1 к Селуняномъ

Павелъ • И Силуанъ • И Тімофей • Церкви Селунстей • О Бозе Отци и Господи Ісусъ Христе • Благодат вамъ и миръ, от Бога Отца нашего и Господа Ісуса Христа • Благодарим Бога всегда, о всех васъ • Воспоминание вамъ чиняще во молитвахъ своих непрестанно • Поминающе ваше дело, и веру, и трудъ любве, и терпение • И яко пребысте во упованіи на Господа нашего Ісуса Христа • Предъ Богомъ, и Отцемъ нашимъ • Ведуще братия возлюбленная, от Бога избрание ваше • Яко благовестование наше, бысть у васъ • Не словом толико, но и силою, и Духом Святымъ, и извещениемъ многымъ • Якоже весте какови быхомъ в васъ •

І вы подобни намъ бысте, Господьне приемъши слово во скорби мнозе, с радостию Духа Святого • И тако вчинистеся объразъ всемъ верующимъ, во Макидоніи, и Ахаіи • От васъ бо прослуся слово Господьне, не точию во во Макидоніи, и во Ахаіи • Но и во всякомъ месте, вера ваша иже ко Богу рознеслася ест • Яко не потреба намъ вже что глаголати • Тіи бо о васъ извещевають каков входъ имехом к вам • И како обратистеся къ Господу от идолъ, работати Богу живому, и истинному • И ждати Сына Того с небеси • Егоже воскреси от мертвых Ісуса избавляющего насъ от гнева грядущего •

Сами убо братие весте приходъ нашъ к вамъ, яко не тощъ бысть • Но прежде претерпевше досаждения и беды, якоже весте, во Філиппусе граде • Смелее дерзънухомъ о Господи нашем глаголати вамъ благовествование Божие, со многымъ подвигомъ • И напоминание наше не было блудно, ни о нечестоте, а ни льстиво • Но якоже искушени быхомъ от Бога, верни быти ко приатию Евангелия Его • Тако и глаголемъ, не яко человеком угожающи, но Богови искушающему серца наша • Ни бо когда во словеси похлебованія быхомъ, якоже вете • Ни во вине лихоимъства, Богъ сведетель • Ни ищуще от человекъ славы • Ни от васъ, а ни от иныхъ • Могуще во чти быти яко Христови посланци • Но быхомъ тиси посреди вас • Яко доилица грееть своя чада • Тако желающе васъ, благоволихом подати вамъ, не толико Евангелие Божие, но и своя души • Занеже возлюбленни намъ бысте •

Помните братие трудъ нашъ, и подвигъ • Нощъ бо и день делающе • Да не отягчимъ кого з васъ • Проповедахомъ вамъ благовестие Божие • Вы сами сведетели есте, и Богъ • Яко праведно, и непорочьно, и без жалобы, с вами верующими быхомъ • И вы познасте, иже единаго каждого от васъ, яко отець чада своя любихомъ • Моляще васъ, и вътешающе, и сведетелствующе • Да достойно ходите предъ Богомъ, зовущимъ васъ во Свое Царствие и славу • Сего ради и мы благодаримъ Бога непрестанно • Яко внегда приасте от насъ слово слышания Божия • Приняли есте е, не яко слово человеческое • Но яко ест поистинне слово Божие • Еже и действуеть в васъ верующих •

Вы бо подобници бысти братие церъквамъ Божіимъ, сущимъ во Іудеи о Христе Ісусе • Зане тая жъ претерпесте от своих племенникъ, яко и тіи от Іудеи • Ониже Господа убиша Ісуса, и своя пророки • И насъ изъгнаша • И Богу не угожають • И всемъ человеком противятся • Возбраняюще намъ не глаголати языком да спасутся, но да выполняють грехы своя всегда • Понеже пришолъ естъ на нихъ гневъ Божій до конца • Мы же братие осиротевше от васъ на сесь часъ, лицемъ, а не серцемъ • Велми поспешихом видети лица ваша, со многымъ желаниемъ • Темже восхотехом пріити к вамъ • Азъ убо Павелъ и единою, и двожды, возбрани же намъ сатана • И кое бо ест упование наше, или радость, или венець аще не вы, предъ Господемъ нашимъ Ісусъ Христомъ во пришествие Его? Вы бо есте слава наша, и радость •

Темже не трепеща более, изволихомъ остати во Афінехъ едини • И послахомъ к вамъ Тимофея брата нашего, и служителя Божия, и поспешника намъ во Евангеліи Христове • Утвердити васъ, и утешити васъ во вере вашей • Да ни единаго поколебания имеете во печалех сихъ • Сами бо и вы весте яко на сее поставлени есмо • Ибо егда у васъ бехомъ прежде поведахом вамъ, иже имамы скорби терпети • Якоже и бысть, и весте • Сего для и азъ не можай к тому ждати, послахъ до васъ, дабыхъ зрозумелъ веру вашу • Еда како не искушалъ васъ искуситель, и тощъ бы былъ трудъ нашъ •

Ныне же пришедшу Тимофею к нам от вас и поведевшу намъ веру вашу, и любовь • И еже имате паметь о насъ добру всегда, жадающе насъ видети, якоже и мы вас • Сего ради утешихомся братие о васъ, во всей скорби, и беде нашей, вашею верою, понеже мы живи есмо • Аще вы стоите о Господи •

Кое убо благодарение возможемъ за васъ воздати Богови, о всей радости еюже радуемся предъ Богомъ нашим, в нощи, и во дни • Найболей молящеся да быхомъ могли видети лица ваша • И соверъшити лишение веры вашея? Сам же Богъ, и Отець нашъ, и Господь нашъ Ісусъ Христосъ • Да исправит путь нашъ к вамъ • Васъ же Господь да умножит, и да избыточствить любовию другъ ко другу, и ко всемъ • Якоже и мы къ вамъ • Утвердити ваша серца непорочна во святыни предъ Богомъ, и Отцемъ нашим во пришествие Господа нашего Ісуса Христа, со всеми святыми Его •

Далей пакъ братия жадаемъ васъ и напоминаемъ о Христе Ісусе • Якоже приясте от насъ, како подобаеть вамъ ходити, и угожати Богови • Да розмножаетеся более • Весте бо кая повеления дахомъ вамъ о Господе нашемъ Ісусе • Сее бо естъ воля Божия, посвящение ваше, да воздержаетеся от блуда, и да весть единый каждый свой судъ держати, во святыни, и во чти • Не во любованіи телеснаго похотения • Якоже языци не ведящие Бога •

Да никтож не обидить, а ни лихоимствуеть въ вещи брата своего • Зануж мьститель ест Господь о всехъ сихъ • Якоже, и прежде поведахомъ вамъ, и засведетелствовахомъ • Не призва бо насъ Богъ во нечьстоту, но во святыню • Тоя убо отметаяся, не человека отметается но Бога, Онже далъ ест Духа Святого Своего в вас •

О братолюбіи же не требуете, абыхъ писалъ вамъ • Сами бо от Бога навчени есте любити другъ друга, якоже и чините ко всей братіи, сущей во всей Макидоніи • и пилность приложите дабы есте спокойни были • И хлебокормление имели делающе рукама своима • Якоже вамъ повелехомъ, да ходите учтиве пред внешними, и ни единаго о что требуете •

Не хощу жъ васъ не ведети братия, о умерших да не скорбите, яко и иніе не имуще упования • Аще бо веруемъ яко Ісусъ умре, и воскресе • Тако и Богъ умершая Ісуса ради, приведеть с Нимъ • Сее бо вамъ глаголемъ словомъ Господнимъ, яко мы живи суще и лишени, во пришествие Господьне, не постигнемъ умерших • Понеже Самъ Господь во повеленіи, и во гласе Архангелове, и во трубе Божией, снидет с небеси • И мертвіи о Христе воскреснут перве, потом же мы живіи, и лишеніи • Купно с Нимъ восхитимся до облаковъ, во стретение Господьне на воздусе • И тако всегда со Господемъ будемъ • Тем же утешайте другъ друга во словесехъ сихъ •

О летех же, и о временех, не потреба естъ вамъ писати • Сами бо заисто вете, иже день Господень, яко тать в нощи, тако приидеть, егда бо рекуть: миръ, и утвержение • Тогда нагле найдеть их всегубителство, яко болезнь во чреве имущую, и не возмогуть убежати •

Вы же братия несте во тме, да день онъ васъ яко тать постигнеть • Вси бо вы сынове света есте, и сынове дня • А несмы сынове нощи, ни тмы • Темже убо да не спимъ, яко иние • Но чуймо, и трезви будимо • Спящие бо в нощи спят • И упивающиеся в нощи упиваются • Мы же сынове дня суще, да трезвимося • Облекшеся во броня веры, и любве • И во шолом упования, и спасения •

Яко не постави насъ Богъ во гневъ, но восприатие избавленія Господемъ нашим Ісусъ Христомъ, умершимъ за нас • Да аще чуемъ, аще ли же спимъ, посполу с Нимъ живемъ • Темже утешайте другъ друга, и навчайте единъ другаго, якоже и чините •

Молимъ васъ братия да видите тружающихся в васъ, и приставники ваша о Господе, наказующие васъ • Честуйте е по премножеству во любви, за дело их, миръ имеюще с ними •

І просимо васъ братия, карайте непокоривыя • Утешайте малодушныя • Подъемлите немощныя • Имейте терпение ко всемъ • Блюдитеся да некто зло, за зло кому отдасть • Но всегда еже добро естъ наследуйте, и между собою, и ко всемъ инымъ • Присно радуйтеся • И не престающе молитеся • Со всего Богу дякуйте • Се бо ест воля Божия о Христе Ісусе во въсехъ вас • Духа не вгашайте • Пророчества не укаряйте • Вся искушайте, и еже добро ест того ся придержайте • От всякого видения зла отгребайтеся • Сам же Богъ мира да осветить васъ во всемъ • И соверъшить вашъ духъ, и душу, и тело • Да непорочно, во пришествие Господа нашего Ісуса Христа соблюдется • Верный убо естъ Богъ, призвавый васъ, Онже и сотворить •

Братия молитеся за нас • И целуйте всю братию лобзаниемъ святым • Заклинаю васъ Господемъ да прочтете послание сее всем святым братиам • Благодать Господа нашего Ісуса Христа со всеми вами • Аминь •