2 ко Тимофею

Павелъ Апостолъ Ісусъ Христовъ, волею Божиею, по обетованию жизни, иже ест во Христе Ісусе • Тімофею возълюбленному чаду • Благодать, милость, и миръ от Бога Отца, и Христа Ісуса Господа нашего • Благодарю Бога моего Емуже служу от прародитель своих, чистою совестию, яко всегда имамъ твое воспоминание в молитвахъ моих, день и нощь • Жедая видети тя • Поминая твое слезы, да радостию исполнюся, паметование приемля твоея нелицемерныя веры • Еже пребыла первее во бабе твоей Лоіде • И въ матери твоей Евникіи • Известно ми же ест, яко и в тобе пребываеть •

Еяже для вины воспоминаю ти возгревати даръ Божій, иже естъ в тобе, возложениемъ руку моею • Не далъ бо естъ намъ Богъ духа страху, но силы, и любве, и целомудрия •

Не постыдися убо сведетелством Господа нашего Ісуса Христа • А ни мною связнемъ Его • Но постражи со благовестованиемъ, по силе Бога спасшего насъ • И звавшего званиемъ святым • Не по деломъ нашимъ • Но по Своему прозрению, и по благодати даней намъ • О Христе Ісусе прежде лет вечныхъ • Но явльшейся ныне просвещениемъ Спасителя нашего Ісуса Христа • Разрушившего смерть и просветившего животъ, и нетление Евангелиемъ Своимъ • В немже поставленъ быхъ азъ проповедникъ, и Апостолъ, и вчитель языкомъ • Еяже вины для и сия стражу, а не стыжуся • Вемъ бо в Негоже верую, и уповаю яко силенъ ест мъзду мою сохранити, даже до дня оного •

Образъ имей здравым словесемъ, еже слышалъ есь от мене в вере, и в любви яже о Христе Ісусе • Доброе предание соблюди, Духомъ Святымъ живущимъ в насъ •

Веси ль сее яко отвратишеся от мене вси, иже суть во Асіи • От нихже ест Фігель, и Ермогенъ • Да дасть милость Господь Онсифорову дому, яко многажды мя упокои • И ретезей моих железных не постыдеся • Но в Римъ пришедъ, пилне возыска мя и знайде • Дай же ему Господь да знайдеть милосеръдие от Бога во день онъ • И яко многымъ послужилъ естъ во Ефесе, ты добре веси •

Ты убо сыну мой Тімофею возмагай о благодати, еже ест во Христе Ісусе • И еже слышалъ есь от мене многыми сведетели, сия предай верным людемъ, ониже годни будуть и иныхъ навчити • Самъ пакъ постражи яко добръ воинъ Ісусъ Христовъ • Никто бо воинъ бывая, обязается куплями житейскими, да воеводе угоденъ будеть • Аще и постражет кто не венчается • Аще не законно мученъ будеть • Тружающему делателю подобаеть прежде от плода вкусити • Разумей еже глаголю • Дасть бо тобе Господь разумъ во всемъ • Поминай Господа нашего Ісуса Христа, воставшего из мертвых, от семени Давыдова, по благовестованию моему • Во немже стражду до узъ яко злодей • Но слово Божие не вяжется • Сего для вся терплю, избранныхъ ради • Да и тіи спасение улучат еже ест о Христе Ісусе, с славою вечною •

Верно слово: аще с Нимъ умрохомъ, то с Нимъ и оживем • Аще терпим, то с Нимъ и воцаримся • Аще отвержемся Его, и Онъ отвержется насъ • Аще не веруемъ, Онъ веренъ пребываеть • Отврещи бо Самъ Себе не можеть • Сия воспоминай засведетелствуя предъ Господемъ • Поспеши себе искушена поставити Богови, делателя непостыдна, правяща слово истинное • Скверъная же тъщеглаголания отметай • Вельми бо преуспевають в нечестие, и слова их яко чирей злый недугъ разъедаются • От нихъже ест Іменей • И Філет • Еже от истинны погрешиша, глаголюще воскресение уже было ест • И тако возмущають некоторымъ веру •

Твердое же убо основание Божие стоит, имея печат сию: и знаеть Господь еже сут Его • И да отступить от неправды всякъ именуя имя Господьне •

Во великомъ же дому не толіко суть сосуды златые, и сребряные • Но древяные, и глиненые • И некои въ честь, иные же не в честь • Аще убо кто очистит себе от сих • Будеть сосудъ въ честь, посвящен, потребен владыце и на всяко дело добро уготованъ •

От юношеских похотей бегай • Наследуй же правду, веру, любов, миръ, со всеми призывающими Господа чистымъ серцемъ •

Безумныхъ пакъ и ненаказаныхъ пытанией отрицайся, ведый яко ражають свары • Рабу же Господьню не подобаеть сваритися • Но тиху быти ко всемъ, учителну, незлобиву • Во кротости наказующу, противящихся правде, еда како дасть имъ Богъ покаяние ку познанию истинны • И возникнути от сети диавола • Еюже уловлени суть от него, во того хотение •

Сее же разумей, яко во последняя дни • Настануть времена люта • Будуть бо человеци самолюбци, горди • Сребролюбци, величавы, хулници, родителемъ непокориви • Немилосердни, неучьтиви • Нелюбителе, неветохранителе • Подръзливи, неспокойни • Невоздеръжеливи, некротци, недобротливи • Предателие, нагли • Споръни, возносливи • Сласти любяще более нежели Бога • Имуще образъ благочестия, силы же Его отвергъшеся • Сих отвращай •

Неціи же от них суть туляющися по домохъ • И имающе жены • Обтяжены грехми, водимі похотми различными • Всегда учащеся, николіже в разумъ истинный могуща пріити •

Яко убо Анній, и Амврій противистася Моисеови • Тако и сие противятся истинне • Человеци разтленни умомъ, блудни в вере • Но не преуспеють более • Занужъ безумие их, явно будеть всемъ • Якоже и онехъ бысть •

Ты же последовалъ еси моему учению житию, привету, вере, долгоожиданию, любви, терпению • Изъгнаниемъ, и страданиемъ • Якова ми быша во Антиохіи, и во Иконіи, и в Листрех • Каковы противности терпехъ • И от всехъ изъбави мя Господь •

Но и вси хотящеи благочестно жити о Христе Ісусе, изъгнани будуть • Лукавіи же человеци, и сводителі вознесутся, и приспеють со злого во найгоръшее • Прельщающе, и прельщаеми •

Ты же пребывай в тыхъ, в нихже научился еси • И еже уверена суть тобе, ведый от кого принялъ есь • И яко изъмлада Святая Писания умееши, могущая тя умудрити ко спасению, верою еже о Христе Ісусе •

Всякое Писание Богомъ водухновенно, полезно естъ ко вчению, ко обличению, ко исправлению, к наказанию во правду • Да совершенъ будеть Божій человекъ, и на всяко дело добро уготованъ •

Засведетелствую убо азъ предъ Богомъ, и Господемъ Ісусъ Христомъ • Онже имать судити живымъ, и мертвымъ, во явленіи Своемъ, и во Царствіи Своемъ • Проповедай слово Божие • Настой в добро время, и во зло время • Обличи, запрети, умоли во всякомъ долготерпеніи, и ученіи • Будеть бо время егда здравого учения не послушають, но по своимъ похотемъ выберуть собе учители, тешущеи слухы • От истинны убо уши своя отвратять а на басни уклонятся •

Ты пакъ трезвися во всемъ, тружайся • Делай дело доброизвестователя, служение свое скончай • Азъ бо уже на муку готуюся • И время моего отшестьвия настава • Подвигомъ добрымъ подвизахся • Течение скончахъ, веру соблюдохъ • Темже щадить ми ся правде венец, иже воздасть мне Господь во день онъ, праведный Судия • А не толико мне, но и всем любящимъ явление Его •

Поспеши скоро пріити ко мне • Дімас бо мя оставилъ возлюбив нынешній векъ, и иде во Селунь • Криспъ в Галатию • Тітъ в Далматию • Лука естъ единъ со мною • Марка поемъ приведи съ собою, естъ бо ми добръ во служение • Тіхика же послалъ есми во Ефесъ • Плащъ иже оставихъ во Троаде у Карпа, внегда пойдеши принеси ко мне, и книги найболей хратьяны •

Александръ ковачь много зла мне створилъ • Да воздасть ему Господь по деломъ его, тогоже и ты хранися • Вельми бо противится нашимъ словесемъ •

Во первый мой ответъ, предъ кесаремъ, никтоже пріиде со мною, но вси мене оставиша, да не вменится имъ во зло • Господь же мне предста, и укрепи мя • Да мною проповедь изъвестится, и да слышать вси языци • И изъбавленъ быхъ от устъ львовъ • Изорветь мя Господь от всяко дела злого, и спасет во Царствіи Своемъ Небесном, Емуже слава во веки векомъ аминь •

Целуй Прискилу, и Акилу • И Онисифоров домъ • Ерастъ остался естъ в Коринфе • Трофима же оставих в Милете боляща • Поспеши прежде зимы пріити ко мне • Целують тя Евулъ, и Пуденъ, и Линъ, и Клявдіи, и братия вся • Господь Ісусъ Христосъ з духом твоимъ, благодат с вами аминь •