Ко Евреомъ

Различне и многообразне прежде глаголав Богъ отцемъ пророки • Напоследокъ дней сихъ, глагола намъ Сыномъ • Егоже постави наследника всемъ • Имъже и векы сотвори • Онже сый сиание славы, и образъ состава Его • Носяй всячьская гласомъ силы Своея • Собою очищеніе вчинив грехомъ нашимъ • Седе одесную величествия на высоких • Толико лучше бывъ Ангелъ, елико различнее от нихъ наследовалъ ест имя • Кому бо рече когда от Ангелъ: Сынъ Мой еси Ты, Азъ днесъ родих Тя? И паки: Азъ буду Ему во Отца, и Той будеть Мне в Сына? Егда же уводить Первенца во вселенъную, опять глаголеть: да поклонятся Ему вси Анъгели Божіи • А ко Ангеломъ рече: творя Ангелы Своя духи, и слугы Своя огнь палящъ • Ко Сынови же рече: престолъ Твой Боже во веки вековъ, жезлъ правости жезлъ Царствия Твоего • Возлюбилъ еси правду, и возненавиделъ безаконие • Сего ради помаза Тя Боже, Богъ Твой елеомъ радости паче причасник Твоих •

И: Ты в начатцехъ Господи землю основал, и дела руку Твоею суть небеса, та погыбнуть, Ты же пребываеши • И вся яко риза обетшають, и яко одежду свиеши я, и изменятся • Ты жъ тойжде еси, и лета Твоя не оскудеють •

Къ кому пакъ от Ангелъ рекъ когда: седи одесную Мене • Дондеже положу врагы Твоя подъножие ногама Твоима? Не въси ли суть служения дуси, шлемыи во служение для хотящихъ наследовати спасение?

Сего ради подобает намъ более внимати о спасеніи нашемъ, да некогда отпаднемъ • Аще бо Ангелы глаголаное слово бысть известно • И всяко преступление, и непослушание приатъ, праведно возмездие • Како ж мы убежим о толице не радивши спасеніи • Еже зачало пріиме проповедатися от Господа • И от слышавшихъ в Него, в насъ известися • Съпослушествующу Богу, знамены, и чудесы • И различьными силами, и Духа Святого разделеньми, по Своей Ему воли?

Не Ангеломъ бо покори вселенную гредущую, о нейже глаголемъ • Засведетелствова убо инъ некто и рече: что естъ человекъ яко помниши его? или сынъ человечь яко посещаеши его? Умалилъ еси и малымъ нечимъ от Ангелъ, славою, и честию венчалъ еси его • И поставил еси того над делы руку Твоею • Вся покорилъ еси под нозе его • Внегда вси речи покори ему, ничтоже остави тому непокорено • И ныне не вже видим ему вся покорена • А еже малымъ нечимъ умалена Его от Ангел • Зримъ Ісуса за приатие смерти славою и честию венчана • Яко благодатию Божиею за вся укуси смерть • Подобаше убо Ему, Егоже ради всячьская, и Имже всячьская • Многы сыны во славу привести, начальнику спасения их, муками совершитися •

Освещая убо, и освещаеміи от Единого вси бывають • И для тое вещи не стыдится их братиею нарицати • Глаголя: возвещу имя Твое братіи Моей, посреди церкви воспою Тя • И паки: Азъ буду надеяся Нань • И опять: се Азъ и дети яже Ми далъ Богъ • Понеже убо дети приобщишеся телу и крови, и Той по тому же приобщися имъ, да смертию упразнить державу имущаго смерти • Сіи речь діавола • И да изорветь техъ ониже страхомъ смерти, во всемъ житіи своемъ, повинни беху работе • Занеж не от Ангелъ когда приялъ естъ • Но от семени Авраамля приемълет • И тако долженъ бе по всему братіи уподобитися • Да милостивъ будеть, и веренъ светитель в томъ еже ко Богу, очистити грехи людемъ • О томъ пакъ иже пострада Самъ, и искушенъ бе • Можеть и тым еже искушени бывают помощи •

Темже братие святіи, Царствию Небесному наследници, ведте Посланника, и Светителя исповедания вашего Ісуса Христа, верна быти поставившему И • Яко и Моисей во всемъ дому Его • Множайшей же славе сподобися Христос, нежели Моисей • Яко и множайшую честь имат вделавый домъ, нежели сам домъ, всякъ бо домъ бываеть сделанъ от некоего • Сотворивый же всячьская Богъ естъ •

Моисей убо веренъ бе во всемъ дому Его, яко угодникъ во сведетелство глаголанныхъ • Христосъ же яко Сынъ в дому Своемъ • Егоже домъ есмо мы, аще надежу и хвалу упования даже до конца крепко удержимъ • Темже яко глаголеть Духъ Святый: днесъ аще гласъ Его услышите, не затвержайте серць ваших • Яко во прогневаніи, по дни искушения во пустыни • Идеже искусиша Мя отци ваши • Познаша и видеша дела Моя четыредесят летъ • Сего ради негодовахъ рода того • И рехъ: сие всегда блудять серцемъ, ониже не хотеша знати путей Моих, имже и кляхся во гневе Моемъ, яко не вніидут в покой Мой •

Блюдете братия, да некогда будеть въ некоемъ серце лукаво исполнено неверствия, отступити от Бога жива • Но напоминайте себе на всякъ день • Дондеже день нарицается • Да не ожеститься кто от васъ лестию греховною • Причасници убо быхомъ Христу, естъ ли же начатокъ веры Его даже до конца силне удержимъ, поколе глаголется: днесъ аще гласъ Мой услышите не затвержайте серць ваших яко во прогневаніи • Неціи бо услышавше прогневаша Его, но не вси вышедшіи изъ Египта с Моисеемъ •

Коих пакъ негодовалъ естъ четыредесятъ летъ? Не согрешивъших ли, ихже трупия падоша во пустыни? И коимъ клятся не вніити в покой Его? Не точию ли противляющимся? Видим бо иже не могоша вніити для неверствия •

Да убоимся же братия, да некако оставивши обетование о внитіи в покой Его • Мняй некто от васъ, ижебы от него лишенъ былъ • Ибо и намъ благовестовано естъ, яко и онымъ • Но не проспело имъ слово слышания, зануж не верили слышавшіи • Внидем бо в покой мы веровавшіи • Якоже и рече к неверным: се кляхся во гневе Моемъ, иже не внидут в покой Мой • Поведено естъ намъ о седмомъ дни тако: и почи Богъ от всехъ дел Своихъ въ день седмый • И о семъ паки: аще не внидуть въ покой Мой • Понеже убо оставлени суть неціи еже внидуть в покой той • Коимъ бо первей изъвестовано естъ не вніидоша для неверия • Опять являеть Писание иный день • Во Давыдовыхъ книгахъ глаголя • По мнозехъ летехъ, якоже прежде поведено естъ: днесь аще гласъ Его услышите, не затвержайте серць вашихъ • Понеже бы былъ Ісусъ Наувинъ техъ упокоилъ • Не был бы Давыдъ о иномъ отпочиненіи глаголалъ • Сего ради оставлено ест отпочинение людемъ Божіим • Вошедый бо во отпочинение Его, той упокоится от делъ своих • Якоже и Богъ от Своихъ • Протожъ поспешимо вніити в покой той • Да некто тою же притчею падеть неверования • Живо убо ест слово Божие, и действено • И острее всякого меча обоуду остра, и проходяй до разделения души, и духа • Члонков же, и мозговъ • И судяй помышления, и умыслы сердечныя • И несть ни едина тварь невидима предъ Нимъ • Но вся нага, и открита очима Его, о Немже имамы к вам слово •

Імеющи же Светителя велика, прошедша небеса, Ісуса Сына Божия, соблюдимо жъ исповедание Его • Зануж не имамы святителя не могущего пострадаті немощем нашим • Но искушена по всему подобию, кроме греха • Да приходимъ убо со дерзновениемъ ко престолу благодати Его, и да пріимемъ милость, и благодат обрящемъ, во добревременную помощъ •

Всякій бо светител, от человек избраный, за человеки поставляется • Яже ко Богу да приносить дары, и жертвы о гресехъ • Равно смирениемъ скорбети могый, о невежъствующихъ и заблудшихъ • Понеже и той обложенъ естъ немощию • Сего ради долженъ ест • Якоже о людехъ, тако и о себе жертвы приносити о гресехъ •

І не собе кто приемлеть честь, но званый от Бога • Яко бо Ааронъ, тако и Христосъ, не Себе прослави быти светителя, но глаголавый к Нему: Сынъ Мой еси Ты Азъ днесъ родих Тя • Якоже и инде глаголеть: Ты еси свещенникъ во веки, по чину Мелхиседекову • Онъ же во дни плоти Своея, молитвы и моления • Ку Могущему спасти от смерти, с воплемъ крепкимъ, и съ слезами приносяше • И услышанъ бысть для доброчестия • Ибо и Сынъ сый, навчися от тыхъ еже пострада послушания • И скончався, бысть всемъ послушающимъ Его повиненъ ко спасению вечному • Нареченъ от Бога Светитель по чину Мелхиседекову •

О Немже многа к вамъ имамы слова, и трудносказателна глаголати • Зануж лениви сталистеся ко слуханию • Ибо должни есте быти учителми, летъ ради • Опять требуете да быхомъ учили васъ, еже суть составы начатку словесъ Божіих • И бысте яко тіи иже потребують млека, а не крепкія піща • Всякій бо поживая млека, неискусенъ бывает слову правде, младенець убо естъ • Совершеныхъ пакъ твердая пища • Ониже от звычая имеють чувъства искушена, ко разсужению доброго, и злого •

Темже оставивше еже о Христе простая словеса • На совершеная ведемся, да не паки надеющеся на основание покаяния, мертвая дела чините • А ни на веру Божию • А ни на крещение, ни на навчение, или возложение руку • Понеже имамы из мертвыхъ воскреснути, и суду вечному предстати • А се сотворимъ внегда Богъ повелит •

Невозможно бо тымъ ониже единою просветишеся, вкусивше дара небеснаго • И причастники бывше Духа Святого • И навчившеся добраго слова Божия, и силы будущего века • Вопадшимъ во грехы, паки обновлятися во покаяние • И знову распинающе сами в собе Сына Божия, и поругающеся Ему •

Земля бо приемши, иже на ню многажды гредущего дождя • И ражающа былину добру, тымъ ониже делають ея • Берет благославение от Бога • А износяюща терние и волчець, непотребна ест, и близка клятъвы, и пожжения •

Надеемся же о васъ братия возлюбленная лучшая, и близшая ко спасению аще и сице глаголемъ • Не обидливъ убо ест Богъ, дабы забылъ дела ваша, и труды еже чинисте въ любви • Уповающе на имя Его • И послуживше святымъ, и еще служаще • Жедаем же васъ единаго каждого, тое жъ являти тъщание, ко выполнению упования даже до конца • Да не лениви будете • Но наследуйте тыхъ, ониже верою и долготерпениемъ, приняли обетования •

Аврааму бо обетова Богъ • И понеже ни единым имеаше болшимъ клятися • Клятся Самъ Собою глаголя: во истинну благославляя благославлю тя, и множа умножу тя • А тако долготерпевъ улучи обетование • Человеци убо болшимъ кленутся, и всякому их прекословию, к потвержению конец ест клятва • И тако Богъ хотяй показати болшее наследникомъ обетование, и непреложность совета Своего, закляся клятвою • Да двема вещма непорушенныма • Имиже невозможно солгати Богу, крепко утешение имамы притекающие ко предълежащему намъ упованию, еже яко осънование сожержить душу • И твердо, и известно, и входяще во внутреняя завеса, идеже предтеча о насъ вніиде Христосъ • По чину Мельхиседекову, Первосвещенникъ бывъ во веки •

Сей убо Мельхиседекъ царь Салимскій, свещенник Бога Вышнего, стрете Авраама возвращающася от сечи царей, и благослави его • Емуже и десетину от всехъ отдели Авраамъ • Онже первое исказуется царь правде • Потом царь Салимескъ, еже естъ царь смирения • Незънаема отца, и незнаемы матере, и незнаема роду • Ни начала днемъ, ни животу конца имея • Уподобленъ Сыну Божию, пребываеть свещенникъ всегда • Видте жъ коликовъ былъ сей, емуже и десетину далъ естъ от изъбранных речей Авраамъ патриарха • Сынове пак Леивиевы свещенничество приемлющеи, приказание имають в законе • Десятину брати от людей, то ест от братіи своей, и паче вышедшее от бедръ Авраамовыхъ • Сей же Мельхиседекъ не причитаемъ родомъ онехъ • Десятину възялъ от Авраама • И имущему от Бога обетования далъ благославение •

Безъ всякого же прекословия • Меншій от болшего благославяется • Изде убо умирающие человеци, десятины приемлють • Тамо же сведетелствуемъ яко живъ ест • И к тому речемъ • Яко во Аврааме одесятьствованъ ест и Леивіа самъ, приемляй от иныхъ десятины • Еще бо в бедрахъ отчиих бе, егда стрете его Мельхиседек •

Аще бы было совершено леивитское свещенъство • Людие бы на то възаконены быша были • Чтожъ еще потреба по чину Мельхиседекову, иному востати свещенству, а не по чину Ааронову нарицатися? Прелогаему же свещенству, по нужди и закона преложение бываеть • О Комже сия глаголются, от иного естъ поколения • От негоже никто олътареви причастися • Явно убо ест, яко от поколения Іудова, восия Господь нашъ • И ничтоже Моисей глагола о свещенничсьтве сего поколения •

И еще болей явно естъ • Аще по подобию Мельхиседекову востаеть свещенникъ инъ • Онъже не заповедем закона плотна поставлен бысть • Но по силе жизни неразрушное, сведетелствуеть бо о немъ сее • Иже: Ты еси свещенник во веки, по чину Мельхиседекову •

Отложение пакъ бываеть прежде бывъшей заповеди • Для неможности, и невжитечности ея • Никого бо къ соверъшению приведе закон • Но привожение ко лепшему упованию сталося ест Ісусъ Христом, имъже приближаемся къ Богу • И поелику не без клятвы, они бо без клятвы вчинены суть свещенници • Сей же с клятъвою глаголющего ради к Нему: клятся Господь и не раскается • Ты еси свещенникъ во веки по чину Мельхиседекову •

И тако лепшего закону бысть испоручникъ Ісусъ • Они бо множайши бываху свещенници, занеже смерть возбраняше имъ долго пребываті • Сей пакъ понеж пребывати Ему во веки, непреступно имать свещеньство • Темже и спасти до конца можеть, приходящихъ Его ради ко Богу • Вседа живъ сый, да и припоминаеть о насъ •

Таковъ убо намъ подобаше быти Первосвещенникъ: милосерденъ, незлобивъ, нескверненъ • Отлученъ от греховъ, и вышей небесъ бывъ • Онже не потребуеть по вся дни яко иніи свещенници • Первое о своих гресех жертвы приносити, потом же о людьскыхъ • Сее бо вчинилъ ест единою, внегда Самого Себе вознесе • Законъ убо поставляеть человеки первосвещенники имуще немощъ • Слово же клятвеное Божие, еже бе по законе • Сына установи совершена во веки •

Глава же о глаголемыхъ ест сия • Светыни служител и храму истинны • Егоже постави Богъ, а не человекъ •

Всякій убо первосвещенникъ, приносити дары и жертвы поставляется • Темже потреба ест имети что и Сему еже принесеть • Аще было бы то на земли, не бы былъ первосвещенникъ • Сущим многымъ свещенникомъ приносящимъ по закону дары • Ониже образом, и уподоблениемъ служать небеснымъ • Якожъ и явлено бысть Моисееви хотящему совершити храмъ • Вижь бо рече, сотвориши вся по образу показаному тобе на горе • Ныне же Ісусъ лечьшее улучи свещенство, елико и болшему закону ходатай бе • Иже налепшая обетования утвердися •

Аще убо первый законъ былъ бы непороченъ, не бы второму искалося место • Уничижевая бо их Богъ глаголеть к ним: се дние грядуть, рече Господь • И соверъшу на дом Ізраилевъ, и на домъ Іудовъ закон новъ • Не по закону еже сотворихъ отцемъ их • Во день внегда взяхъ е за руку, изъвести их от земли Египетския • Яко тіи не пребыша в законе Моемъ • И Азъ не радихъ о них, глаголеть Господь • Яко сей естъ заветъ еже завещаю дому Ізраилеву, по днехъ онехъ рече Господь • Дамъ законъ Мой во мысли их, и на серцехъ их напишу и • И буду имъ въ Богъ, и они будуть Мне в люди • И не будуть вчити единый каждый ближнего своего, и каждый брата своего глаголя: познай Господа • Понеже вси познають Мя, от найменшего даже до найболшего с нихъ • Яко милостивъ буду неправдам их • И грехов их, и безаконіей их не помяну к тому • И тако внегда глаголеть о новом законе обетша первый, а обетшавый, и состаревыйся близ ест истленія •

Имеаше убо первый законъ место ко оправданию служебъ • И светыню людскую • Сень бо совершена бысть первая • В нейже бе светилник, и столъ, и предложение хлебовъ • И сия называшеся светыня • За второю же завесою бе сень, глаголемая Светыня Святыхъ, имеющи в собе златую кадилницу, и скріню завета оковану всюду златомъ • В нейже бысть ручка златая имущи манну, и жезлъ Аароновъ процветшій • И дщъкы завета • Над нею же быша два херувима славы осеняюще молитовницу • О нихже не естъ треба ныне глаголати по части • Сим же тако устроенымъ • Во первую пакъ сень на каждый день вхожаху свещенници, службы соделавающе • Во вторую же одинова в лете самъ толико первосвещенникъ, въходяше съ кровию • Юже приносяше о собе, и о людскихъ невежствиих •

Сие было знаменовано Духомъ Святымъ, не уже бо былъ явленъ путь до небес, первому храму имеющу стояние, иже был притча времени оного настоящего • В неже дарове и жертвы приносяхуся не могуще, въ совести совершити служащего • Толико во брашнехъ, и въ питиехъ, и в различных омываниехъ, и оправданиих телесных, даже до времени исправления наложены быша •

Христосъ же пришедъ Архиерей будущего добра • Во болшій, и совершенейшій храмъ нерукотворенный • Сей ест не сею тварию • Ни с кровию козлею, и юнъчею • Но Своею Кровию вніиде единою во святая • Вечное избавление обретъ • Аще бо кров агнъча, и козля • И попелъ юнице, окропляющи • Оскверненыя освещаеть, ко плотской чистоте • Многымъ болей Кровь Христова, Онже Духомъ Святымъ Себе принесе непорочна Богу • Очистить совести наша от мертвыхъ делъ • Да послужимъ Богу живому, и истинному •

И сего ради завету новому ходатай ест • Яко да смерти Его бывшей во избавление, еже во первомъ законе беша преступления • Обетование пріимуть званіи, вечнаго наследия • Понеже игде ся дееть заветъ, потреба естъ, абы смерть была завещевающего • Завет бо смертию бываеть потверженъ, и ничьтоже можеть поколе живъ ест завещаваяй • Темже и первый заветъ не без крови потъверженъ бысть • Внегда убо Моисей поведилъ вся заповеди по закону предъ людми • Взялъ кровь тельчию, и козлию с водою, и волною червленою, и иссофомъ • Саму тую книгу, и вся люди окропи глаголя: сия кровь завета, иже заповеда къ вамъ Богъ • Храм же и вся сосуды служебныя кровию такожде покропи • И отнудь по закону вся кровию очищаются • И безъ пролития крови не бываеть оставление • И тако потреба естъ, аще уподобления тых еже суть на небесехъ, таковыми очистяются • Самемъ небеснымъ, лепшими жертвами паче сих очистятися •

Не во рукотвореную бо светыню внииде Христосъ, образующу истинную • Но в самое небо, да явится ныне лицу Божию о насъ • А ни теже потреба естъ, да многажды приносить Себе Самого за насъ • Якоже первосвещеник, входяше во Светыню Светыхъ • На каждое лето съ чуждею кровию • Понеже имелъ бы многократъ пострадати от сложения миру • Ныне же единова въ кончине векъ, на отметание греха с жерътвою Своею явися • И якоже уставлено естъ человекомъ единою умрети • Потом суду быти • Такожъ и Христосъ единова приведеся да вознесеть многыхъ грехы • Второе же без греха явится ждущимъ Его верою во спасение •

Стень убо имея ветхій закон пріидущего добра • И не имый в собе совершения • Понеже на каждое лето тыми жъ жертвами, яже приносят всегда, николи могуще приходящихъ совершити • Уже бы престали быша приношения, занеже ни единое имели бъ совести греховныя, принесши единова, и очистены суще • Но въ тых же воспоминание бываетъ греховъ на каждый годъ • Невозможно бо крови юньчей, и козлей отпущати грехы • Темже входяй в миръ Христосъ глаголеть: жертвы и приношения не восхотелъ еси, тело же совершилъ еси Мне • Всесожжения и за грехы не возыскалъ еси • Тогда рехъ: се пріиду • Во главизне книжной писано ест о Мне, еже сотвориши Боже волю Твою •

Вышей глаголя: яко жертвы, и приношения, и всесожжения, и о гресехъ не восхоте, ни возыска • Еже по закону пріносятся • Тогда рече: се пріиду сотворити Боже волю Твою • Отемлеть первое да поставить второе • И в той воли посвещени есмо, приношениемъ тела Ісусъ Христова единою •

Всякій бо свещенникъ стоить на каждый день служай, и тые жъ многажды приносяй жертвы, еже николи могут отняти греховъ • Той же единою о гресех принесе жертву, и седе на веки одесную Бога • Толико ждеть дондеже положатся врагы Его пожножие ногама Его • Единым бо пришествиемъ совръши навеки освещаемыхъ •

Сведетелствуеть убо намъ и Духъ Святый • Внегда рече: Се заветъ еже завещаю к нимъ по днехъ онехъ глаголеть Господь • Даю законъ Мой во серца их, и въ мышления их напишу и • И греховъ их, и безаконией не воспомяну к тому • Внегда же симъ бысть оставление грехомъ, несть потребно къ тому приношение жертвы о гресехъ •

Імуще жъ братия дерзновение о вніитіи во святыню Кровию Ісусовою, Онже обнови намъ путь спасения и жизни, прикривъ божество плотию Своею • Сый Свещенникъ великій дому Божия • Приступмо к Нему истиннымъ серцемъ, во правой вере, окроплены имеюще смыслы от совестей злыхъ • И омыты тела водою чистою • Да содержимъ исповедание упования нашего неуклонно • Веренъ убо естъ обещавый намъ •

И будмо пильни друг друга, приводяще к любви, и ко добрым деломъ • Не оставляюще сонмища своего, якоже некіи имають во обычаи • Но утешающе единъ другаго • И тымъ болей, занеж видите приближающъся день Господень • Волею бо согрешающимъ намъ по приятіи разума истинны, к тому о гресехъ не обретается жертва • Но сташного неякого ожидание суду, и огня прикрого, поясьти хотящего супротивныя •

Аще убо преступающій законъ Моисеовъ, без милости при дву или трехъ сведетелехъ умираеть • Колицей мните горшей сподобится муце, онже Сына Божия презре, и Кровь заветную Его в непочтивости имат в нейже осветися, и Духъ благодати укори? Вемы бо рекшего: Мне отмщение, Азъ воздамъ, глаголеть Господь • И паки: Господь судить людемъ Своимъ • Страшно же естъ упасти в руце Бога живаго •

Воспоминайте ж первыя дни ваша, в нихже просветившеся, многыя муки претерпесте страданией • Часто убо поношения, и печали приемлюще въ позоръ бысте всемъ • Часто теже общеніци таковая терпящимъ бесте • Ибо и моимъ соузомъ пострадасте • И расхищения имениемъ вашимъ с радостию подъясте, ведуще сее иже будете имети лепшее, и пребывающее имение на небесехъ •

Не отложите убо упования вашего, еже имать мздовоздание велико • Терпения бо имате потребу, да волю Божию сотворше, пріимете обетование • Еще ж мало часу, и Той Онъже пріити имать, пріидеть, и не замедлить • Праведный же верою живъ естъ • И аще отверъжеться веры, не благоволить душа Моя в немъ • Мы же не отверзаймыся да не будем сынове погибели • Но пербываймо въ вере, да спасемъ душе наше •

Естъ же вера надеемымъ вещем составъ, и обличение невидимым, в тоі бо сведетелствовани быша отцеве старіи • Верою поразумеваемъ совершитися векомъ словомъ Божіимъ, да от невидимыхъ, видимымъ вещем быти •

Верою приатнейшую жертву Авель, нежели Каинъ, принесе Богови • Еяже ради сведетелствовася быти праведенъ • Сведетелствующу о дарехъ его Богу • И того для мертвъ сый, еще воспоминается • Верою Енохъ преставленъ бысть, дабы не виделъ смерти • И не обреташеся занежъ пренесе и Богъ • Прежде бо пренесения его сведетелствованъ естъ угодити Богови • Без веры пакъ невозможно угодити Богу • Протож потреба веровати приходящему к Нему иже Богъ ест • И возыскающимъ Его мьзду воздатель бываеть •

Верою проповедь приялъ Ное, о речахъ николиже виданыхъ • И убоявся приправовал ковчегъ, во соблюдение дому своему • Имже осуди весъ миръ потонути • И бысть самъ наследникъ во правде, юже имеаше от веры •

Верою зовемый Авраамъ, послуша Бога, изыйде в место идеже хотяше прияти наследие, и иде самъ не ведый камо грядеть •

Верою живяше Авраамъ на земли обетованной яко на чуждей, вселився во кровы, со Ісаакомъ, и Іаковомъ, с наследники тогожде обетованія • Ждаше бо основания будущего града, емуже хытрец, и содетел бысть Богъ •

Верою такоже и Сарра неплодна сущи • Силу ко зачатию семени приняла естъ, и в неподобные лета в старости роди • Понеже верна умени обащавшего • Темже и от мужа ея якобы наполы вже умерщвленаго розплодишеся • Яко звезды небесныя множествомъ • И яко песокъ иже по брегу морскомъ безчислены •

Въ вере изомроша сии вси, не приемши обетованія, но здалеча е видеша, и ожидаша • Исповедающися, яко странници суть и пришельци на земли той • Ибо таковая глаголющие ведомо дають, иже отечества собе възыскають • И аще бы были на оно воспомянули от негоже вышли • Имели часу досыть возвратитися • Ныне же лепшего жадають • То естъ небеснаго • А для того не стыдится ими Богъ, нарицатися Богомъ их, уготова бо имъ градъ •

Верою приведе Авраамъ Ісаака искушаемъ • И единороднаго принесе на жертву, в немже принялъ былъ обетования • К нему бо глаголано бысть: яко во Ісааце наречет ти ся семя • Помысливъ иже и из мертвых силенъ естъ Богъ воздвигнути семя • Темже того и во притчу приал • Верою о будущемъ добре благослави Ісаакъ Іакова •

Верою Іаковъ умирая каждому сыну Іосифову далъ благославение • И поклонися на конець жезла его •

Верою Іосифъ скончеваяся • О исходе сынов Ізраилевыхъ паметь вчинилъ • И о костехъ своих заповедалъ •

Верою внегда Моисей родися, сокровенъ бысть три месеци от родителей своих, занужъ видеша красно отроча, и не убояшеся повеления царева •

Верою Моисей великъ бывъ, отвержеся нарицатися, сынъ дщеры фараоновы • Пачеже изъволи с людми Божиими страдати, нежли временную сладость греха имети • Болшее богатество въмени поношение Христово, нежели египетския сокровища • Возираше бо на мзду воздания • Верою остави Египетъ, и не убояся ярости царевы • Невидимаго убо Бога, якобы видяй последоваше •

Верою сотвори Пасху, и пролитие крови • Да всегубитель первородныхъ их не биеть •

Верою проидоша Чермное море, яко по суху земли, егоже покусивше Египтяне, истопишеся • Верою стены Ерихонския падоша • Оступлениемъ на седмъ дней •

Верою Раавъ блудница не погыбе со противящимися, приемши исходники с миромъ •

И чтожъ еще глаголю? Не достаеть бо мне ко исповеданию часу • О Гедеоне • О Вараце • О Сампсоне • О Самуиле • О Давыде • И о другыхъ пророцехъ •

Иже верою победиша царствия • Содеяша правду, получиша обетования • Заградиша уста лвомъ • Угасиша силу огнену • Убежаша от острия мечю • Возъмогоша от немощи • Быша крепци во брани, полки жъ обратиша чуждимъ • Приаша жены воскрешеныя мертвыя своя • Иные же изъбиени быша, не приемши изъбавления, да лучшее воскресение улучат • Друзіи пакъ руганиемъ, и ранами покушени быша, еще же и узами, и темницами • Камениемъ побиени быша, претрени быша искушени быша • Убійством меча умроша • Проидоша во овчиих гуняхъ, и во козиих кожахъ • Лишени, оскорблени, и озлобълени • Имъже не бе достоинъ весъ миръ • Въ пустыняхъ скитающеся, и в горахъ, и в вертьпахъ, и во пропастехъ земныхъ • И сие вси послушствовани верою, не приаша обетованія • Богу лучшее что о насъ прозревшу, да не без насъ совершени будут •

Темже убо и мы толикъ имуще облежащъ насъ облакъ сведетелей • Гордость всякую отложивъше, и удобь обретаемый грехъ • Терпениемъ течемъ, на предлежащій намъ подъвигъ • Возирающе на Началника вере, и Совершителя Ісуса • Онже вместо предлежащее Собе радости, претерпе распятие • И о студе не брегъ, седе одесную престола Божия • Помышляйте убо иже Сей таковое претерпе от грешникъ • И в собе прекословия не делайте душами вашими ослабяюще • Не вже бо противистеся греху, до кръве подвизающеся • И забысте утешения еже к вамъ, яко ко сыном глаголеть: сыну мой не заметай наказания Господьня, ниж ослабевай обличаемъ от Него • Егоже бо любить Господь наказуеть, биет же всякого сына егож приемлеть • Аще наказание терпите, яко сыномъ вамъ покажется Бог • Который убо естъ сынъ, егожъ не наказуеть отець? Такожъ и вы несте ли в наказаніи, егоже вси сынове причасници суть • Тогда любодейчата есте, а не сынове • Аще убо еже по плоти отца имехом, наказующа насъ доброму, и послушахом их • Не многым ли болей поддадимъ ся Отцу духомъ, и живи будемъ? Оніи бо во мало дней, яко любо имъ бе такъ научаху нас • Сей же ко лепшему нашему учить, да причастни будемъ светыни Его •

Всякое бо карание, в настоящее время • Не мнится радость быти, но печаль • Последы же воздаеть плодъ мирен правды, тым ониже искушени будуть в нем • Протож ленивыя рукы, и ослабленыя колена воздвигните • И стезя правы чините ногам вашим, да не храмлюще заблудите от путя правды, но более да исцелеете •

Миръ имейте со всеми, и чистоту сердечную • Без нея бо никтоже узрит Господа • Смотряще да никтож лишается от благодати Божия • А ни корень горести къ горе ростяй пакость чинить, таковым бо оскверняются мнози • И да не пребудеть в васъ блудникъ, а ни объжарца • Яко Ісавъ, онже за едину ядь прода первороженство свое • Весте бо яко и потом хотяй наследовати благославение • Отвержен бысть, покаянию бо места не обрете, ачей исъ плачемъ възыскалъ его •

Понеже не пріидосте къ горе неприступной, зазъженой огнемъ • И къ вихру, и къ мраку, и бури, и трубному звуку, и гласу глаголемому, егоже услышавше, отрекошеся да не приложить к нимъ слова, не терпяху бо глаголющего: но аще и скотина доткнется горы сее, камениемъ побиена будеть • И тако страшно бе видимое • Моисей убо самъ рече: престрашенъ есмъ, и трепетенъ • Но приидосте къ горе Сиону, и граду Бога жива, Иерусалиму небесному, и ко тмам Анъгел святыхъ • И ко церкви первороженныхъ, написаных на небесехъ • И къ Богу Судіи всех людей • И къ духом праведныхъ и совершеныхъ • И ко завета новаго Ходатаю Ісусу • И к Крови кропления лепей глаголющей, нежели Авелове •

Блюдите жъ да не отрецаетеся Господа глаголющего • Аще бо они не вбегоша помсты, еже отрецевахуся на земли бывающего • Многымъ болей мы естъ ли же отрецаемся небеснаго • Егоже гласъ тогда землю поколеба, но и ныне возвещая глаголеть: еще единова Азъ поколеблю не толико землю, но и небо •

А иже еще единова рече, сказуеть колебленымъ вещемъ пременение • Якож то от Него сотворенымъ • Да пребудут в целости, яже суть непоколебими •

Темже Царство непоколебимое приемлющи, имамы благодат еяже ради служмо добре угожающе Богові со стыдениемъ, и благоговениемъ • Ибо Богъ нашъ огнь попаляй ест •

Братолюбие же да пребываеть в васъ • И странънолюбия не забывайте, симъ убо не ведяще неціи, приаша Ангелы в домы своя • Поминайте узники, яко и вы с ними связани есте • И обыдимыя, яко и сами в телеси пребываете •

Честенъ бракъ да будеть во всемъ, и ложе нескверно • Блудникомъ бо, и прелюбодеемъ судить Богъ • Не сребролюбиви бывайте обычайми, но доволни теми иже имате • Той убо рече: не оставлю тебе, ниже отступлю от тебе • А тако дерзающе можемъ глаголати: Господь мне помощникъ, и не убоюся что сотворить ми человекъ?

Поминайте наставники ваша, ониже глаголаша вамъ слово Божие, на ихъже житие возирающе и отидоштие • Наследуйте е в вере • Ісусъ убо Христосъ, вчера и днесь тойже естъ, и будеть во веки • Ученми различными, и странными не превозношайтеся • Добро бо естъ благодатию утвержати серца а не брашны, еже не спомогоша ходящихъ в нихъ •

Имамы жертовникъ, от негоже не имуть области ясти, сени телесной служащие • Техъ животных ихже вносится кровь о гресехъ от первосвещенника во святыню • Сихъ телеса сожигахуся вне полъковъ • Темже и Ісусъ да осветит Своею Кровию люди вне вратъ пострада • Сего ради изыйдем к Нему въне полка, поношение Его носяще • Не имамы бо изде пребывающего града, но гредущего възыскаемъ • И того деля возъносимъ жертвы, и благодарения всегда Богови • Сей естъ плодъ устенъ исповедающихся имени Его • Милостыню давайте • И общения не забывайте • Тацеми убо жертвами угодите Богу •

Повинуйтеся наставникомъ вашимъ, и покаряйтеся имъ • Тие бо бдять о душахъ вашихъ, яко слово воздати хотяще • Да с радостию сия творять, а не со воздыханиемъ, не годится убо вамъ сее • Молитеся за насъ • Уповаемъ бо яко добрую совесть имамы, со всеми почтиве хотяще жити • И тымъ болей прошу васъ, сие чините да воскоре навращуся вамъ •

Богъ же смирения изведый изъ мертвыхъ, Пастыря овъцамъ великаго • Кровию завета вечнаго, Господа нашего Ісуса Христа • Да совершит васъ во всякомъ деле добромъ ко чинению воли Его • Творяй въ васъ все еже любо ест пред Нимъ • Ісусъ Христом Емуже слава, и держава во веки векомъ аминь •

Молю же васъ братия приимите слово утешения сего, ибо в мале написахъ вамъ • Знайте брата нашего Тімофея, посланого къ вамъ, с нимже аще скоро пріидет, увижду васъ • Целуйте вся стареішины ваша и вся святыя • Целует вас вся Італія • Благодат со въсеми вами аминь •