К Філипписиемъ

Павел, и Тимофей раби Ісусъ Христовы всем святым о Христе Ісусе, сущим во Філипписеохъ • Со епископы и диаконы • Благодать вам и мир от Бога Отца нашего, и Господа Ісуса Христа • Благодарю Бога моего о всей памети вашей, всегда во всехъ молитвах моихъ • О всехъ васъ с радостию прозбу чиню • Дабы есте пребывали во Евангеліи Христове от перваго дня даже и доныне • Надею имаю о томъ, яко заченый в васъ дело доброе, той и соверъшить, ажъ до дня Христа Ісуса • И яко ест праведно мне сее смышляти о всехъ васъ • Понеже имею васъ всегда во серци, и во узахъ моихъ, и во ответе, и во известованіи Евангелия Христова • Да будете вси сообъщеникы благодати даное ми •

Сведетель убо мне ест Богъ, яко жадаю всехъ васъ быти во утробе Ісусъ Христове, и о томъ молюся да любовь ваша болей и болей размножится, в разуме, и во всяком познаніи, искушати вамъ лучшая • Да будете светли чистотою, и непорочьни во день Христовъ • И исполнени плодов правды Ісусъ Христомъ, во славу и похвалу Божию •

Разумети же вамъ хощу братие, что ся со мною дееть, иже къ болшему проспеху пришло ест благовестование Божие, яко узы мое еже для Христа, явлены суть во всемъ судищи, и на иных всехъ местехъ • Тако иже мнози братия уповающе на Господа видевши узы мое, болшую смелость имають, без страху слово Божие глаголати •

Неціи пакъ для зависти, и ръвения • А иніи з доброю волею, Христа проповедують • Они убо для свару Христа возвещающе не чисто • Мнять за то, ижебы мне придавали болести во оковахъ моих • Ови же от любви, ведуще яко для проповедания Евангелия Христова всажденъ есмъ • Что жъ пакъ о томъ? Всякимъ образомъ • Буди не от правды, или от истины Христосъ проповедаемъ ест • О всемъ томъ радуюся, и радоватися буду • Вем бо яко все тое събудется мне во спасение, вашею молитвою • И подаяниемъ Духа Ісусъ Христова • По ожиданию, и надежи моей • Мой убо животъ, естъ Христосъ • А смерть, приобретение • И еже жити ми во теле, сее пожиток ест толико къ заслужению • И что собе изволю, не вем • Тяжко ми ест обдержатися от обою: желаніе имею разрешитися и со Христом быти, многымъ, и велико лепши естъ • А еже пребыти ми во теле, потребнейши ест васъ ради • И о семъ надею имея вемъ яко пребуду живъ со всеми вами, ко вашему проспеху, и к радости веры • Да хвала ваша изъбыточствуеть о Христе Ісусе во мне, моимъ пришествиемъ опять к вам •

Толико достойно Евангелию Христову живите, еда аще прииду к вамъ да вижу вас • Или кроме сый да услышу о вас яко стоите во единомъ дусе, и во единой мысли страждуще с верою Благовестования • Не плошающися ни в чем от противных своих • Понеже убо темъ естъ явление погыбели, а вамъ спасения, и се от Бога • Яко вамъ даровася о Христе, не точию в Онь веровати, но для Него и пострадати • Той же подвигъ имейте, еже видесте во мне, и еже ныне слышите о мне •

Сего ради естъ ли кое утешение во Христе • Естъ ли коя потеха во любви • Естъ ли общение Духа Святого • Естъ ли милосердие и щедроты • Наполните радость мою: соединение веры имейте, единоту ласки имуще, едину мысль, едино мудрствующе • Ничтоже по рвению и тщеславию, но смиреномудриемъ друг друга болша себе чиняще • Не своих кажъдый толико смотряще, но и дружних •

Се убо да мудрствуется в васъ, еже о Христе Ісусе • Иже во зраце Божиемъ сый, не восхищениемъ помыслилъ, быти равенъ Богови • Но Себе смири зракъ раба приемъ • Во подобии человеческомъ бывъ, и образомъ обретеся яко человекъ • Сміривъ Себе, бывъ послушливъ до смерти • Смерти же распятия • Темже и Богъ Того превознесе • И дарова Ему имя, еже ест боле всякого имени • Да о имени Ісусове всяко колено поклонится • Небесных, и земных, и преисподних • И всякъ языкъ исповесться яко Господь Ісусъ Христосъ во славе Бога Отца •

Протожъ братия моя, яко всегда послушасте мене • Не толико вънегда с вами быхъ, но ныне более во отдалении моемъ • Со страхомъ и трепетом свое спасение содевайте • Богъ убо ест действуя в васъ, и хотение, и доконание по благоволению Своему • Вся пакъ чините без роптания и безъ брани • Да будета безъ жалобы и цели, яко чада Божия непорочна посреде рода строптива, и развращена • В нихже светитеся, яко светилници въ мире • Слово жизни содеръжаще, да похвалитися могу во день Христовъ • Но аще и на смерть бываю преданъ, для службы веры вашея • Радуюся, и посполу тешуся со всеми вами • Такожъ и вы радуйтеся, и тештеся со мною •

Уповаю же на Господа Ісуса Тимофея скоро послати к вамъ • Дабыхъ и азъ былъ доброе мысли, уведевши о житіи вашемъ • Ни единаго бо имамъ равнодушна, онже бы болшую жадость имелъ попечися о васъ • Вси бо яже их суть ищуть, а не яже Христа Ісуса • Искушение же его знаете, занеже яко отцу чадо, со мною работа во Евангеліи Христове • Тогожъ хощу и отпустити яко скоро увемъ о моемъ деле •

Надеюся пакъ на Господа яко и самъ азъ воскоре к вамъ пріиду • Но потребно ми ся видело • Епафродита брата, и поспешника, и совоина мне • Вашего посла, и служителя въ потребе моей, к вамъ послати • Понеже имелъ ест жадость великую всехъ васъ видети • И тужилъ о то иже есте слышали о немъ, яко былъ болен • И тако ест, былъ убо болен даже близ смерти • Богъ же его помилова, а не толико его, но и мене да не скорбь на скорбь прииму • Сего для спешнее послахъ его, да увидевши и паки возрадуетеся, и азъ безъпечалней буду • Пріимите ж его о Господи со всякимъ веселиемъ • И таковыхъ во чти имейте, яко за дело Христово ко смерти приближися, не брегый о животе своемъ • Дабы наполнилъ ваше уменшение, еже ко моей потребе •

Затымъ пакъ братия моя, радуйтеся о Господи • Тажде писати к вам мне убо несть лено, вам же естъ известно • Блюдитеся псовъ, блюдитеся делателей злыхъ, блюдитеся обрезания неверныхъ • Мы бо есмы обрезание, иже духомъ Богу служимо, и хвалимся о Христе Ісусе • А во плотстемъ обрезаніи надеи не имамы • Ачьколве азъ могъ быхъ имети надею во плотстемъ обрезаніи • Естъ ли же кто иный мнить надею имети во плоти • Азъ болей, обрезан есмъ осмого дня, от роду Ізраилева • Съ племеня Веньаминова, Евреинъ от Еврей • По закону фарисей • По ревнованию гоняй Церковь • По правде законней бывъ непороченъ • Но еже мне быша къ пожитку, сия вменихъ собе Христа ради во тщету • И тако покладаю, вся тщету быти • За пренайвышшее познание, Ісуса Христа Господа моего • и знайденъ буду в Немъ, не имея моея правъды от закона, но от веры Христовы • Еже естъ от Бога правда во вере • Къ познанию Его, и силу воскрешения Его • И общение страдания Его • Да соображуся смерти Его, аще како и достигну воскресения изъ мертвыхъ • Не якоже приахъ, или совершихся • Но теку да аще постигну, якоже и постиженъ есмъ от Христа Ісуса •

Братия азъ себе не вже помышляю достигнувша, едино же се глаголю: задняя забывая, во предняя же простираяся теку, ко усмотреному знаменю чти, вышнего звания Божия о Христе Ісусе • Сего ради елици совершени есте, сия мудрствуйте • Аще ли же инако мудрствуете, и се вамъ Богъ откриеть • Обаче в неже достигохомъ, по тому и ходимо правилу, тожде и мудрствуймо •

Подобни мне бывайте братия, и смотрите тако ходящихъ, якоже имате образъ нас • Мнози бо ходять, о нихже многажды поведахъ вамъ • И ныне с плачемъ глаголю: врагы креста Христова, имъже кончина погыбель, ихже богъ чрево ест, и слава во студе их, ониже земная мудрствують •

Наше бо житие на небесехъ ест, отнюдуже и Спасителя чаемъ Господа Ісуса Христа, иже преобразить тело смирения нашего быти ему в той же образъ, телеси славы Его • По действу своему, имъже можеть покорити Собе вси речи •

Темже братия моя возлюбленная, и вожделенная • Радости моя, и венець мой • Тако стойте о Господи наймилейшие • Евводіи молю • И Синтихіи прошу, тожде мудрствовати о Господи • Такоже молю и тебе совръсница моя присная, пріми сия • Еже во благовестованіи со мною пострадаша • Со Климентом, и со иными поспешники моими • Ихъже имена суть во книгахъ живота •

Радуйтеся о Господе, и паки реку: радуйтеся • Кротость ваша да будеть явна всемъ людемъ • Господь бо близ ест • Ничимже пецитеся, но во всякой молитве, и молені со благодарениемъ прошения ваша да сказуются Богу • И миръ Божій преимущій всякъ умъ, да соблюдеть серца ваша, и разумы ваша, о Христе Ісусе •

Прочее же братия, елика суть истинна, елика честна, елика праведна, елика чиста, елика любезна, елика пожиточна, иже естъ что добродеание, иже естъ похвала • Сия помышляйте • Имъже навчистеся, и приасте, и слышасте, и видесте во мне сия творите, и Богъ мира да будеть с вами •

Возрадовах же ся о Господи вельми, яко яже некогда восприасте о мне обмышляти, ныне опять обмышляете, но вемъ яко не иместе времени • Не для недостатку своего сие глаголю • Азъ бо навыкохъ • Еже имамъ, на том доволенъ быти • Вемъ и смиритися, вемъ и избыточствовати • Везде, и во всемъ навчихъся, и насыщатися, и алъкати, и много имети, и лишение терпети • Вся могу укрепъляющему мя Ісусъ Христу •

Единаче добре вчинисте спомагающе мя во печали моей • Весте бо и вы Філипписіи, яко в начале благовестования моего, егда изыдохъ от Макидония • Ни едина ми церковъ приобъщевася во слово, даниемъ и приятиемъ, толико вы сами • Яко и во Селунъ одинова, и двожды требования мне посыласте • Не для того абыхъ искалъ даяния вашего • Но ищу плода множащегося во славу вашу • Имею бо все, и изъбыточствую • Исполнихся приемъ от Епафродита еже от васъ послана быша в воню добровония, и дары приятны и угодны Богови • Богъ же мой да исполнить всяко требование ваше, по богатеству Своему, во славе Христа Ісуса • Богу пакъ и Отцу нашему слава, во веки векомъ аминь •

Целуйте каждого святого, о Христе Ісусе • Целують васъ живущие со мною братие • Целують вас вси святіи • Найболей тіи еже суть от кесарева дому • Благодат Господа нашего Ісуса Христа со всеми вами аминь •