К Титу

Павелъ рабъ Божій, посланникъ же Ісусъ Христовъ, по вере изъбранныхъ Божіихъ, и по познанию истинны, еже естъ по благочестию, во упованіи жизни вечныя • Юже обетова неложный Богъ, прежде летъ вечныхъ • Яви же временьми своими слово Свое • Проповеданиемъ еже предано бысть мне • По повелению Спаса нашего Бога •

Тіту любимому сыну, во общей вере • Благодать, милость и миръ • От Бога Отца, и Господа Ісуса Христа, Спаса нашего • Сего ради оставих тя во Крите, да несовершеная исправиши • Аще кто естъ без вины, единой жене мужъ, чада имея верна • Необжалована блудомъ, или непокорениемъ •

Подобает же епископу бес порока быти, яко Божию стоителю • Ненапрасливу, негневливу • Не пианици, не бійци, не злесобирателю • Но приветливу, добротливу • Целомудрену, праведну • Милосердну, воздержливу • Пособствующу от учения по верномъ словеси • Да силенъ будеть утешати во здравомъ навченіи, и противящихся обличати • Суть бо мнози непокориви, и празнословъци, и ума лестьци • Найболей тыи, еже суть от обрезания • Ихже подобаеть воздержати • Ониже вся домы претваряють, учащ яже не подобают, сквернаго прибытка деля • Рече некій от нихъ, власный их пророкъ: Критяне всегда лъживи, злые зверие, утробы праздны • Сведетелство сее ест истинно • Еяже ради вины обличай техъ грозне, да здрави будуть в вере, не слухающе Іудейских басен • И заповедей человеческых, отвращающих от истинны •

Вся бо суть чиста чистым, оскверненым пакъ, и невернымъ ничтоже чисто • Но осквернися имъ умъ и совесть • Бога исповедують ведети, делы же Его отметаются • Мерзъци суть и непокориви, и на всяко дело добро неискусни •

Ты убо глаголи яже подобають здравому учению • Старцемъ, да будут трезвъливи, чисти, целомудрени • Здрави верою, любовию, и терпениемъ •

Старые жены по тому же да ходять во одеании почтивом, не навадници, не много вина пиюще • Доброму навчающе, да уцеломудряють младыхъ • Мужи своя любити, чада миловати • Да будуть набожны, чисты, добротливи • Домы своя пильне справующе, и мужем ся покаряюще • Да слово Божие, и учение не похулится • Младенцев такожде напоминай да будут воздержъливи • А во всехъ речахъ себе самого подавай образъ добрымъ деломъ, во навченіи, во целомудріи, во почтивости • Слова имей здрава, и незазорна • Да противяйся правде посрамится, ничтоже имея о насъ глаголати хулна •

Рабомъ глаголи своей господе покарятися, и во всемъ угоднымъ быти • Не пререкующе, не крадуще • Но веру добру являюще, да учение Спасителя нашего Бога, украшають во всемъ •

Явися убо благодать Божия спасителная всемъ человеком • Наказующе насъ да отвергшеся нечестия, и мирских похотей • Целомудрено, и праведно, и благочестно поживемъ во нынешнемъ веце • Ожідающе блаженаго упования, и явления славы, великаго Бога и Спаса нашего Ісуса Христа, Онже далъ ест Себе Самого за насъ • Да избавить насъ от всякого безакония • И осветить Собе людие богатны, последующе добрые дела •

Сия глаголи, и моли, обличай со всяким повелениемъ, и да никтоже погордить тобою •

Воспоминай имъ, да началомъ, и властем повинуются, и покаряются, ко всякому делу добру готови суще • Ни единого хулити, ни сваръливымъ быти, но кроткимъ • Являюще всяку тихость, ко всемъ человекомъ •

Бехом бо некогда и мы неразумливи, непокориви, заблужаемы • Работающе похотемъ, и сластемъ различнымъ, во злобе и зависти живуще • Мерьзци, ненавидяще другъ друга •

Егда же благодат, и человеколюбие, явися Спасителя нашего Бога • Не от делъ праведныхъ, еже мы чинихомъ • Но по Своему милосердию спасе насъ • Банею паки бытейскою, и объновлениемъ Духа Святого, Егоже излия на насъ богатно, Ісусъ Христомъ Збавителемъ нашимъ • Да оправдившеся Того благодатию, наследници будемъ упованию жизни вечныя •

Верно слово, и о сихъ хощу да ты иныхъ утвердиши, да попекутся о добрыхъ делехъ приставници веровавшіи Богови • Сия бо суть потребна, и пожиточна человеком •

Безумных же пытанией, и вычитания родовъ, и сваровъ, и преній законныхъ отступай • Суть бо неполезни и суетни •

Еретика человека по единем, и второмъ наказаніи отрицайся • Ведый яко совратися таковый • И согрешаеть сый самъ осуженъ •

Егда пошлю Артему к тобе, и Тіхика • Поспеши пріити ко мне в Никополь, ту бо умыслихъ на зиму остати • Зина в законе навченого, и Аполоса, с пилностию отпровади, да ничто има скудно будеть • Да учатся же и наши добрымъ деломъ прилежати • В нужныхъ потребахъ да не будуть бесплодни, целую тя сущии со мною вси • Целуй любящихъ насъ в вере • Благодат со всеми вами амин •