ісусъ Христомъ, Имже ныне пременение приахомъ • Сего ради якоже единемъ человеком грехъ въ миръ вониде, и грехомъ смерть • И тако во вся человеки смерть изыде, понеже вси согрешиша • Прежде закона бо былъ естъ грехъ въ мире • Во грехъ же не вменяшеся, не бывшу закону • Но царствова смерть от Адама даже до Моисея, тежъ и над тыми ониже не согрешиша • А то для подобенства преступления Адамова • Онъже былъ ест образъ Христа грядущего • Но не яко преступление, тако и даръ • Аще бо единаго преступлениемъ мнози умроша • Множайша ест милость Божия и даръ, благодать бо единаго Человека Ісуса Христа, во многых размножися • И яко для греха единаго осуждени суть мнози, тако и дарованиемъ благодати Божіей оправдани будуть вси • Грехъ бо изъ единого во осужение, дар же от многъ прегрешеній во оправдание •

Естъ ли же единаго прегрешениемъ, смерть ест царствовала единем человекомъ • Многым более людие приемлюще изъбытокъ ласки, и даръ правды, во жизни вечной царствовати будуть, единемъ Ісусъ Христомъ • Того для яко бо единаго согрешениемъ во вся человеки изыде осужение • Тако и единаго оправданиемъ, во вся человеки оправдание жизни • И яко непослушаниемъ единаго человека грешници быша мнози • Сице и послушаниемъ единаго праведни будуть мнози • Законъ пак превниде да умножится прегрешение и внегда умножися грехъ, преизъбычествова благодат • Да якоже царствова грех во смерть • Тако и благодать царствовати будеть въ животъ вечный, правдою Ісуса Христа Господа нашего •

Что убо речем? Пребудемъ во гресе да благодать умножится? Да не будеть то • Имъже бо умрохомъ грехомъ, и како жъ паки поживемъ в немъ? Или не разумеете сего братия • Сопогребохомся убо с Нимъ на смерть? Да якоже воста Христосъ от мертвых, славою Отчею • Тако и мы во обновленіи жития ходити начнемъ • Аще убо сраслени быхомъ с Ним по подобию смерти Его, то и воскресени будем • Сие ведяще яко ветхый нашъ человекъ с Нимъ распятся, дабы было изъпразнено тело греховное, да к тому не поработаемъ греху • Умрый бо греху, оправъдается от греха • Аще ли же умрохомъ со Христомъ, веруемъ яко живи будемъ с Нимъ • Ведуще иже Христосъ воста от мертвых, уже не умреть, смерть болей Ему не одолееть • Еже бо умре грехови, умеръ естъ единою а еже живеть, живъ ест Богови •

Тако и вы причитайте себе, мертвым убо быти греху, живым же Богови о Христе Ісусе Господи нашемъ •

Да не царствуеть же грехъ во смертелномъ теле вашемъ, ни послушайте похотей его, а ни выдавайте удовъ вашихъ во оружие неправости греху • Но представляйте себе Богови, яко от мертвых живи • И уды ваша выдайте во оружие справедливости Богу • И тако грехъ не будеть владети над вами, несте бо под законом, но под благодатию • И что жъ, тогда грешити будемъ яко несмы под закономъ, но под благодатию? Да не будемъ • Еда ли не вете сего, яко емуже представляете себе служити во послушаніи, того раби есте, егоже послушаете, или греха во смерть, или послушания во правду? Благодарите ж Бога, яко бывше раби греху, послушасте от серца, в онже предастеся образ учения •

Свобождьшеся от греха, поработистеся правде • Человеческо глаголю, для немощи плоти вашея • Якоже бо представясте уды ваша рабы нечистоте, и неправде во безаконие • Тако и ныне представте уды ваша рабы правде во святыню • Внегда бо раби бесте греху, свободни бысте от правды • И кой плодъ иместе тогда во тых, о нихже ныне стыдитеся? Конець убо онемъ смерть • Ныне же свобождьшеся от греха, и поработившеся Богови • Имате плодъ вашъ во святыню • А конець естъ животъ вечный • Оброци бо греха смерть, а дарование Божие жизнь вечная о Христе Ісусе Господе нашемъ •

Или не разумеете братия ведящим бо законъ глаголю • Яко законъ обладаеть человекомъ, поколе живъ ест? Ибо жена еже замужемъ, поколе ея мужъ живъ, привязана ест закономъ • Аще ли же умреть мужъ, развязуется от закона мужева • Для того доколе мужъ живъ, прелюбыдеица бываеть, естъ ли же прилучится мужеви иному • Аще ли же умрет мужъ свободна ест от закона, и не будеть прелюбыдеица, прилучена мужу иному • Такожъ и вы братия моя умертвистеся закону, теломъ Ісусъ Христовымъ, и прилучистеся мужу иному, иже изъ мертвыхъ Воставшу • Да плодъ принесем Богови • Егда бо бехом во плоти, похоти греховъ иже суть во удех нашихъ, закономъ действоваху • Плодъ принести смерти • Ныне же упразнихомся от закона смерти, имже держими бехом да послужимъ Богу во обновленіи духа • А не въ ветхости писания •

Что убо речемъ? Закон ли грехъ естъ? Да не будет • Но греха не разумехъ, точию законом • И похоти не ведехъ, абы зла была • Точию законъ глаголаше, не похощеши • Вину же приемъ грехъ заповедию, сдела во мне похот безъ закона убо грехъ мертвъ бе • Азъ же живяхъ кроме закона иногда • Пришедши заповеди, грехъ оживе, азъ же умрохъ • И обрете ми ся заповедь яже во живот сія во смерть • Грехъ бо вину приемъ заповедию прелсти мя, и тою умертви мя • И тако законъ святъ, и заповед свята, и праведна и добра • Доброе лі мне бысть смерть? Да не будеть • Но грехъ да явится грехъ, тым еже бе доброе, соделавая ми смерть дабы былъ вельми великимъ грехомъ для заповеди •

Вемы убо яко законъ духовен естъ, азъ же плотен есмъ, подданый греху • Еже бо съделаваю не разумею, не еже бо хощу сее творю, но еже ненавижу тое творю • Аще ли жъ еже не хощу сее творю, реку со законом яко добръ естъ • А ныне уже не азъ съделаваю тое, но жывый во мне грехъ • Вемъ бо яко не живеть во мне, то естъ во плоти моей доброе • Хотение бо прилежит ми к доброму, а еже соделати ми добро не обретаю • Не еже бо хощу чиню доброе • Но еже не хощу соделаваю злое • Аще ли ж егоже не хощу азъ, се чиню • Вже не азъ соделаваю е, но живый во мне грехъ • Знайдую же закон хотящу добро чинити добръ, но мне зло прилежит • Наслажаюся же законом Божиимъ, по внутреному человеку • Но вижу инъ законъ во удехъ моих, противу воюющъ закону ума моего • Пленящь мя въ закон греховны сущий во удехъ моих • Окааный азъ человекъ, кто мя избавит от тела смерти сее? Благодать Божия, Ісусъ Христом Господемъ нашим для тогож самъ я умом моимъ работаю закону Божию, плотию же закону греховну •

Несть же ныне какова осужения верующимъ во Христа Ісуса • И не по плоти ходящим, но по духу •

Закон бо духа жива во Христе Ісусе, свободи мя от закона греховнаго и смерти • Понеж еже бе немощно закону, и в чемъ изънемогаше для плотскихъ своих оправданией Богъ Своего Сына пославъ во подобіи плоти греха, и принес жертву о гресе • Осуди грехъ плотию Его • Да оправдание закона скончается в насъ, иже не по плоти ходимо, но по духу • Сущие бо по плоти плотская мудръствують, а иже по духу духовная • Мудрость убо плотская естъ смерть, а мудрость духовная животъ, и миръ • Занужъ мудрость плотская вражда на Бога ест, закону убо Божию не повинуется, а ниже можеть • И тіи иже во плоти суть, Богу угодити не могуть • Вы же несте во плоти, но въ дусе • Понеже Духъ Божій живеть во васъ • Аще ли Христосъ в васъ • Плоть убо мертва естъ греха деля, духъ же живъ правды ради • Аще бо Духъ воскресившего Ісуса от мертвых живеть в васъ • Воздвигый Христа изъ мертвых оживотворить и мертвыя телеса ваша, живущимъ духомъ Его во васъ • Сего деля братия должни есмо, не плоти • Еже по плоти жити • Аще бо по плоти начнете жити, умрете • Пак ли же духом дела плотская умеръщвяти будете, оживете •

Елици бо Духомъ Божиимъ водятся сие суть сынове Божіи • Не приясте бо духа работы, паки во боязнь • Но приясте Духъ въсыновения, о Немже зовемъ: Авва Отче • Самъ той же Духъ сведетелствуеть духови нашему, яко есмы чада Божия • Аще ли чада, то и наследници: наследници же Богу, и сонаследници Христу понеже с Нимъ страждемъ, да с Нимъ и прославимся • Вем бо иже недостойны суть страсти нынейшего времени, ко пріидущей славе, хотящей явитися в насъ • Ожидание убо твари, откровения сыномъ Божіимъ чаеть • Суете бо тварь повинися неволею • Но для того, онже повиновалъ ю во упованіи, яко и сама твар свободиться от работы истления, во свободу славы чадъ Божіихъ •

Вемы бо яко вся тварь с нами воздыхаеть, и соболезнуеть доныне • А не толико же тварь, но и тіи, они же начатокъ духа имають • И мы сами в собе воздыхаемъ, восынения чающе, и изъбавления телу нашему • Упованием бо спасохомся • Упование пак видимое, несть упование • Еже бо видить кто, что о том уповаеть? Но мы чего же не видимъ надеемся, и того с терпениемъ чаемъ • Такожде и Духъ с нами заступаеть немощи наше • И что жъ помолимся, якоже подобаеть, не вемы • Но той же Духъ учить насъ молитися воздыханіи неизъреченными • Испытатель же серца весть, что ест хотение Духа, яко Той предъ Богомъ проповедаеть о святыхъ •

Ібо вемы яко любящимъ Бога вся поспеваються къ доброму, тымъ ониже по прозрению возвани суть • Зане яже прежде разуме, прежде и нарече • Подобны образу Сына Своего • Дабы Онъ былъ первънець во мнозей братіи •

А еже прежде нарече, сия и призва • А ихъже призъва, сихъ и оправда • А ихъже оправда сихъ и прослави • Что убо речемъ к симъ? Естъ ли же Богъ будеть с нами, и кто противу насъ? Онъ теже Своего Единороднаго Сына не пощаде, но за всех насъ предал Его • И какожъ абы с Нимъ не даровалъ нам всих речей? И кто жаловати будеть на изъбранныя Божія? Еда ли Богъ оправдая е • И кто осужая их? Христосъ ли Ісусъ Онже умре за них • К тому и воскресе, и естъ одесную Бога, промолвяяся о насъ • Кто жъ насъ разлучить от любви Божия • Скорбь ли, или теснота, или гонение, или гладъ, или нагота, или беда, или мечь? Якоже ест писано: Тебе ради умерщъвляемы есмы весъ день, въменихомся яко овце заколения • Но сих всехъ премагаемъ за Возлюбившего насъ • Истъ есмъ того, яко ни смерть, ни живот, ни Ангели, ни Начала, ни Силы, ни настоящая, ни грящая, ни высота, ни глубина, ниже иная тварь кая • Возможеть насъ разлучити от любви Божия, еже естъ о Христе Ісусе Господе нашемъ •

Правду глаголю о Христе не лжу, сопослушествующей ми совести моей в Духу Святомъ • Яко скорбь мне ест велика, и непрестающа болезнь серцу моему, жадахъ бо самъ азъ на часъ отлученъ быти от Христа, для братии моей, и сродник моих по плоти, иже суть Ізраильтяне • Ихъже ест въсынение, и слава, и заветъ, и закону дание, и Богу служения, и обетования, ихъ отцеве от нихже Христосъ по плоти • Сый над всеми Богъ благославенъ во веки амин •

Не також да не отпадеть слово Божие, не вси бо сущие от Ізраиля, сие Израільтяне суть • А ни иже от семени Авраамова, вси чада Авраамля суть • Но о Исааце наречет ти ся семя • То естъ, не тии еже чада плотская, суть чада Божия • Но толико чада обетования причитаются въ семя • Обетования убо слово сицево ест: на се время пріиду к тобе, и будет у Сарры сынъ • А не точию сия, но и Ревекка от единаго ложа имела ест два сыны от Ісаака отца нашего • Не роженныма же еще детищем, ани что добро или зло вчинившима • Да по избранию преложение Божие будеть, не от делъ • Но от призывающего речено ест ей: болій поработаеть меньшему • Якоже пишеть: Іакова возлюбихъ, Ісава же возненавидехъ • Что жъ пак речемъ? Еда неправда ест от Бога? Никакоже, Моисеови бо глаголеть: помилую егоже восъхощу, и ущедрю егоже возлюблю • Темже убо ни хотящему, ни текущему • Но милующему Богу • Глаголеть бо Писание фараонови: яко на сее воздвигох тя, да покажу в тобе силу Мою, и да возвестится по всей земли слава Моя •

Сего ради, егоже хощет Богъ милуеть, а егоже не хощеть затвержаеть • Речеши ли ми: почтож и пытатися о добром воли бо Его кто спротивится? О человече ты пакъ кто еси отвещаваяй противу Бога? Еда можеть речи здание создавшему: и почто мя сотворил тако? Чили не имаеть власти горнъчаръ во глине, от тогоже смешения вчинити, сей въ честь сосудъ овъже не в честь? Что ж пакъ Богъ аще хотяй показати гневъ свой, и явити силу свою, снашаеть во мнозе долготерпении сосуды гнева совершены въ погибель • И да объявить богатество славы своея на сосудехъ милости, еже уготова во славу • Ихже и призва • А не толико насъ от Іудеи, но и от языкъ? Якоже Іосей глаголеть: назову людей не Моих, людие Мое • И не возлюбленных, возлюбленные • И будеть: на месте идеже речено ест не людие Мое есте вы, ту нарекутся сынове Бога жива • Ісаія же вопиеть о Ізраили: аще будеть число сыновъ Ізраилевъ яко песок морски, останкове спасени будуть, слова бо скончавая, и укрощая во правде • Яко слово сокращено сотвори Господь на земли • И якоже прорече Ісаія: аще не бы Господь Силамъ оставилъ намъ семени • Яко Содомъ убо были быхомъ, и къ Гомору уподобилися быхомъ • И что ж речемъ? Се языци не наследующие правды, постигоша правду • Правду же иже от веры • Людие пакъ Ізраилевы держаще законъ правды, не постигоша правды • А чему? Занеже не от веры, но от делъ закона искаша ея • Преткошеся бо о камень претыкания • Якоже пишет: се полагаю во Сионе камен претыканию, и камен соблазну • И всяк веруяй нань не постыдится •

Братия жадание моего серца, и молитва яже ко Богу о Ізраили ест ко спасению • Сведетелствую бо имъ яко ревность Божию имають, но не по разуму • Не ведяще бо Божией правды, и свою правду ищуще постановити, правде Божій не повинишеся • Конець убо закону ест Христосъ, во правду всякому верующему • Моисей убо пишеть: всякий человекъ чиняй правду еже ест от закона, жити будет в ней • А о той правде еже от веры ест сице глаголеть: да не речеши во серци своемъ, кто возыде на небо, сиречь Христа звести • Или: кто сниде во бездну, сиреч Христа от мертвых возвести • Но что речеть? Близко тебе ест слово во встех твоих, и во серци твоемъ, сиреч слово веры еже проповедуем • Яко аще исповеси усты своіми Господа Ісуса, и веруеши во серци своемъ, яко Богъ Того воздвиже от мертвых, спасешися • Серцем бо веруется во правду, усты же исповедуется во спасение •

Глаголеть бо Писание: всякъ веруяй в Онь не постыдится • Несть убо разнъствия, Іудееви же и Еллінови • Той бо ест Господь всемъ, богатя всехъ призывающих Его • Всякъ бо онъже призоветь имя Господьне спасется • Но како призывати будуть имя Того, в Негоже не вероваша? Или како вверять в Онь, о Немже не слышаша? И како услышать без проповедателя? Како ж проповедят, аще не послани будут? Якоже ест писано: се коль красны ногы благовестующих миръ, и возвещающих добрая • Но не вси послушаша благовествования, Исаія убо глаголеть: Господи кто верова слышанию нашему? Темже убо вера от слышанія ест • А слышание от слова Божия • Но глаголю еда ли не слышали, яко во всю землю изыде вещание их, и в конца вселенныя глаголы их • Се же реку: чили не разумеша людие Ізраильлевы? Первый Моисей глагола имъ: азъ раздражню васъ въ тых иже не суть людие, и во языце неразумне прогневлю васъ • Ісаія же по семъ смеле глаголеть: обретохся не ищущимъ Мене, и явленъ быхъ не пытающимся о Мне • Ко Ізраилю же вопиеть: вес ден возтягнухъ руце Мое, ко людемъ противъляющимъ Ми ся, и пререкающимъ Мне •

Глаголю убо: еда ли отринулъ Богъ люди Своя? Николиже • Ибо и азъ Ізраильтянин есмъ, от семени Авраамля с племеня Веньяминова • Не отринулъ Богъ людей Своих, ихъже прежде и сведалъ • Господи пророки Твоя изъбиша, и олтаря Твоя раскопаша, и азъ остахъ единъ, и ищуть души моея • Но что глаголеть ему отвещание Божие? Оставих Собе седмъ тысещ мужевъ, ониже не поклонишеся на колена своя предъ кумиром Ваалем • Такожъ убо и во нынешнее время останкове, по избранной благодати Божией спасени будуть • Аще ли благодатию Божию, то вже не от дел • Иначей бо благодать уже не была бы благодать • Пак ли же от делъ, то не от благодати • Иначей дело уже не было бы делом •

Что ж убо, чего искаша людие Ізраилевы, того не получиша • А избранніи получиша, прочіи же окаменеша • Якоже пишеть: иже далъ имъ Богъ духа сокрушения, очи невидения, уши неслышания,  даже и до днешнего дня • И Давыдъ глаголеть: да будеть трапеза их во сеть, и во осиление, и въ соблазнъ, и въ воздание имъ • Помрачатся очи их да не видять, и хребетъ их всегда склони • Глаголю бо: еда тако согрешили Іудеи да падуть? Да не будеть, но тых падениемъ спасение бысть языкомъ, дабы раздражнилъ е • Аще ли же прегрешение их, богатество мира ест • И отпадение их богатество языком, кольми паче исполнение их •

Вамъ глаголю языком: понеже убо есмъ азъ языкомъ Апостолъ • Службу мою прославляю, аще како раздражню плоть свою, и ко спасению приведу некия от них? Аще убо отложение их примирение мира • Что приятие, разве животъ от мертвых? Понеже аще начаток жертвы святъ ест, то и примешение • Аще корень святъ, то и ветвие, хотя некое ветвие отломися • Ты пакъ дивія маслина будучи, въщепен еси в них, и сопричастился есь корению маслины, и тучности ея • Не хвалися ж над ветви, аще ли хвалишися, не ты корень носиш, но корень тебе • Речеши убо: отломишеся ветви, да азъ причащуся • Добре глаголеши: невериемъ отломишеся, ты же верою стоиши • Не высоко помышляй, но бойся • Понеже ест ли Богъ прироженых ветвей не пощаде, еда како и тебе не пощадит • Видь же благость Божию, и грозность Его • На отпадших убо отсечение, а на тебе благодать, ест ли же самъ пребудеши во добрости • Аще ли же ни, то и ты отсечен будеши • А они ест ли не пребудут в неверіи своемъ, вщеплени будут • Силенъ бо ест Богъ паки вщепити их • Понеже аще ты отрезаный с прирожения от дивія маслины, и надъ прирожение вщепленъ есь в добрую маслину • Многым болей сие ониже с прироженья суть ветви, ущеплени будут у свою маслину •

Не хощу бо васъ не ведети тайны сея братия, да не будете сами в собе мудри яко неведение от части людем Ізраилевым пригодилося ест • Дондеже исполнение языком пріидет, и тако весь Ізраиль спасется якоже пишеть: пріиде от Сиона избавляя и • И отвратит нечестие от Іакова, и сее имъ от Мене в завет будеть, еда отиму грехи их • По благовествованию убо врази вас ради • По избранию же возлюблени, отець ради • Нераскаяны бо суть дарования, и избрания Божія • Якоже и вы иногда противистеся Богови, а ныне противлениемъ сихъ помиловани бысте • Тако и сие спротивятся вашему помилованию, да и они помиловани будут • Затвори убо Богъ всех во противленіи, да всехъ помилуеть •

О глубина богатества, и премудрости, и разума Божия • Яко неиспытанны судове Его, и неизследованы пути Его • Кто бо разуме умъ Господень, и кто советникъ Ему бысть, или кто прежде дасть Ему, и воздасться тому? Яко и с Того, и Темъ, и в Того вся • Тому слава во веки векомъ аминь •

Молю же васъ братия для милосердией Божиих, представте телеса ваша, жертву живу, святу, приятну Богу • Разумно да будет служение ваше • И не сообразуйтеся веку сему, но преобразуйтеся обновлениемъ ума вашего, искушати вам что ест воля Божия благоугодная и совершеная • Глаголю убо милостию даною мне, всякому живущему в васъ: да не более о собе смышляете, над то еже подобает смышляти • Но смышляйте во целомудріи каждый якоже Богъ разделил естъ вам меру веры •

Яко бо во единомъ телеси уды многы имамы, уды же вси не тожде имут деание • Тако и мнози едино тело есмы о Христе, а по единому другъ другу уди • Імущи пак дарованія разная, по благодати даной намъ: аще пророчество, по равенству веры • Аще служение, во послуженіи • Аще ли учай, во навченіи • Аще утешая, во втешеніи • Подавая во простоте владеяй с пилностию, милуяй с тихостию • Любяй нелицемерне • Укланяющеся от злого, придержающеся доброго • Ласку братскую къ собе имейте, другъ друга преды честуйте • Во справованіи лениви не будте, духом горящи, Господу работающи • Упованиемъ радующеся • Скорби терпяще, во молитве пребывающе • Во требованіи святых спомагающе, страннолюбіе приимающе • Благославите гонящих васъ, доброречите а не клените • Радуйтеся с радующими, и плачьтеся с плачущими • Единодушно другъ о друзе помышляйте, не высокая мудръствующе, но смиреная сведяще • Не бывайте мудри сами в собе • Ни единому зла за зло воздавайте, разумне чинте доброе предъ всеми человеки • И аще возможно ест от васъ со всеми людми миръ имейте • Не отмъщайте сами себе, возлюбленіи, но дадите место гневу • Писано бо ест: Мне отмьщение и Азъ воздамъ глаголеть Господь • Аще ли алчеть врагъ твой накорми его, аще ли жаждеть напой его • Сие бо чиняй углие огняно собіраеши на главу ему • Не бывай побежен от злаго, но побежай добрымъ злое •

Всяка душа властелем обладающимъ да повинуется • Несть бо власти аще не от Бога • И еже суть от Бога, повелениемъ Его учинена суть • Темже противляяся власти, Божию повелению противляется • И кто противится тому, судъ пріимет • Князи бо не суть в боязнь добро делающим, но злое • Хощеши ли же не боятися власти, доброе чини • И будеши мети похвалу от нея • Божій убо слуга ест тобе к доброму • Пак ли же зло твориши, бойся • Не дармо убо мечь носит Божій слуга ест, тобе отмъститель во гневе зло творящему • Прото мусите повиноватіся имъ • Не толико для гневу, но и для совести • Сего ради дани давайте, служітели убо Божіи суть, за тое Ему служаще • Воздадите ж всем долгы: емуже урокъ, урок • Емуже дань, дань • Емуже страхъ, страхъ • Емуже честь, честь • Ни единому ж чимъ должни будете, толико другъ друга любите • Любяй бо друга своего, законъ наполнилъ ест • Еже бо не прелюбы сотвориши, не убиеши, не украдеши, не лжисвидетельствуеши, чуждего не похощеши • А ест ли и иная кая заповед, в сем слове совершается: возлюбиши ближнего своего яко сам ся, любяй ближнего зла не соделовает • Наполнение убо закону любовь • И сие ведуще время, часъ нам ест уже от сна востати • Нощъ проиде, а день приближися: отверзем же дела тмы, и облечемся во оружие света, яко во дні почтиве ходим, не во обыядени, ні во опианіи, не во любодеани, ні во стыдодеани, не во свару ни во зависти • Но облецете Господа Ісуса Христа • И плоти угодия не творите в похоти •

Ізнемогающего пак в вере приемлите, не осужающи мышления его, некій убо верует иже может ясти вся • А изнемогая зелие да ясть • Ядый неядущего да не укаряеть, и неядый ядущего да не осужает • Богъ бо его к вере приялъ, ты же кто еси судяй чуждего раба, Своему Господину стоить или падаеть, станет же, силенъ бо ест Богъ поставити и • Некій же розсужает день от дня, а некій судит всяк день заровно • Единый каждый своею мыслию извещается •

Мудрствуя о дни Господеви мудрствуеть, и немудрствуя о дни Господеви не мудрствуеть • Ядый Господеви ясть, и благодарит Бога и неядый Господеви не ясть, и благодарит Бога • Никтоже бо з насъ собе живеть, или собе умирает • Аще бо живем Господеви живем, аще умираемъ Господеви умираемъ • И тако живемы ли, мремы ли Господьни есмо •

Для того бо Христосъ умре, и воскресе, и живе • Да мертвыми и живыми обладаеть • Ты же почто осужаеш брата своего, или и ты укаряешъ брату своему? Вси убо предстанем судищу Христову • Писано бо ест: живу Азъ глаголеть Господь, Мне поклонится всяко колено, и всякъ язык исповесться Богу • Темже убо кажды з нас сам о собе ответъ дасть Богови • Сего деля не осужаймы к тому другъ друга, но более разсужаймы еже не полагати намъ претыкания брату, или соблазна • Вемъ убо и препираюся о Господи Ісусе, яко ничтоже скверно ест само в собе • Толико помышляющему что скверно быти, оному скверно ест • Аще ли ж брашна ради, брат твой скорбит уже не по любви ходиш • Не погубляй брашном своимъ того, за негоже Христосъ умре, да не похулится ваше доброе • Несть бо Царствіе Божие брашно и питие, но правда, миръ и радость в Дусе Святе • Сими бо служа Христови любится Богу, и похвален ест от человек •

А тако еже сут мирная, наследуймы и еже ко навчению другъ друга, не разаряймы брашна ради дела Божия • Вся бо чиста сут, но зло ест человеку с погрешеніемъ ядущему • Добро не асти мяса, ни пити вина, ани того о немже брат твой погоршается, или соблазняется, или изнемогает • Ты веру имаеши? В собе самъ имей ю пред Богом • Благославенъ иже не осужает себе в томъ еже укушаеть • А кто сумняяся о брашне, аще ясть • Осужается яко не яде от веры • Все бо еже несть от веры, грехъ ест •

Могущему же вас утвердити по благовестьвованию моему, и проповеданию Ісусъ Христа, по откровению тайны, леты вечными молъчаное, явльшее ныне Писанми пророчскими, по повелению вечнаго Бога, во послушание веры во всех языцех познаной • Единому премудрому Богу, Ісусъ Христомъ • Емуже слава во веки аминь •

Должни есмо мы силніи, несилных немощи носити • И не собе угожати • Но каждый ближнему да угожаеть в добромъ к направлению его • Ибо и Христосъ не собе угоди • Но якоже пишет: поношенія поносящих Тебе нападоша на Мя • Елика бо прежде пісана быша к нашему навчению, написана сут • Да терпениемъ, и втешениемъ писмъ, надежу имамы • Богъ же терпенія, и втешенія дасть нам тожде мудрствовати о Христе Ісусе • Да единодушно и едиными усты прославимъ Бога, и Отца Господа нашего Ісуса Христа •

Сего ради приемлите другъ друга, якоже и Христосъ принял вас во славу Божию • Глаголю же Христа Ісуса служителя быти обрезанию, для правды Божией, дабы наполнил обетования отцев • Языци пак для милосердия Его имають прославити Бога • Якоже ест писано: сего ради исповемся Тобе во языцехъ Господи, и имени Твоему пою • И паки глаголеть: возвеселитеся языци с людми Его • И паки: хвалите Господа вси языци, и похвалите Его вси людие  • И опят Ісаія глаголеть: будет корень Іесеовъ иже востанеть владети языки, и на Того языци уповати имут  • Богъ же упования исполнит вас всякия радости, и мира во вере, да розмножитеся во упованіи силою Духа Святого • Истъ есмъ братия моя и самъ азъ о вас, яко и вы сами полни есте доброты, наполнени всякого разума, могуще и иныхъ навчити • Сего ради смеле писахъ вам братия моя и кратце, якобы упоминая васъ для благодати даное мне от Бога, в томъ абых был служитель Ісусъ Христу во языцех, проповедая Еивангелие Божие • Да будет приношение от языкъ приято, и освещено въ Духу Святомъ •

Імам ныне похвалу о Христе Ісусе въ тых, еже ко Богу, не смею убо глаголати, чего бы не содеял мною Христосъ во послушаніе языком, словом и делом • В моци знамен и чудес, силою Духа Божия • Тако иже от Ерусалима и по околных странах, даже до Ильлирикійскаго моря наполних благовествования Христова • Тамо пак проповедахъ Еивангелие, идеже не именовася Христосъ • Да не на чуждемъ основаніи зижду • Но яко писано ест: имже не возвестися, о Нем узрят, и еже не слышаша поразумеють • Сего деля замешкахся много пріити к вамъ • Ныне ж места вже не имея во странах сих • Желание пак имаю пріити к вамъ • Аще ли же поіду во Испанию зайду к вам • Уповаю бо мимо идя видети васъ, и вами провожен быти тамо, но прежде насыщуся с вашего товариства • Ныне же гряду во Ерусалим во служение святым • Умыслиша бо Макидоняне, и Ахаіане собрание некое учинити на споможение нищим святым иже во Ерусалиме • Благоволиша же, и должни имъ суть • Аще бо духовнымъ их причастишеся языци, то должни и во плотских послужити имъ • Сее же скончавъ, и подав имъ милостыню сию, пойду чрез вас во Испанию • Вем бо иже внегда прииду к вамъ, во исполненіи благославения Еивангелия Христова пріиду •

Молю же васъ братия для Господа нашего Ісуса Христа, и для ласки духовное, поможите ми поспешествуему во молитвах своих, о мне молящеся къ Богу • Да избавлюся от противляющихся вере Христове во Іудеи • И да служба моя, еже во Ерусалиме приятна будет святым • Да с радостию пріиду к вам и волею Божию упокоюся с вами • Богъ же мира да будетьсо всеми вами аминь •

Представляю же вамъ Фивию сестру нашу, онаже ест служительница хрестианом иже во Кенхрехъ • Да приимете ю о Господе, якоже достойно ест святым • И станете пред нею, в чемъ кольве потребовати васъ будеть • Ибо и сия заступница многым бысть, и самому мне • Целуйте Прискилу, и Акилу • Поспешники мое о Христе Ісусе, ониже за душу мою животы своя положиша, ихъже не азъ един благодарю, но и вся церкви язычьская, и все собрание их домашнее • Целуйте Епенета возлюбленнаго мне • Онъже ест начатокъ во Ахаіи верующимъ во Христа • Целуйте Мариамъ, еже много трудилася ест межи нами • Целуйте Андроника, и Іунию, сродники, и сопосланники моя, ониже суть нарочиты во Апостолехъ, иже и прежде мене ввериша во Христа • Целуйте Амплия возлюбленнаго мне о Господе • Целуйте Урвана помощника нашего о Христе • И Стахия возлюбленнаго моего • Целуйте Амъпелаа искушеннаго о Христе • Целуйте тыхъ еже суть от рода Аристовулева • Целуйте Іеродиона сродника моего • Целуйте сущих от Наркисса, истинныя о Христе • Целуйте Трифену, и Трифосу, трудившияся о Господе • Целуйте Персиду возлюбленную, онаже много попечеся о Христе • Целуйте Руфа выбраного о Господи, и матерь его и мою • Целуйте Асинкрита, Флегонта, Ермана, Патрова, Еръмия, и иже с ними братию • Целуйте Филолога, и Іулию, Нирея, и сестру его, и Олимбана, и еже с ними вся святыя • Целуйте себе лобзаниемъ святым • Целует васъ вся церкви Христовы •

Молю же васъ братия блюстися от тых ониже распря, и соблазны чинять окроме того учения, емуже вы навчистеся, и уклоняйтеся от нихъ • Таковіи убо Господу нашему Ісусъ Христу не работають, но своему чреву • И сладкими словы и похлебными льстять серца простых • Ваше бо послушание на каждомъ месте разглъшено ест, темже и радуюся о вас • Хощу же вас да будете мудри к доброму, и кротци ко злому • Богъ пакъ мира да сокрушить сатану под нозе ваше • И ласка Господа нашего Ісус Христа, да пребудеть со всеми вами •

Целують васъ Тимофей споспешникъ мой и Лукиа, и Асонъ, и Сосипатръ сродникъ мой • Целую васъ Терентіе • Написавый послание сее о Господи • Целуеть вас Гаие странноприимець мой, и всехъ приходящих от церкви • Целуеть васъ Ерастъ строитель градскій • И Кувартъ братъ • Благодать Господа нашего Ісуса Христа со всеми вами аминь •