К Коласаемъ

Павел посланник Ісусъ Христовъ, волею Божиею • И Тимофей братъ • Сущимъ в Коласаих, святымъ и верънымъ братиамъ о Христе Ісусе •

Благолат вамъ и миръ от Бога Отца нашего, и Господа Ісуса Христа • Благодаримъ Бога и Отца Господа нашего Ісусъ Христа, всегда о васъ молящеся • Понеже слышахом веру вашу, юже имате во Христа Ісуса • И любовь еже ко всем святым • Для упования положеного вамъ на небесехъ • О немже первее слышасте во слове истинны Евангелия Христова, еже пришло к вамъ • Якоже естъ и по всемъ свете плодится, и ростеть • По тому же и у васъ от того дня вонже слышасте, и разуместе благодать Божию во правде •

Якоже и навчистеся от Епафры возлюбленаго сослужителя нашего • Онже естъ веренъ за васъ служитель Христовъ • Той и возвестил намъ вашу любовь юже имате в Духу Святомъ • Сего для и мы от того дня, якоже слышахомъ от него • Не престаемъ молящеся и просяще • Да исполнитеся познания воли Божіи • Всякою премудростию, и разумомъ духовнымъ • Ходити вамъ достойно предъ Господемъ угождающе Ему • И во всякомъ деле добромъ плодъ приносяще • И возрастающе во познание Божие • Всякою силою крепящеся, по державе славы Его • Во всяцемъ терпеніи, и кротости с радостию •

Благодаряще Бога и Отца призвавшего насъ во часть наследия святыхъ во свете • Онже избавилъ насъ от власти темностей, и престави во Царство любви Сына Своего • О Немже имамы избавление, Кровию Его оставление грехомъ • Иже ест образъ Бога невидимаго • Пръвнець всей твари • Яко о Немъ создана быша всячьская, яже на небесехъ, и яже на земли • Видимая, и невидимая • Аще престоли, аще господьствия, аще начала, аще власти вся ж Темъ, и в Него сотворена суть • И Той естъ прежде всехъ, и вси речи о Нем состоятся •

И Той естъ глава телу Церкви • Иже ест зачало, и перворожденый из мертвых, да будеть во всехъ Той первеньчство имея, яко в Немъ изволи все исполнение вселити • Да Темъ приведет к Собе всячьская, смирение вчинивъ Кровию распятия Его с Собою, будь еже на земли суть, или на небесехъ •

И вы иже бесте иногда отдалены, и врагы помышленьми, во делехъ злыхъ • Ныне вже смирилъ васъ во плоти смертию Его • Да представить вы святы, и непорочны, и неповинны предъ Собою • А то естъ ли же пребудете в вере основані, и тверди, и неотступни от упования Евангелия Христова, еже слышасте • И еже проповедано ест всей твари поднебесней • Емуже бых азъ Павел служитель •

Ныне же радуюся во теръпеніи моемъ для вас • И исполняя лишения скорбей Христовыхъ во плоти моей, о телеси Его еже ест Церкви • Еяже азъ быхъ служитель по смотрению Божию, даному мне в васъ, исполнити слово Его, и тайну, сокровенную от векъ, и от родовъ • Ныне бо явлено бысть святым Его • Имъже восхоте Богъ сказати, богатество славы тайны сея, иже ест Христосъ в васъ, упование славы • Егоже мы возвещаемъ • Наказующе всякого человека, и учаще каждого человека • Во всякой премудрости • Да представим каждого человека совершена о Христе Ісусе • В оньже тружаюся подвизаяся, по действу Его, действующемуся во мне силою •

Хощу васъ ведети коликъ подвигъ имамъ о васъ • И о тыхъ еже сут в Лаодикіи • И о всехъ елици не видеша лица моего во плоти • Да утешатся серца их, снемшимся во любви и во всяком богатестве известъщения разуму, во познание тайны Бога и Отца, и Ісуса Христа • Во Немже суть вся сокровища премудрости, и науки утаена •

Сее же глаголю да никто васъ не изводить во небрежение, словесы прения • Понеже аще азъ плотию кроме васъ, но духомъ с вами есмъ • Радуюся егда вижу вашъ чинъ • И утвержение, еже во Христа веры вашея • Якоже есте пріяли Христа Ісуса Господа, тако в Немъ и ходите, вкоренени, и на Немъ возделани • И во вере утвержени • Якоже есте и навчени, изъбыточствуйте в ней во благодареніи •

Братия блюдитеся да никтож окрадеть васъ мудростию мира сего, и тъщею лестию, по преданию человеческу, по составлениемъ века сего • А не по Христове • Яко в Немъ пребываеть все исполнение божства телесно • И будьте о Немъ исполънены, Онже естъ глава всякой власти и владычству • О Немже и обрезаетеся, обрезаниемъ нерукотвореннымъ, внегда изъвлекосте хотения греховъ плоти, во обрезаніи Христове • И сопогребостеся Ему крещениемъ • С Ним бо и востали есте верою, и действомъ Божіимъ, Онъже возъдвиже Его изъ мертвыхъ •

І васъ еже бысте мертви во гресехъ, и во необрезаніи плоти вашея, оживотвори с Нимъ • Отпустивъ вамъ вся прегрешения • Очистивъ сущее рукописание, еже бе противно вамъ установено • И тое взявъ от среды, пригвозди е на кресте, совлекъ начала, и власти • Обличи со дерзновениемъ, посрамивъ их на немъ • Сего ради да не осужаеть васъ кто во яденіи, и во питіи • Или во празнованіи празъниковъ, или новыхъ месецей, или суботъ, понеже сия вся быша стень, пріидущего телеси, иже естъ Христосъ •

Никтоже васъ да не сводить • Ходяй во смиреніи, и во службе Ангельстей • Хотяй поведати, ихъже не виделъ • Вознашаемъ умомъ плоти своея • И не держай главы, от неяже все тело составми и связы, подаваемо и соемлемо, растет во розмножение Божие •

Аще бо умросте со Христомъ от составъ мирскихъ, почто якобы живущие въ мире стязаетеся, глаголюще: того не дотыкайся, ни вкуси, а ни прикоснися • Яже суть вся во истление, вкушающим по заповедемъ, и учениемъ человеческимъ? Мнять бо неціи ижебы таковые речи имели в собе слово мудрости, и волное службы, и смирения • И хранящіи сия, якобы не щадели тела своего, и не жадали чти, ни сытости плоти •

Вы пакъ воскреснусте ли со Христомъ, вышнихъ ищите • Идеже ест Христосъ, одесную Бога седяи • Вышняя мудрствуйте, а не земная • Умросте убо и животъ вашъ сокровен ест со Христом въ Бозе •

Егда Христосъ явится животъ нашъ, тогда и вы с Нимъ явитеся во славе • Умертвите ж уды ваша еже суть на земли: блудъ, нечистоту, руйность, похотение, злобу • Лихоимъство, еже ест идолослужение • Сихъ бо для приходить гневъ Божій на сыны противления • В нихже и вы ходисте иногда • Егда живясте во гресехъ сих • Ныне пакъ и вы отложите от себе вся злая: гневъ, ярость, ругание, хулу, сквернословие изъ устъ вашихъ • Не лжите другъ другу • Совлечитеся з ветхаго человека, со деаньми его • И облечитеся в новаго • Онже обновляется во познание и во образъ создавшего и • В немъже несть разделения между Еллиномъ, ни Іудеемъ • Между обрезанымъ, а необрезанымъ • Между единымъ народомъ, а другым • Между рабом, и свободным • Но вся заровно, во всех бо ест Христосъ •

Облечтеся убо яко избраніи Божіи святии, и возлюбленніи • Во утробу щедрот, во добродетел, во смиреномудрие, во кротость, во долготерпение • Приемлюще другъ друга • И отпущающе собе аще кто на кого имать жалобу • Якоже и Господь отпустил грехи вамъ, тако и вы инемъ • Над все пакъ сие любовь имейте, еже ест соузъ совершению • И миръ Христовъ да размножается во серцахъ вашихъ, о немже и звани бысте во едино тело, о томъ и благодарни бывайте • Слово ж Христово да вселиться в васъ богатно, во всякой премудрости учаще, и наказующе себе вокупе • Во псалмех, и во похвалахъ, и во песнехъ духовныхъ, во благодати поюще в серцах ваших Господеви •

Все еже чините словомъ или деломъ во имя Господа Ісуса чиньте, хвалу возъдающе о Немъ Богу Отцу • Жены повинуйтеся мужемъ своимъ, якоже подобает о Господи • Мужие любите жены ваша, и не бывайте горчави къ нимъ •

Чада послушайте родителей своих во всемъ добром, се бо естъ любо Господеви • Родители не разъдражняйте чадъ своих, да не скорбять •

Раби послушни будите по всему телесных господарей своих • Не пред очима толико работающе, яко человекомъ угодници • Но во простыни серца, боящеся Бога • И все ест ли же что чините, з доброю мыслию делайте • Яко Господеви, а не человекомъ • Ведуще яко от Господа пріимете воздание достоанию вашему • Господу бо Христу работаете • Обидяй же иного, пріиметь грехъ свой еже обиде • Несть бо на лице зрения у Бога •

Господие вы правду и равенство рабомъ своимъ давайте • Ведуще яко и сами Господа имате на небесехъ • Во молитве пребывайте, стояще в ней со благодарениемъ молящеся посполу и о нас, да Богъ отверзеть намъ дверь слову • Глаголати тайну Христову, еяже ради связанъ есмъ • Да явлю ю тако, якоже ми подобаеть объявити •

Во премудрости ходите предъ чуждими • Время искупующе • Слово ваше всегда в доброте да бываеть солию растворено • Да ведаете како подобаеть вамъ единому каждому отвещевати •

А о тых речехъ что со мною ся дееть, все скажеть вамъ Тихик, возлюбленный братъ, и верный служитель, и товаришъ о Господи • Егоже послах к вамъ для того дабы зведал што ся у вас дееть, и да утешить серца ваша • Со Онисимомъ вернымъ, и возлюбленным братомъ, онже ест от васъ • Сие вся вам скажуть яже суть зде •

Целуеть васъ Аристархъ сопленник мой • И Марко сестренець Варнавин, о немже преды возвестих вам, естъ ли ж приидеть к вамъ пріимите его • И Ісусъ иже словеть Праведный • Они же суть от обрезания, сіи едини поспешници во Царствие Божие, еже быша мне ко утешению • Целуеть васъ Епафрасъ, иже от васъ ест рабъ Христовъ • Всегда и велми подвизается о васъ въ молитвахъ своих • Да станете совершени, и исполнени во всякой воли Божией • Сведетелствую бо ему яко имать печю многу о васъ • И о тых еже суть в Лаодикии, и во Ераполи •

Целуеть васъ Лука врачь возлюбленный • И Димасъ • Целуйте в Лаодикии сущую братию • И Нимфана, и домашнее собрание его • Егда прочтете у васъ послание сее • Велите да и в Лаодикийстей церкви прочтено будеть • И еже писано естъ во Лаодкии послание, то и вы прочитайте •

И рекните Архиппу: буди пиленъ служения того, еже принялъ еси от Господа, да совершить е • Целование мое рукою Павлею • Поминайте узы моя • Благодать с вами • Аминь •