Ко Ефесиемъ

Павелъ посланникъ Ісусъ Христовъ, волею Божиею • Святымъ всемъ еже суть во Ефесе, и вернымъ о Христе Ісусе • Благодать вамъ и миръ от Бога Отца нашего, и Господа Ісуса Христа • Благославенъ Богъ и Отець Господа нашего Ісуса Христа • Благославивый насъ всяким благославениемъ духовным во небесных о Христе • Якоже и избралъ ест насъ в Немъ, прежде сложения мира • Да будемъ святи, и непорочни пред Ним во любви • Онъ убо прежде и нарек насъ за сыны Собе Ісусъ Христомъ, ко приатию наследия Его, по воли хотения Своего • Да похвалена будет слава благодати Его • В нейже облагодари насъ, о Возлюбленнемъ Сыне Своемъ •

О Немже имамы избавление Кровию Его, и оставление прегрешениемъ • По богатеству благодати Его, юже умножилъ в насъ, во всякой премудрости и разуме • Сказуя намъ тайну воли Своея, по доброй любости Своей, юже прежде положи в Немъ • Во осмотрение исполнения временемъ • Да ко первому чину направит всячьская о Христе, яже на небеси, и яже на земли • О Нем же и мы наследовници быхомъ, прежде наречени бывше • По прозрению Божию, вся действующему, по совету воли Своея • Быти намъ во похваление славы Его, проуповавшимъ во Христа • О Нем же и вы слышавше слово истинны благовествование спасения вашего • В Онже и веровавше знаменастеся, Духомъ обетования Святым • Иже ест обручение наследию нашему, ко избавлению и соблюдению, и похвалению славы Его • Сего ради и азъ слышавъ веру вашу еже во Господа Ісуса, и любовь яже ко всем святым •

Не престаю благодаря Бога о васъ, поминание вамъ чиняй в молитвахъ моих, да Богъ Господа нашего Ісуса Христа, Отець славы • Дасть вамъ Духъ премудрости, и откровения ко познанию Его • И просветить очи серца вашего, да уведите что ест упование звания Его • И что богатество славы достоания Его во святыхъ • И что преисъпеющее величество силы Его в насъ верующих • По действу державы крепости Его, еже содея во Христе, воскресив Его изъ мертвыхъ, и посадивъ и одесную Себе на небесныхъ • Превыше всякия власти, и владычства, и силы, и господьства • И всякого имени именующася • Не точию въ веце семъ, но и во грядущемъ •

Вся покори под нозе Его, Того далъ главу прежде всего Церъкви, иже ест тело Его • И исполънение Его исполняеть вси речи во всехъ •

І вы внегда бысте мертви безаконми и грехы • В нихже иногда ходисте по обычаю века сего • По князу власти воздушныя, онже ест духъ и ныне действуя во сынехъ противления • Между нимиже и мы вси жихомъ иногда, во похотехъ плоти нашея, чиняще волю тела и помышленией своих • И бехом от прирожения чада гневу, якоже и иніи •

Богъ пакъ богатъ сый во милости, за многую любовь Свою, еюже возлюби насъ • И егда быхомъ мертвы прегрешенмі оживи насъ Ісусъ Христомъ • Благодатию бо Его есте спасени • И с Нимъ воскресить, и посадить во небесныхъ со Христомъ Ісусом • Да покажеть во веце грядущем превеликое богатество милости Своея, во благости над нами о Христе Ісусе • Благодатию убо есте спасени, и верою • А се не от васъ самихъ, но Божій даръ естъ, и не от дел • Да никто не хвалится • Того бо есмы створение, создани о Христе Ісусе, во дела добрая, яже прежде уготова Богъ, да в нихъ ходимо •

Темже помните яко вы, иже бысте иногда языци по плоти, глаголеми необрезани • Были бо есте отделени от телеснаго обрезания, рукою вчиненаго • И бесте в то время безъ Христа • И отдалены от жітия людей Ізраилевых • И чужди от завета обетования, упования не имуще • И Бога не знасте в мире • Ныне пакъ о Христе Ісусе, вы иже бесте иногда далече, близци сталися есте Кровию Христовою •

Той убо естъ миръ нашъ, сотворивый обоя едино, а посреды стоящую заграду разори • И отнял вражду плотию Своею • Закон старых заповедей учениемъ Своимъ упразнил • Да оба созіждеть Собою, во единаго новаго человека, творя миръ • И смирив обоих съ Богом, воведе во едино тело • Крестом убивъ вражду на немъ • И пришедъ благовести миръ, вамъ иже далеко бесте, и тымъ еже близко быша • И яко Тымъ имамы приведение обои ко Отцу, темже убо • наздани бывше на основаніи Апостолъ и пророк • Сущу краеуголну каменю Самому Ісусу Христу • На немже всяко здание ставляемо, растет въ Церковь святую о Господи, о немже и вы созидайтеся въ жилище Божие, въ Духу Святомъ •

Сего ради азъ Павел узник есмъ Ісусъ Христовъ, для васъ языци • Аще убо слышасте, послугование благодати Божии даное мне между вами • Яко по откровению сказа ми ся тайна • Якоже преды написах вамъ вмале, еже можете чтучи разумети, познание мое о тайне Христове • Яже во иныхъ родехъ не сказася сыномъ человеческимъ • Якоже ныне открыся святымъ Апостоломъ Его, и пророкомъ в Духу • Быти языком наследником и сотелесникомъ, и сопричасникомъ • Обетованию Его о Христе, благовестованиемъ емуже бых служител, по дару благодати Божіи даное ми, по действу силы Его •

Мне меншему всехъ святыхъ дасться благодать сия, во языцехъ благовестити наиследимое богатество Христово • И просветити всемъ, что ест смотрение тайны сокровенное от вековъ въ Бозе, создавшем всячьская Ісусъ Христомъ • Да скажется ныне началом, и властем на небесных Церковию многоразличная премудрость Божия, по преведению вековъ, еже сотвори о Христе Ісусе Господе нашемъ • О Немже имамы дръзновение, и приведение во надеание верою Его • Темже молюся вамъ не стужайте собе о скорбехъ моих за васъ, еже ест слава ваша •

Сего ради преклоняю колени мои ко Отцу Господа нашего Ісуса Христа • Изъ Негоже всяко отечество на небеси, и на земли именуется • Да дасть вамъ по богатеству славы Своея силу • Да утвердитеся Духомъ Его во внутреном человеце • И да вселится Христосъ верою во серца ваша • Будьте во любви въкоренени, и основани • Да возъможете постигнути, со всеми святыми, что естъ широта, долгота, глубина и высота • И да познаете преиспеющий разумъ ласки Христовы • И исполнитеся во всяко исполнение Божие • Тому пакъ Онже моценъ естъ учинити более нежли мы умеемъ, или разумеемъ просити • По силе действующей в насъ • Ему слава во Церкви, о Христе Ісусе, во вся роды века векъ аминь •

Молю убо васъ азъ юзникъ о Господе да достойно ходите званию, в немже звани бысте • Со всякым целомудриемъ, и кротостию • Съ долготерпениемъ сносяюще другъ друга во любви • Пильни будьте соблюсти единение духа во соузе мира • Едино тело, и единъ духъ, якоже и звани есте, во едино упование звания вашего • Единъ Господь, едина вера, едино крещеніе • Единъ Богъ, и Отець всем иже естъ над всеми, и со всеми, и во всех насъ •

Единому же каждому з насъ дана естъ благодать, по мере дарования Христова • Темже глаголеть Писание: вошелъ еси на высоту, пленил еси пленъ • И далъ есь даяния человекомъ • А еже возыйде, что естъ • Аще не точию яко и сниде первее во долнейшая части земли? Понеже сошедый Кто ест, толико Тойже, возшеды превыше всехъ небесъ, да исполнить всячьская • И Той далъ ест овы убо Апостолы, овы же пророки, иные Евангелисты, а иные пастыри, и вчители • Ко совершению святымъ, во дело служения, во создание тела Христова • Дондеже достигнемъ вси соединение веры, и познание Сына Божия • Въ мужъ совершенъ, и в меру возраста исполнения Христова •

Да не к тому будемъ младенци умомъ влънующеся, и скитающеся во всякомъ ветре учения • Во злости человечестей, и в хытрости блудульщения • Но правду последующе во любви • Растимо в Нем всегда, иже ест глава наша Христосъ • Изъ Негож то все тело, члонки составлено и споено, во всехъ ставехъ подаяниемъ по действу в меру, единому каждому уду • Возрастение плоти чинить, к размножению своему в любви •

Сие же глаголю и сведетелствую о Господи, уже к тому да не ходите, якоже иніи народи ходять во суете ума их • Помрачени мыслию • Отдалены от жизни Божия, за невежство сущее в них • И за небрежение серца их • Иже отчаявшися, сами себе предаша студоложству, во делание всякое нечистоты, во лихоимстве • Вы же не тако уведесте Христа, аще убо Его слышасте, и о Немъ навчистеся, якоже естъ истинна во Ісусе • Отложите вамъ по первому житию, ветхаго человека тлеющего, по похотемъ лестнымъ, и обновляйтеся духом в разуме вашем • И облечитеся во новаго человека, иже по Бозе созданого во правде, и во святости истинны •

Темже отложивше илъжу глаголите правду каждый ближнему своему понеже есмы вси въкупе уди • Гневайтеся а не согрешайте • Солнъце да не зайдеть во гневе вашемъ • Ни дадите места диаволу • Крадый да не крадеть к тому, но радней тружайся делая руками своими, еже добро ест • Да имаши что подати требующему • Всяко слово срамотно да не исъходить от устъ вашихъ, но ест ли же что почьтиво ко направению требования, да дасть благодать слышащимъ • И не оскорбите Духа Святого Божия, Имъже знаменастеся во день изъбавления • Всяка горесть, и ярость, и гневъ, и вопль, и хула, да отымется от вас со всякою злостию • Бывайте жъ другъ другу добротливи, милосердни, подающе собе • Якоже и Богъ о Христе подалъ естъ намъ •

Бывайте убо наследовници Божіи, яко чада возлюблена, и ходите во любви • Якоже и Христосъ возлюби нас и преда Самъ Себе за насъ, приношение, и жертву Богови, во воню добровония •

Блуд же и всяка нечистота, и лихоимство да не именуется в васъ, якоже подобаеть святымъ • И скверна, и скаредословие, и неветливость, яже не прислушають вамъ, но более благодарение да бываеть • Сее бо весте, яко всякъ блудникъ, и нечистый, и лихоимець, иже ест идолослужитель • Не имать наследия во Царстве Христове, и Божиемъ • Никтоже васъ да не ильстить тщими словесы, сих бо ради грядеть гневъ Божій на сыны противления • Не будьте ж вы сопрічастници имъ, бесте бо иногда тъма ныне же светъ о Господе • Плодъ бо духовный, во всякой благостыни, и правъде, и истинне • Искушающе что естъ приатно Богови • И не причащайтеся ко деломъ неподобнымъ тъме, но болей карайте таковых • Бывающая убо от нихъ вотай срамъ естъ и глаголати, вся же обличаемая от света являються • Все бо являемое светъ естъ • Темже глаголеть во Писаніи: востани спяй, и воскресни от мертвыхъ • И осветить тя Христосъ • Блюдитеся жъ да опасно ходите • Не яко мудри, но яко премудри • Искупующе время, яко дни зліи суть • Сего ради не бывайте безумни, но разумеіте что ест воля Господьня • И не упивайтеся виномъ, в немже естъ блудъ • Но исполняйтеся Духомъ • Глаголюще собе во псалмехъ, и въ молитвахъ, и во песняхъ духовных • Воспевающе, и хвалу воздающе, во серцехъ ваших Господеви •

Благодаряще всегда о всех, во имя Господа нашего Ісуса Христа, Бога и Отца • Повинующеся другъ другу во страсе Божиемъ • Жены повинуйтеся мужемъ своимъ, яко и Господеви • Понеже мужъ ест глава жене, яко и Христосъ глава Церкви • И Той ест Спаситель телу • Но якоже Церкви повинуются Христу, сице и жены да повинуются мужемъ своимъ во всемъ •

Мужи любите жены своя, якоже и Христос возлюби Церковь, и Сам Себе предал по ней • Да освятить ю омывъ купелемъ воды, во слове спасения • Да представит Собе славну Церковь, не имущу скверны, или враски, или иного что такового • Но да естъ чиста и непорочна • Тако должни суть и мужи любити своя жены, яко своя тела • Любяй убо свою жену себе любить • Никто бо николиже своего тела возненавиде • Но питаеть и грееть е, якоже и Господь Церковь, понеже удове есмо телеси единого • От плоти Его, и от костей Его • Сего ради оставить человекъ отца своего и матер, и прилепится жене своей, и будета оба во плот едину • Тайна сия велика естъ, азъ же глаголю во Христа и въ Церьковъ • Обаче и вы вси единый каждый свою жену, сице да любить якож и себе, а жена да боится мужа своего •

Чада послушайте родителей ваших о Господи, се бо естъ праведно • Чти отца своего и матер, яже естъ заповедь первая со обетованиемъ • Да добро тобе будеть, и будеши долголетенъ на земли •

И вы отцеве не раздражняйте чадъ своих • Но воспитайте их в наказаніи, и в наученіи Господьнемъ •

Раби послушайте плотъскыхъ господарей своих, со страхомъ, и трепетомъ • Во простоте серца вашего, яко Христа • Не пред очима толико работающе яко человеку угодници, но яко раби Христови • Творяще волю Божию, от душа с любовию • Со благоразумиемъ посълугующе Господеви а не человекомъ • Яко каждый иже аще учинить что доброе • Сее и пріиметь от Господа, буди рабъ, или свободъ •

И вы господарие такожде чините имъ отпущающе преступления • Ведуще сее яко и вамъ самемъ Господь естъ на небесехъ, и пріимования лица несть у Него •

Прочее же братия моя возмагайтеся о Господе, и во державе крепости Его • Облецетеся во вся оружия Божия • Да возможете стати, противу кознямъ диаволимъ • Яко несть намъ брани против крови, и плоти • Но против началом, против властемъ, противъ держителемъ тъмы, века сего, противу духовнымъ лукавствиамъ во поднебесныхъ • Сего ради пріимите вся оружия Божия, да возможете противитися во день лютъ • И во всемъ совершени стати •

Станите ж убо препоясавши чресла ваша истинною • И облекшеся во броня правды • И обувше нозе готови суще ко благовестованию мира • Надо все приемше щитъ веры, в немже возможете вся стрелы неприазнены разженыя угасити • И шоломъ спасения возмите и мечъ духовный, еже естъ Слово Божие •

Всякою молитвою, и молениемъ молящеся во всяко время духомъ, и в немъ бдяще во всяцемъ терпеніи, и мольбе о всехъ святыхъ, и о мне • Да дасть ми ся слово, во отверзеніи устъ моихъ • Со дерзновениемъ сказати тайну Евангелия Христова • Для негоже и молюся во оковах сихъ железныхъ • Дабых смеле в нем глаголалъ, якоже и подобаеть ми глаголати • Да увесте пакъ и вы, яже о мне, что дею • Вся вам скажеть Тихикъ, возлюбленый братъ • И верный служитель о Господе • Егоже послахъ къ вамъ на се истое, да увесте что ся с нами деет, и утешить серца ваша • Миръ братіи, и любов с верою • От Бога и Отца Господа нашего Ісуса Христа • Благодат со всеми любящими Ісусъ Христа во неистленіи • Аминь •