Ко Філимону

Павелъ связень Ісусъ Христовъ, и Тімофей братъ • Філимонови возлюбленному и споспешнику нашему • И Апіи сестре возлюбленней • И Архиппу сущему воину с нами • И домашнему твоему собранию • Благодат вам и миръ от Бога Отца нашего • И Господа Ісуса Христа • Благодарю Бога моего всегда воспомінание творяй о тобе в молитвахъ моих • Слыша твою любовь, и веру • Юже имаши къ Господу Ісусу, и ко всемъ святымъ • И да общение веры твоея содеанно будеть въ разуме всякого добра, еже о Христе Ісусе • Радость же имамъ многу, и утешение о любви твоей, зануж утробы святыхъ почіша тобою брате • Прото ачьколве имаю дерзновение о Христе повелевати тобе, еже ест достойно • Но любве для радней молю, таковъ сый яко Павелъ старець, и молитвеникъ, ныне же и узникъ Христовъ •

Прошу тя о моемъ сыне, егоже породихъ во узахъ моихъ, Онисима • Онъ бо былъ ест иногда ти непотребны • Ныне же и мне и тобе велми потребенъ • Сего отпустихъ к тобе, ты же пріими его яко власную утробу мою • Хотел убо былъ азъ радъ его у себе держати, дабы вместо тебе послужилъ мне во узахъ моихъ, еже терплю для благовестования Христова • Но безъ твоея воли не изволих того учинити • Да не будеть твое доброе яко по нужди, но по воли • Могъ бо на часъ от тебе отлучитися • Да вечно его пріимеши, не к тому яко раба • Но вышей раба, и яко брата возлюбленна • Вельми мне милого, колико болей тобе, и плотию, и о Господи • Аще имаши мене обещника, пріими ж и сего яко и мене • Пак ли что будеть проступил пред тобою, или чимъ долженъ ест тобе • Сия мне вмени • Азъ убо Павелъ написахъ своею рукою, азъ и искуплуся • Да не реку тобе, яко и ты самъ собою мне еси долъженъ • Тако брате воздай ми о Господи • И потеши серце мое о Христе • Надеяся бо на послушание твое писах ти • Ведый яко и более нежели глаголю тобе учиниши • К тому зготуй ми у себе обитель • Уповаю бо яко молитвами вашими, дарован буду вамъ • Целует тя Епафрасъ сопленникъ мой о Христе Ісусе • Марко • Аристархъ • Дімасъ • Лука, споспешници мои • Благодать Господа нашего Ісуса Христа с духом вашимъ аминь •