1 Коринфомъ

Павел званъ посланникъ Ісусъ Христовъ волею Божею, и Состен брат • Церкви Божией сущей во Коринфе освещенным о Христе Ісусе, званым святым, со всеми призывающими имя Господа нашего Ісуса Христа на всякомъ месте • Темже, и вамъ братия • Благодать и миръ от Бога Отца нашего, и Господа Ісуса Христа • Прославляю Бога моего всегда о васъ, о благодати Божией даной вамъ во Христе Ісусе • Яко во всемъ обогатистеся о Немъ • Во всяцемъ слове, и во всякомъ разуме • И тако сведетелство Христово известися в васъ • Якоже вамъ не лишитися ни единого дарования • Чающим явления Господа нашего Ісуса Христа • Онъже утвердить васъ дажъ до конца, во день Господа нашего Ісуса Христа • Веренъ Богъ, Имъже звани бысте во общение Сына Его Ісуса Христа Господа нашего •

Молю же васъ братия именем Господа нашего Ісуса Христа • Да тожде говорите вси • И да небудет межи вами розделения, но будте совершени во единостайной мысли и въ том же нраве • Поведено бо ми ест о васъ братия моя от приставникъ, яко сварове суть межи вами • А се глаголю для того иже кажды в васъ говорит: азъ убо есмъ Павлов • Азъ же Аполосов • И азъ Кифин, азъ пакъ Христовъ • Еда ли разделися Христосъ? Еда Павелъ распятся за васъ, или во имя Павле крестистеся? Благодарю Бога, яко ни единого от васъ крестихъ, толико Криспа, и Гаія • Да некто речеть, яко во имя мое крестихъ и • Крестих же и Стефановъ домъ, более не вемъ ест ли же кого иного крестихъ • Не посла убо мя Христосъ крестити, но благовестити • Не во мудрости словъ, да не изъпразнится Крестъ Христовъ •

Слово же крестное, погыбающимъ убо юродьство ест, спасающим же ся нам сила Божия • Писано бо естъ: погублю премудрость премудрых, и отвергу разумность разумных • Где премудръ? Где книжникъ? И где совопросникъ века сего? Не обезуми ли Богъ премудрость мира сего? Понеже егда во премудрости Божией не разуме миръ премудростию Бога • Изълюбилося Богу буйствомъ проповедания, спасти верующих • Іудеи убо знамения просять • И Еллини премудрости ищуть • Мы же проповедаемъ Христа распята • Іудеомъ бо соблазнъ, Еллином безумие • Самем же званным Іудеомъ, и Еллиномъ: Христа Божую силу, и Божию премудрость • Занеже буие Божие премудрее человекъ ест • И немощное Божие крепчайше человекъ ест •

Видите убо звание ваше братия, яко не мнози премудри по плоти, не мнози силни, не мнози доброродни • Но спросная сего мира изъбра Богъ, да посрамит премудрая • И еже беша несилная в мире изъбра Богъ, да посрамить крепкая • И недоброродная, и заверженая изъбра Богъ, и не сущая, да сущая выпразнить • Яко да не похвалится всяка плоть пред Богом • Из Негоже вы есте о Христе Ісусе • И Той бысть намъ премудрость от Бога, и правда, и освещение, и избавление • Да якоже пишеть: хваляйся о Господи да хвалится •

И азъ пришедый къ вамъ братия, не придохъ во высокоумне словеси, или премудрости • Возвещая вамъ сведетелство Божие • Ни судих же себе что ведети посреди васъ, толико Ісуса Христа, и Сего распята • И пребых у васъ в немощи, и въ страсе, и въ трепете мнозе • И слово мое, и проповедь моя бе, не во препирателных человеческия мудрости словех, но во явленіи духа и силы • Да вера ваша не во мудрости человечестей будет, но в силе Божией •

Премудрость же глаголемъ во совершеных, и премудрость не века сего • Ни князей мира сего престающих • Но глаголемъ Божію премудрость во тайне сокровенну, юже пронарече Богъ прежде векъ во славу нашу • Еяже князи века сего не разумели никтоже, аще бо были разумели, не быша Господа славе распяли • Но якоже естъ писано: Нам же открил естъ Богъ Духомъ Своимъ • Духъ бо вся испытуеть, к тому и глубины Божия • Кто убо весть от человекъ, яже суть во человеце? Толико духъ человечій иже ест в немъ • Такожъ и тая яже суть Божия никтоже весть, точию Духъ Божій • Мы пакъ не духъ мира приахом, но духъ иже от Бога • Да знаемъ яже суть от Бога дарованая намъ • О нихже и глаголемъ, не во навченіи человеческое премудрости словехъ, но во навченіи Духа Свята • Духовнымъ людем духовная подавающе • Телесный убо человек не приемлет тых яже суть от Духа Божия • Юродство бо ему ест, и не можеть разумети того еже духовне разсужается • Духовный пакъ разсужаеть вся, и сам ни от единого осуженъ бываеть • Кто убо разуме умъ Господень, или кто навчить и? Мы же умъ Христовъ имамы •

І азъ братия не могохъ вамъ глаголати яко духовнымъ, но яко плотным и яко младеньцем о Христе млеком васъ напоих, а не брашномъ • Не вже бо можасте • Но еще и ныне не можете, яко плотни есте • Понеже в васъ ест зависть, сваръ и распря • Не плотни ли есте и по человечеству ходите? Еда бо глаголеть кто: азъ есмъ Павловъ • А другый: азъ Аполосовъ, чили не плотни есте? Кто убо ест Павелъ? И кто же Аполосъ? Толико служителие имиже веровасте, и каждому якоже Господь далъ ест • Азъ насадилъ, Аполосъ напоилъ, но Богъ возрастилъ • Темже ни насажаяй ест что, ни напояй • Но возращаяй Богъ • Насадивый же и напоивый едино еста, каждый пакъ свою мзду прииметь, по своему тружанию •

Божіи убо поспешници есмы • Вы же Божие стяжание, Божие ставление есте • Азъ по благодати Божией даной мне яко мудрый ставитель, основание положихъ • Иный же на томъ зиждеть, но единый каждый да блюдеть како назидаеть • Основания бо иного никтоже можеть положити, кроме лежащего еже ест Ісусъ Христосъ • Аще ли же кто сооружаеть на основаніи семъ злато, сребро, камение драгое, дрова, сено, тростие • Каждого дело явлено будеть • День убо Господень явить, еже огънемъ откриется • И единого каждого дело яково ест огнь е искусить • Останеть ли чие дело еже содела, мзъду пріиметь • Згорить ли чие дело, дщету терпети будеть • А самъ спасется, но такъ якобы огнемъ •

Не весте ли яко храмъ Божій есте • И Духъ Божій пребываеть в васъ? Естъ ли же кто храмъ Божій посквернить погубит сего Богъ • Храмъ убо Божій святъ естъ, еже есте вы •

Никтоже самъ себе да не прельщаеть, аще кто мнит ся мудръ быти в васъ во веце семъ • Буди жъ глупъ, дабы былъ мудрымъ • Мудрость убо света сего, глупость естъ предъ Богомъ • Писано бо ест: поемляй мудрыя въ хитрости их • И паки: Господь весть помышления мудрых, яко сут суетна • Темже да не хвалится кто людми, вси бо ваши суть: аще Павелъ, аще Аполосъ, аще Кифа • Аще ли миръ, аще животъ, аще смерть, аще настоящая, аще будущая • Вся ваша суть, вы же Христовы, Христосъ же Божий •

Тако насъ да мнить человекъ, яко слугы Христовы • И строители тайнамъ Божиимъ • А чего жъ к тому ищете во строителехъ • Да веренъ кто знайдется • Мне ж сее не в велико ест, да от вас осужаюся • Или от человеческаго разуму, но и самъ себе не осужаю, ничего бо о собе свемъ, а ни от сего оправдаюся • Осужая бо мене Господь естъ •

Темже прежде времене ничтожь судите, донеле придеть Господь • Онже просветить тмы тайныя, и явить советы сердечныя • И тогда похвала будеть каждому от Бога •

Сия же братия преобразихъ на себе, и на Аполоса васъ деля • Да от наю навчитеся, не более мудрствовати написаных, да не единъ именемъ единого, а другый именемъ другаго, гордится на друга • Что убо разсужаеши, или что имаши егоже не приалъ есь? Аще ли приалъ еси, что ж хвалишися, яко не приемъ? Се вже насыщени есте, и се обогачени есте • Без нас царствавасте, и Боже дай вам еще царствовати, да и мы с вами воцаримся •

Мню бо яко Богъ насъ Апостолы последние яви яко на смерть преданые • Понеже в позоръ быхомъ мирови, и ангеломъ, и человекомъ • Мы юродиви Христа ради, вы мудри о Христе • Мы немощни, вы силни • Вы же и славни, мы безчестьни • До нынешнего часа, и алчемъ, и жаждемъ, и наготу терпимъ • И страждемъ, и скитаемся • И тружаемся, делающе своими руками • Злоречать намъ, а мы благославимъ • Изъгоняють насъ, а мы терпимъ • Ругаются з нас а мы ся молимъ • Яко отруби сего мира вчинены есмо, всемъ попрание даже и до сего дня • Не срамляя васъ пишу сия, но яко чада своя возлюбленная наказуя • Аще ли тму пестуновъ имате о Христе, но не многы отца • Во Христе бо Ісусе благовествованиемъ азъ вы родих • Темже и молю васъ: подобни мне бывайте •

Сего ради послахъ вамъ Тімофея, онже естъ сынъ мой возлюбленный и верный о Господи • Той вамъ воспомянеть пути моя яже о Христе Ісусе • Яко и везде во всякой церкви учю • Яко бых вже не имелъ к вамъ пріити более, тако разгордеша неціи • Пріиду же скоро к вамъ, естъ ли Господь въсхощеть • И поразумею не толико слова разгордевших, но и силу • Не во словехъ убо Царствие Божие но в силе • Что хощете? С палицею ли имамъ пріити к вамъ, чили с любовию и с духомъ кротости?

Отнудь, слышится в васъ любодеание, и таковое любодеание, яковожъ ни въ поганехъ именуеться • Иже един з васъ жену отца своего имееть • И вы разгордели есте, и того не лютуете • Да изъженется от среды васъ, соделавый дело сее • Азъ убо отдаленъ от васъ теломъ, приближен же духомъ вже осудилъ • Яко бых с вами былъ: вделавшего сее, собравшимся вамъ во имя Господа нашего Ісуса Христа, и с моимъ духомъ, и съ силою Господа нашего Ісуса Христа, предати таковаго сатане • Мучити плоть его, да духъ спасется во ден Господа нашего Ісуса •

Недобра похвала ваша не весте ли яко малъ квасъ все вмешение квасить? Очистьте убо ветхый квасъ, да будете новое вмешение, якоже есте безквасни, ибо Пасха наша за насъ жренъ бысть Христосъ • Сего деля да празнуемъ не во квасе ветсе, ни во квасе злости, и неправды • Но во безквасіи чистоты, и истинны •

Писахъ вамъ во посланіи, не примешатися любодейцамъ мира сего, и лихоімъцем, и хищником, и идолослужителем • Понеже должни есте от мира сего изыіти • И ныне пишу к вамъ: не примешаітеся, аще ли же будет межи вами некій иже братъ именуется, блудникъ, или лихоимець, или идолослужитель, или ругатель, или пианица, или хыщникъ, с таковымъ ани ежте • Что убо ми ест до тых ониже суть чуждіи судити их? Не домашнихъ ли судите? Чуждихъ же Богъ да судить • Но вы изыймите толико злаго от васъ самихъ •

И почто некто з васъ имея прю со инымъ смееть судитися пред неправедными а не пред святыми? Еда ли не вете, яко святые судити будут мирови? И аще вами судитися будет миръ, то како недостойни есте судищемъ худым? Не весте ли яко ангелом судимъ, не точию житейскимъ? Житейская убо судища аще имате • Уничиженых во церкви сихъ посажайте • Ко сраму вамъ глаголю: еда ли ни единъ въ васъ несть премудръ, онъже бы могъ разсудити между братіи своея? Но братъ съ братом судится, а то пред неверными • Се бо воистинну неправда ест в васъ, яко тяжбы имате между собою • Почто раднее обиды не претерпите? И почто более дщеты не приемлете? Но вы обидите, и дщету чините, а то братіи своей • Чилі не весте яко несправедливіи Царствия Божия не наследять? Не льститеся ж: ни блудници, ни идолослужители, ни прелюбодеи, ни телосквернители, ни мужеложници, ни лихоимци, ни татие, ни пианици, ни злолаіци, ни хыщници, Царствия Божия не наследять • Такови ж прежде и вы бесте • Но вже омыстеся, вже осветистеся, и вже оправдистеся именем Господа Ісуса Христа, и Духом Бога нашего •

Вся ми прислушать, но не вся на пользу • Во всемъ мне воля ест, но не хощу всему подданъ быти • Брашно поддано ест чреву, и чрево брашну • Богъ же и брашно, и чрево упразнить • Тело пакъ не имать дано быти любодеанию, но Господеви • И Господь телу • Богъ же и Господа воздвиже, и нас воздвигнеть силою Своею • Не весте ли яко тела ваша уды Христови суть? И что же воземши ли уды Христовы, вчинимъ с них уды любодейца? Да не будеть • Еда ли не весте сего, яко прилепляяся любодеици, едино тело бываеть с нею? Якоже пишет: будета два по плоті единой • А прилепляяся Господеви един духъ ест • Бегайте любодеания, всяк бо грех еже творит человек кроме тела ест, а чиняй блудъ во свое тело согрешаеть • Или не весте яко телеса ваша храмъ Духу Святому иже в васъ естъ, Егоже имате от Бога • И несте сами свои? куплены бо есте ценою великою • Прославьте жъ Бога во теле вашемъ • И во дусе вашемъ, яже суть Божия •

О томъ пакъ еже писасте ми, сице отповедаю • Добро ест человеку жене не прилеплятися • Любодеания же деля единый каждый свою жену жа имать • И едина кажда жена своего мужа да имать • Жене мужъ должную любовь да воздасть • Такожъ и жена мужу • Жена своимъ теломъ не владееть, но мужъ • Такожде и мужъ своимъ теломъ не владееть, но жена • Не лишайте другъ друга, толико с довзволениемъ ко времени, да празнуете въ посте, и въ молитве • И паки вкупу собирайтеся • Да не искусить васъ сатана, для невоздржания вашего • Сия же глаголю по совету, а не по повелению • Хотелъ бых дабы вси человеци были, яко азъ • Но каждый свое дарование имать от Бога: единый тако, а иный инако • Поведаю же неженатымъ, и вдовцемъ: добро имъ естъ аще пребудуть якоже и азъ • Естъ ли же не воздержатся, да понимають • Лепей бо ест женитися, нежели разжигатися • А оженивъшимся заповедаю • Не азъ, но Господь: жене от мужа не разлучатися, пак ли же разлучится, да пребывает без мужа, или с мужемъ да смирится • И мужу жены не опущати • Иным же азъ глаголю, не Господь: И жена естъ ли же имать мужа неверна • И той призволить жити с нею, да не опущаеть его • Святить бо ся мужъ неверный о жене верне • И святится жена неверна о мужи верне • Иначей убо чада ваша нечисти были бъ, а ныне святи суть • Пакъ ли же неверный восхощет отлучитися да отлучится • И не приневолится братъ или сестра въ таковых речахъ, в мире убо призва нас Господь Богъ • Что ты веси жено, аще мужа спасеши? Или что ты веси мужу аще жену спасеши? Но точию каждому якоже Богъ раздели, и каждого якож призва Господь, тако да ходіть • И тако во всехъ церквах повелеваю • Во обрезаніи кто призванъ бысть, да не отторгнется • В необрезаніи кто призван бысть да не обрезуется • Обрезание ничто ест • И необрезание ничтоже ест, но соблюдение заповедей Божиих • Единый каждый во званіи в немже званъ бысть, в том да пребываеть • Рабъ призванъ бысь да не дбаеши о томъ • Но аще можешъ свободенъ быти более делай • О Господе бо призваный рабъ, свободник Господень ест • Також и свободъ призваный къ Господу, рабъ Христовъ ест • Ценою куплени есте, не будите раби человекомъ •

Каждый в немже призванъ ест братие в томъ да пребываеть предъ Богом • О девицах же приказания Господьня не имамъ, но советъ даю, яко помилованый от Господа да веренъ буду Ему • Мню убо сее потребно быти за настоящую нужду • Яко добро ест человеку тако быти • Привязаеши ли ся жене, не ищи разрешения • Отрешаеши ли ся от жены, не ищи жъ жены • Поимеш ли жену не согрешилъ еси • Пойдет ли девица за мужа не согрешила ест • Скорбь же плоти имети будуть таковіи, но азъ опущаю вам • Се же глаголю: братия время сокращено ест • Да имущие жены, яко не имущие будуть • И плачущеи, яко не плачуще • И радующиеся яко не радующеся • И купующе, яко не содержаще • И требующие мира сего якобы не требующе, преходить убо образъ мира сего • Хощу же васъ бес печали быти, неоженивыся печется о Господьних, а оженивыйся печется о мирских како угодити жене • Разделны же суть сие жена и дева: неотданая мужу печется о Господьнихъ, дабы была свята и теломъ и духом, а отданая печется о мирском, како угодити мужу •

Се же ко ползе вамъ самемъ глаголю: да не силу вамъ наложу, но ко почтивости васъ привожу, абы могли есте служити Господеви безмлъвно • Естъ ли же кто срамотно мнить быти девици своей дорослой летъ понятия, и хотящей за мужа, да отдасть ея, не согрешить в том • Пак ли кто стоить твердо серцемъ, не имея нуждя, власть же имея воли ея • И то умыслилъ ест во серци своемъ, блюсти свою деву, добре чинить • Прото вдавая девицу замуж добре творить • А не вдавая лучши творить • Жена убо привязана ест закономъ къ мужу, донеле живъ мужъ ея, аще ли же умреть мужъ ея, свободна ест • И за кого хощеть можеть пойти, точию о Господе • Блаженейши же ест аще тако пребудеть, по моему совету • Мню бо ся и азъ Духъ Божій имеяй •

О речахъ пакъ идоложертвеных вемы, яко вси разумъ имамы • Разум же надымает, а любов созидаеть • Аще ли кто мнит себе ведати что, но не вже позналъ како подобаеть ему разумети • Естъ ли же кто любит Бога, той познанъ ест от Него • О брашне убо идоложертовнемъ вемы, яко ничтоже ест идолъ на свете • И яко никтоже Богъ инъ, токмо единъ • Ибо аще суть глаголеми бози, или на небеси, или на земли • Якожъ суть бози мнози, и господие мнози • Но намъ един естъ Богъ Отець, из Негоже вся, и мы из Него • И единъ Господь Ісусъ Христосъ, Темже вся, и мы Темъ • И единъ Духъ Святъ, Имже всяческая • Не во всех же ест разумъ сей, нецие бо совесть имуще ижебы идолъ было что даже доселе яко идоложертовная ядять, и совесть их немощна сущи сквернится •

Брашно же насъ не предпоставить Богови: ни бо аще емы, в чемъ избычествуемъ • Ниже аще не емы, чего лишаемся • Блюдите же еда како роспущение сее ваше, будеть въ соблазнъ немощнымъ верою • Аще бо кто узрить тебе имеющего разумъ во требещи идолстемъ седяща • Не совесть ли его немощна сущи, созиждется идоложертовная ясти? И погибнеть немощный братъ во твоемъ разуме, егоже ради Христосъ умре • А тако согрешающие во братию, и раняще совесть немощную их • Во Христа согрешають • Темже аще брашно брата моего соблажняет, не буду мяса ясти во веки, да брата моего не соблажню •

Еда ли азъ несмъ Апостолъ? Несмъ ли свободъ? Не Ісуса ли Христа Господа нашего видехъ? Не дело ли мое есте вы о Господе? Аще инымъ несмъ Апостолъ, но вамъ убо есмъ • Мой ответъ къ пытающим мя сей ест • А прото еда не имамы власти ясті и пити у васъ? Еда ли не имамы власти сестры жены с собою водити, яко и иніи Апостоли, и братия Господьня и Кифа? Или единъ азъ и Варнава не имамы власти сего делати? Кто бо когда воинъствуеть своими оброки? И кто насажаеть виноградъ, и от плода его не ясть? Или кто пасеть стадо, и млека от стада не ясть? Еда по человеку сия глаголю? Не и закон ли сия жъ глаголеть? Во Моисеовыхъ убо книгах пишеть: не обръти вола на гумне млотяща • Еда о волех печу имать Богъ, или нас ради вся сія глаголеть? Нас бо ради написася яко в надежи долженъ естъ оряй орати и млатяй во упованіи иже с того ся имат причастити • Понеже мы вамъ духовная сеахомъ, велико ли естъ аще ваша телесная жнемы? Естъ ли же иніи во области суще вамъ причащаются, чему не паче мы? Но не сътворихом по области сей, вся бо терпимъ • Да не прекращения в чемъ дамы благовествованию Христову •

Не весте ли яко делающеи свещенная от святилища ядять • И служащеи олътарю, со олтаремъ соделяются? Тако и Господь повеле проповедающимъ Благовестие от благовестия жити • Азъ же ни единого вчинихъ от сих, а ни для того писахъ вамъ сия дабы тако было о мне напотом • Добрее бо ми ест паче умрети, нежели похвалу мою да кто изъпразнит • Аще убо благовестую несть ми похвалы, нужда бо ми належить, а пак ли не благовестую горе мне будеть • Естъ ли же волею сее творю мзду имамъ, аще ли неволею, строение ми ест предано • И кая жъ мне ест мзда? Еда благовестующу ми без брашна, положу благовестие Христово не творити области моея во благовествованіи •

Свободенъ сый от всехъ • Всемъ себе поработих, да множайших приобрящу: и быхъ Юдеомъ яко Іудей, да Юдеи приобрящу • И подзаконным яко подзаконен, да подзаконныхъ приобрящу • И беззаконнымъ яко беззаконенъ, и не сый без закона Божия, но в законе Христове, да приобрящу безаконныя • И бых немощным яко немощный, да приобрящу немощныя • И всемъ быхъ всякъ, да всяко некия спасу • А сее чиню для благовестия да сообщеник ему буду • Не весте ли яко текуще во позорищи вси бо утекуть, един же приемлеть почесть? Такожъ течите да постигнете • Всяк убо подвизаяся от всего воздержится да тленный венець приімет, мы же нетленный • Прото и азъ тако теку, не яко в безвесно тако прилежу, и не яко ветръ бию • Но удержу сие тело мое и порабощу е • Еда како инымъ проповедая, самъ несъвершенъ буду •

Не хощу васъ не ведети братия яко отцеве наши вси, подъ облакомъ беша • И вси скрозе море проидоша • И вси у Моисея крестишеся, во облаце и в мори • И вси брашно тожде духовное ядоша • И вси питие тожде духовное пиша • Пиша бо от духовнаго, последующего имъ камени, камен же бе Христосъ •

Но множайших с них не возлюби Богъ, и поражени быша во пустыни • Сия же во образъ намъ беша, да не бываемъ похотници злых речей, яко они похотеша • Ни идолотребници бываймы, яко неціи от них • Якоже пишеть: седоша людие ясти и пити, и въсташа играти • Ни любыдеемъ, яко неціи от них любыдеаша • И падоша во единъ день двадесет и три тысещи • Ни искушаймы Бога, якоже неціи от них искусиша, и от змией погибоша • Ни ропчимо, якоже неціи от нихъ ропташа, и загыбоша от всегубителя • Сия бо вся образи прилучахуся онем, написана же суть к нашему навчению, насъ убо конци векъ достигоша •

Темъ же мняйся стояти, блюдися да не падеши • Искушение на васъ не придеть толико человеческое • Веренъ убо ест Богъ Онже не оставить васъ искуситися более над то еже можете • Но сотворить со искушениемъ изводство, да возможете понести • Сего ради возлюбленъніи мои, бегайте от идолослужения • Яко мудрымъ вамъ глаголю, судите сами еже молвю • Чаша благославения юже благославимо, не общение ли Крови Христовы ест • Хлебъ иже ломим не общение ли Телу Христову ест? Яко единъ хлебъ, едино тело мнози есмы, вси бо от единого хлеба причащаемся • Видьте людей Ізраилевых по плоти: не ядущие ли жертвы обещници олътариви суть? Что убо реку? Идолъ ли что ест, или идоломъ жертва что ест? Ничтоже ест • Но яже приносять жертвы языци, бесомъ приносять, а не Богови • Не хощу же васъ общеники бесомъ быти • Не можете чашу Господьню пити, и чашу бесовску • Не можете столу Господьню причаститися, и столу бесовску • Еда ли разъдражнити хотимъ Господа? И чили крепчайши Его есмы?

Вся ми лепа суть но не вся пожиточна • Вся ми прислушать, но не вся созиждають • Никтоже своего ищеть, но дружнего кождый • Все еже во естовъни продаемое ядите ничто разсужающе для совести • Господьня бо ест земля и сполънение ея • Аще кто призываеть васъ от неверныхъ, и восхощете пойти, все представленое вамъ ядите, ничтоже востязающе для совести •

Естъ ли же кто повесть вамъ: се идоложертвено естъ, не ядите • Для оного поведавшего, и для совести • Занеже Господьня ест земля и сполнение ея • Совесть же глаголю не твою, но другаго • Прочто пакъ свобода моя судится от иноя совести? Аще азъ с ласкою причащаюся, почто хулу приемлю • Занеже за то благодариши? Аще убо ясте или пиете или что иного чините, все во славу Божию чиньте • Безъ ображения бывайте Іудеомъ, и Еллиномъ, и церкви Божией • Яко и азъ во въсемъ угажаю всем, не ища своего пожитку, но многыхъ, да спасуться •

Подобни ми бывайте, якоже и азъ Христу • Хвалю же васъ братие яко всегда на мя помните • И якоже предах вамъ предания держете • И хощу дабы есте ведали, яко всякому мужу глава естъ Христосъ • А глава жене мужъ • Глава же Христу Богъ • Всякъ мужъ молитву дея или прорицая, на главе же что имея • Срамлеть главу свою • Всяка пакъ жена молитву деющи или прорицающе, откровенъною главою, срамляеть главу свою • Все бо за едно ест, якобы острыженая • Аще убо не покривается жена, да остригается, естъ ли же срамъ жене стрычися, или голитися да покривается • Мужъ пакъ не повиненъ ест покривати главу, образъ и слава Божия сый • А жена слава мужева ест •

Несть бо мужъ от жены, но жена от мужа • И не созданъ ест мужъ жены для, но жена мужа деля • Сего ради повинна ест жена власы имети на главе своей, Ангелъ деля • Обаче ни мужъ безъ жены, ни жена безъ мужа о Господи • Яко бо жена от мужа ест, тако и мужъ женою, вси же от Бога • Вы сами судите то, подобно ли естъ жене откровенне молитися Богови? Чили не само прирожение учить васъ тому, яко мужъ аще власы растить, безчестие ему ест • Жена пакъ аще власы растит, слава ей ест • Власы бо вместо одеания даны сут ей •

Естъ ли же кто мнится сварливымъ быти • Мы таковаго обычая не имамы ни церкви Божія • Се же завещаваю вам, не хваля васъ, яко не налепшая, но нагоршая исходитеся • Первее убо сходящимся вамъ во церкви • Слышу распря межи вами суща • И от части некоея верую, подобаеть убо и ересемъ в васъ быти • Да искушеніи явни у васъ будуть •

Сънемлющим же ся вамъ восполок • Не слушит убо Господския вечеры ясти • Кажды бо свою вечерю напредъ береть ко снедению, единый же алчеть, а иный ожралъся ест • Еда бо домовъ не имате ко ядению и питию? И чили церковъ Божию възгаржаете, и срамляете неимеющих? Что вам реку? Похвалю ли вас? О сем не похвалю •

Азъ убо прияхъ от Господа, еже и предахъ вамъ • Яко Господь Ісусъ Христосъ в тую нощъ в нюже преданъ бывааше • Приемъ хлебъ, и благодаривъ преломил и рече: приимете и ядите, се ест тело Мое, еже за вы ломимое • Се творите въ Мое воспоминание, Такоже и чашу, по вечеряніи глаголя: сия чаша новый заветъ ест Моея Крови, се творите, елико бо аще пити будете, въ Мое воспоминание • Колико кратъ убо ясте хлебъ сей, и чашу пиете • Смерть Господьню возвещаете, дондеже пріидеть • Протож аще кто ясть хлебъ сей, и пиеть чашу Господьню недостойне, повиненъ будеть Телу и Крови Господьни •

Да искушаеть же человекъ себе, и тако от хлеба да ясть, и от чаши да пиеть • Ядый бо и пия недостойне • Судъ собе ясть и пиеть, не разсужая Тела Господьня • Сего ради в васъ мнози немощни и недужливи, и спять доволни •

Естъ ли быхомъ сами себе разсуживали, не быхомъ осужени были • Судими же от Господа наказуемся, да не с миромъ осудімся • Темже братия моя сходящеся ясти, друг друга ждите • Аще кто альчет в дому да ясть, да не ко осужению сходитеся • А иная егда пріиду разряжу •

О духовных пакъ речахъ, хощу васъ разумети братия • Весте бо егда неверни бысте, и ко идоломъ безгласнымъ, яко ведены ходисте • Сего ради скажую вамъ, яко никтоже Духомъ Божіимъ глаголяй, речеть анафема Ісуса • И никътоже можеть рещи Господа Ісуса, точию Духом Святымъ • Разделения пак дарованиемъ суть, но той же Духъ • И разделения служениемъ суть, а той же Господь • И разделения действомъ суть, а той же ест Богъ, действуя вся во всехъ •

Каждому же бываеть дано, явление Духа Святого ко вжитку его • Овому бо дается Духомъ слово премудрости • Иному же слово разума, о том же Дусе, другому пакъ вера, темже Духомъ • Некоему дарования исцелениемъ, в том же Дусе • Иному действие силам • Иному пророчество • Иному разсужение духовъ • Иному различность языков • Иному выкладанье писмъ • Вся же сия действуеть единъ той же Духъ, разделяя на власти каждому якоже хощеть •

Яко бо тело едино ест, уды же имать многы • Вси пак уды единого тела мнози суще, едино тело суть • Такоже и Христосъ, ибо единымъ Духомъ мы вси, во едино тело крестихомся: аще Іудеи, или Еллини • Аще раби, или свободни • Вси единым питиемъ духовным напоены есмо • Понеже и тело несть единъ удъ но мнози • Аще речеть нога, яко несмъ рука, несмъ от тела, еда ли для того несть от тела? И аще речеть ухо, яко несмъ око, несмъ от тела • Аще все тело око, где слышание? Аще ли все слухъ, где ухание? Ныне пакъ положилъ Богъ уды въ теле, единого каждого якоже восхоте • Ест ли бы вси удове един удъ были, где тело? Ныне же мнози удове, едино тело • И не может око рещи руце: непотребна ми еси • И також глава ногам: непотребни ми есте • Но более мнящеися уды тела немощнейшия быти, потребнейша суть • И еже мнимы нечеснейша быти телу, сихъ множайшею честью облагаемъ • И неблагообразніи наші благообразие болшее имеють • Благообразніи бо наши удове ничего не потребують • Но Богъ такъ исправилъ ест тело, лишающему уду болшую далъ честь да не будет распря в телеси, но единъ о другом да попекутся удове • И аще стражет единъ удъ с ним стражут вси уди, а аще ли прославляется един удъ с ним радуются вси уди •

Вы же есте тело Христово и уди от части • И некие положи Бог во Церкви, первое Апостолы, второе пророки, третее учители, потом чинящеи силы • Таж дарования исцелениемъ, заступления, справования, разность языков • Еда вси Апостоли? Еда вси пророци? Еда вси вчители? Еда вси имут силы? Еда вси дарования исцелениемъ? Еда вси языки глаголют? Еда вси сказують? Но вы наследуйте дарованией болшихъ еще же и вышший путь покажу вамъ •

Аще языки человеческими глаголю, и ангелскими • Любве же не имам, бых медь бръмящи, или кимвалъ звинящъ • И аще имамъ пророчество, и познаю тайны вся, и все науки • И буду имети веру яко горы преставляти • Любве же не имамъ, ничтоже есмъ • Аще роздам нищимъ на покармъ вся имения моя, и предамъ тело мое да сожгуть мя • Любве же не имам, ничто ми помощно ест •

Любовь долготерплива естъ, добротлива ест • Любовь не завидить, любовь не развращаеть • Не гордится, не злообразуется, не раздражняется • Не ищеть пожитку своего, не мыслит злого • Не радуется о неправде, но радуется истинъне • Вся любить, вся веруеть, все уповаеть, все терпит • Любовь николи же отпадаеть • Несовершене убо разумеваемъ, и от части пророчествуемъ • Егда же пріидеть совершеное, тогда еже несовершено ест упразнится •

Егда бых младенець, яко младенець глаголахъ • Яко младенець мудрствовахъ, яко младенець смышляхъ • Егда же бехъ мужъ испразних младенечская • Видим же ныне во зерцале уподобленія а потом лицем в лице, ныне ж разумею от части, тогда же поразумею яко призван бехъ • И ныне призывает вера, надежа, любов, три сия, болши же сих любов •

Наследуйте любов, и милуйте духовные дары, наболей да проріцаете • Глаголяй бо разными языки, не человекомъ глаголеть, но Богу, никто убо ему не разумееть • Духом пакъ сказуеть тайная, и прорицая человекомъ глаголеть къ направлению, ко утешению, и ко напоминанию • Глаголяй разными языки собе созідает • А прорицая, церковь Божую зиждеть • Хощу же всехъ вас глаголати языки, но радее да прорицаете • Болей бо прорицаяй, нежели глаголяй языки • Развее аще кто выкладаеть, да церков Божия созидание приемлет •

Ныне же братия аще пріиду к вамъ языки глаголяй, кой вамъ пожиток учиню • Естъ ли не буду молвити, во явленіи, или в разуме, или во пророчестве, или в наученіи? Се бо и бездушная глас дающа, аще пищаль, аще ли гусли • Естъ ли же разности звуку не дадуть, како поразумеется пискание, или гудение их? По тому же и труба, аще безвестенъ гласъ дасть, кто уготовится на брань? Тако и вы языкомъ естъ ли же недобре разумные слова глаголете, како поразумеется глаголемое от васъ? Будете бо дармо в воздухъ глаголюще • Занеже много ест родогласных в мире, а ни един безгласен • Протож не буду ли знати силы гласу, то буду глаголющему подобенъ яко иноязычный • Сего ради и вы понеже наследовници есте духовных даровъ Божих, еже ко созданию церкви просите, да умножитеся • Темъ же глаголяй языкомъ, молися жъ да исказуеши, аще бо помолюся языком, духъ мой молится • А умъ мой без плода ест • Что убо естъ? Помолюся духомъ, но помолюся и умомъ, пою духом, пою же и умомъ • Аще благодариши Бога гласомъ, кто наполнить тобе место неведящего? Како речеть аминь по благодарению твоему, понеже что глаголеши не весть? Ты убо добре благодариши, но другый не зиждется • Прославляю Бога моего иже языкомъ всехъ васъ глаголю • И во церкви паче хощу пять словъ умомъ моимъ глаголати, да иных навчу • Нежели тмы словес языком чуждимъ •

Братия не бывайте дети умы, но злобою младенствуйте, на уме же совершени будте • Въ законе бо писано ест, яко инымъ языком, и инеми устънами возглаголю людем симъ, ни тако послушають Мене, глаголеть Господь • И тако языци не сут во знамя вернымъ, но невернымъ • И пророчество несть во знамя невернымъ, но верующимъ • Аще убо снидется церкви вся въкупе, и вси языци глаголють • А внидут же и невмеліи или неверніи, не рекут ли яко бесуетеся? Аще ли же вси пророчествуете, внидет же кто неверный, или невмелый, обличается от всех, и истязуется от всех, и тайная серца его явна бывають • И тако падъ на лице поклонится Богови вызнавая, яко воистинну Богъ с вами ест •

Что убо ест братия? Еда сходитеся каждый з васъ псалом имать, учение имать, откровение имать, различьность языковъ имать, выкладание словъ имат, вся сия къ направлению да бывають • Аще кто языком глаголеть • По два или наболей по три • И то разделне, а единъ да сказуеть • Естъ ли же не будеть сказателя да молчить во церкви, но собе да глаголеть и Богови • Пророци пакъ два, или трие да говорять, а друзіи да разсужають • Аще ли иному открыется, седящему ту, первый да молчить • Можете бо по единому вси пророчествати • Да вси учатся, и вси утешаются • И дуси пророчестии, пророком да повинуются • Несть бо нестроению Богъ, но смирению, яко и во всехъ церквахъ Божиих учу • Жены ваши во церквахъ да молчать, не повеле бо ся имъ глаголати, но повіноватися • Якоже и закон глаголеть • Аще ли же чему навчитися хотят, в домех своих мужевъ да вопрашають • Срам бо ест жене во церкви глаголати • Еда ли от васъ слово Божие изыде? Или васъ единехъ достиже? Аще кто мнится пророкъ быти, или духовенъ • Да весть еже пишу вамъ, яко Господьни суть заповеди • Ест ли же не весть, не будеть веданъ • Сего ради братия жадайте да прорицаете, а еже языки глаголати не возъбраняйте • Но вся доброобычайне, и по чину в васъ да бывають •

Сказую же вамъ братие благовествование, еже благовестих вамъ, еже и приасте, в немже и стоите, имже и спасаетеся • Яковыми словы благовестих вамъ, держите ли • Аще ли же ни, въсуе веровасте • Предах бо вамъ исперва еже и приасте • Яко Христосъ умре за грехи наши, по Писаниехъ • И яко погребенъ бысь, и яко воста во третій день по Писаниих • И яко явися Кифе, тажъ обеманадесяте, потом же явися более пятисотъ братіам единою • От нихже множайши пребывають доселе, а неціи почиша • Потомъ явися Якову, таже Апостоломъ всемъ • Последи же всехъ яко искидку, явися и мне • Азъ бо есмъ мній Апостолъ, иже несмъ достоинъ нарещися Апостолъ • Занеже гоних Церков Божию • Благодатию же Божиею есмъ тымъ имъже есмъ • И благодат Его яже во мне не дща бысть, но паче всехъ потрудихся не азъ но благодат Божия яже со мною • Аще убо азъ, аще ли они • Тако проповедуемъ, и тако веровасте •

Естъ ли же Христосъ проповедуется яко из мертвых воста • Како глаголють неціи в васъ иже воскресения мертвымъ несть? Аще же воскресения мертвымъ несть, ни Христосъ воста • И аще Христосъ не воста, то дще проповедание наше, дща же и вера ваша, обретаемся же илъжесведетели Божие, иже послушествовахом на Бога, яко воскреси Христа, Егоже не воскреси • Аще бо мерътвіи не востануть, ни Христосъ воста • Аще ли Христосъ не въста, суетна ест вера ваша • И еще есте во гресехъ ваших • Но и умершие о Христе погыбоша • Естъ ли же въ животе семъ толико надежу имамы о Христе, беднейше всехъ человекъ есмо •

Ныне же Христосъ воскресе от мертвых, начатокъ умершимъ бысть • Понеже человека деля смерть сталася ест, и человека ради воскресение ис мертвых • Якоже бо о Адаме вси умирають, тако о Христе вси оживут, каждый во своемъ чину • Найпервей Христосъ, потом Христови, ониже во пришествие Его уверили суть • А потомъ кончина, егда предасть Царство Богу и Отцу, егда испразнить всяку власть, и всяко владычество, и силу • Подобаеть убо Ему царствовати, дондеже положит вся врагы под ногама своима • Последній пакъ враг разрушается смерть • Вся бо покори под нозе Его • Егда же речеть Писание, яко вся покорена суть Ему • Яве ест иже кроме толико покорившего Ему вся • И егда покорены будуть Ему вси речи, тогда и Самъ Сынъ покорится покорившему Ему всячьская • Да ест Бог все во всех •

Понеже что крещаются мертвыхъ ради, аще никако мертвіи не востануть? Почто и мы беды приемлем на всяк часъ? По вся дни умирающе: тако ми и похвалы вашея, юже имамъ о Христе Ісусе, о Господе нашем • Естъ ли же по человеку боряхся со зверми во Ефесе, кая ми полза ест аще мертвіи не востають? Ежъмы жъ и піимы утре бо умремы • Не льститеся, казать убо обычае добрые, беседы злые • Истрезвитеся ж справедливе, а не согрешайте, неведение бо о Бозе неціи имеють • Ко съраму вамъ глаголю • Но речеть некто: како востануть мертвіи, и со яковым телом пріидуть? Безумне • Ты еже сееши, не оживеть аще первее не умреть • И то что сееши, не ест тело, иже имать родитися, но голое зерно • Буди пшеница, или что ино от семен • Богъ пакъ даеть тело ему якоже хощеть, и единому каждому от семенъ ест свое тело •

Не всяка же и плоть ест единакова, но ина плоть есть человекомъ, ина же плоть скотом, ина же рыбамъ, а ина птицамъ • К тому суть телеса небесная, и суть телеса земная • Но ина ест слава небеснымъ, ина же земнымъ • Ина слава солнецу, ина слава месецу, ина слава звездамъ • Звезда же звезду превышаеть светлостию • Тако и воскресение мертвым, сеется во истление, и востаеть в нетление • Сеется в не честь, а востаеть во славу • Сеется в немощи, и востаеть в силу • Сеется плоть телесная, и востаеть плот духовна, ест убо плоть животна и ест плоть духовна • Якоже пишеть: бысть первы человекъ Адамъ в душу живу • Последній же Адамъ въ духъ оживотворящій • А не прежде духовный, но телесный, потом же духовный •

Первый человек от земли, земный • Вторый человекъ Господь с небеси • Яковый бе земный, такови и тіи еже земни суть • И яковый ест небесный, такови и тіи иже небесніи суть • А яко облекохомся во образъ земнаго, тако облечемся и во образ небеснаго • Сия же реку братия яко тело и кровь Царствия Божия наследити не можеть • Ниже истление неистления наследить • Се тайну вамъ глаголю: вси убо не уснемъ, вси же изменимся, в часе прекратком, во мгненіи ока, во последней трубе • Вострубит бо труба, и мертвіи востанут неистленни, и мы изменимся • Подобаеть убо истленному сему нашему телу, облещися во неистление • И мертвеному облещися во бесмертие • Егда же тленное сее наше тело облечется во нетление, и мертвеное сее облечется во бесмертие • Тогда наполнятся слова написаные: пожерта бысть смерть победою • Где ест смерти жало твое? Где ест аде победа твоя? Жало бо смерти естъ грехъ • Сила пакъ греху законъ • Богови же похвала дающему намъ победу Господемъ нашим Ісусъ Христомъ •

Темже братия моя возлюбленная тверди бывайте, и неподвижими и помножайтеся в деле Господьнем всегда • Ведяще яко трудъ вашъ несть празнъ о Господи •

А о томъ сложеніи милостыни еже ко святымъ • Яко убо разрядихъ во церквахъ Галатійских, тако и вы вчините • Во каждую суботу всякій з васъ сам у себе да полагаеть сохраняя еже полюбится ему • Да не тогда сложения будуть, внегда пріиду к вамъ • И яко буду у васъ ихъже годных узърите послати, тых пошлю дабы несли милостыню вашу во Ерусалим •

Аще ли же будеть годно и мне ити, то пойдуть со мною • Пріиду же к вам внегда Макидонию проиду • В Макидонию бо прежде хощу ити • У васъ пакъ аще прилучится пребуду, или и озимею с вами, да вы мене проводите игдеже аще пойду • Не хощу бо васъ во мимохоженіи видети • Но надеюся время некое в васъ пребыти, аще Господь повелить • Ныне же пребуду во Ефесе до дня пятдесятого • Дверь бо ми ся отверзе великая, и поспешная, и супротівници мнози • Придет ли к вам Тимофей блюдите его да безъ страху пребудеть у васъ • Дело бо Господьне съделаваеть яко и азъ, да никтоже его укорит • Но проводите его с миромъ, да пріидеть ко мне, жду бо его со братиею •

О Аполосе же брате поведаю вамъ, много молихъ его ижебы шолъ к вамъ со братиею • И никако не была воля его дабы ныне шолъ, но придет егда упразнится •

Чуйте о собе, и стойте в вере • Мужайтеся и утвержайтеся • Вся ваша во любви да бывють • Молю же васъ братия знайте домъ Стефанов, яко ест начаток во Ахаіи иже во служение святым повинили себе, да и вы повинуетеся таковымъ • И всякому помагающему вамъ, и тружающемуся с вами • Радуюся пакъ о пришествіи Стефанове, и Фортунатове, и Ахаикове • Чего бо в васъ не было, сіи исъполниша • А тако мой духъ и вашъ упокоиша, познайте ж таковая • Поздравуеть васъ все собрание церкви Асійское • Поздравуеть васъ о Господи много, Акила и Прискила, съ домашнею челедию своею • Позъдравують васъ братия вся • Целуйтеся другъ друга, целовениемъ святымъ • Целование моею рукою, Павлею, иже аще кто не любит Господа нашего Ісуса Христа • Да будет проклятъ, во день пришествия Господьня • адсутнічае А любов моя со всеми вами о Христе Ісусе аминь •