1 ко Тимофею

Павелъ посланникъ Ісусъ Христовъ, по повелению Бога Спаса нашего, и Господа Ісуса Христа упования нашего • Тімофею родному чаду в вере • Благодать, милосердие, и миръ, от Бога Отца нашего • И Христа Ісуса Господа нашего •

Якоже умолихъ тебе, пребыти во Ефесе, внегда идохъ во Макидонию • Да запретиши некоимъ инако не вчити • А ни послухаши басней их, и ни вычитания родовъ неискончаемых, еже стязание более чинят, нежели сооружение во вере Божией • Конець убо всемъ заповедемъ, естъ любовъ от чиста серца, и совести доброе, и веры нелицемерное • От неяже неціи поблудивше, уклонишеся во празнословие • Хотяще быти законоучителие • Не разумеюще что глаголють, или о чемъ утвержаются •

Вемы убо иже добръ естъ законъ, аще кто имъ законне дееть • Ведый сее, яко праведному законъ несть наложенъ • Но несправедливымъ, и непокоривымъ • Немилостивым, и грешникомъ • Неучьтивымъ, и скверным • Отце досадителемъ, и матери досадителемъ • Убійцам, блудникомъ • Мужеложникомъ, скотоложникомъ • Илъгаремъ, кривоприсяжцемъ • Татемъ, клятвупреступникомъ • И аще ест что ино таково, иже здравому учению противляется • Еже ест по Евангелию благословенаго Бога • Емуже веренъ бых азъ •

И благодать имамъ укрепльшему мя Ісусъ Христу Господу нашему • Яко верна мя суди, поставивъ во службу свою • Иже первее бывша хульника, и гонителя, и мучителя • Но помилованъ быхъ, яко неведый чиних тое во неверствіи • Преумножися же благодать Господа нашего • С верою и любовию еже во Христе Ісусе •

Верно слово, и всякому ко приатию достойно • Яко Христосъ Ісусъ пріиде в миръ грешники спасти • От нихже первый есмъ азъ • Но сего ради помилованъ быхъ • Да на мне первее покажеть Ісус Христосъ всяко долготерпение ко образу хотящим веровати в Онь, в животъ вечный • Цареви же вековъ несмертелному, невидимому, единому премудрому Богу • Честь и слава, во веки аминь •

Сию заповедь предаю тобе чадо Тимофею • По прежде бывших в тобе пророчствахъ • Да воюеши в них доброе воинъство • Имея веру, и добрую совесть • Еяже неціи отринувше, поблудиша в вере • От нихъ ест Іменей, и Александръ • Еже предахом сатане, да накажутся не хуліти •

Молю убо да прежде всехъ творите прошения, мольбы, молитвы, и благодарения • О всехъ человецехъ, о царехъ, и всехъ во владычствиехъ сущих, да тихо, и спокойно поживем • Во всяком благоверіи, и чистоте • Се бо ест добро, и приятно предъ Спасителемъ нашимъ Богом • Онже хощеть всемъ человеком спастися, и въ разумъ истинный пріити • Единъ убо ест Богъ, единъ и Ходатай Богу и человекомъ, человекъ Христосъ Ісусъ • Давый Себе избавление за всехъ • Егоже сведетелство утвержено ест времены своими • В немже поставленъ есмъ азъ проповедникъ и посланникъ • Правду глаголю о Христе, а не лжу • И вчител языком в вере и истинне •

Хощу пакъ да молитву деють мужи на всякомъ месте • Воздъвизающе чистые руце свое, безъ гнева, и размышления •

Такожъ и жены во одежи лепой, со стыдомъ, и чистотою украшающи себе • Не плетениемъ власъ, или златомъ • Не бисеромъ, или ризами многоценными • Но якоже подобаеть женамъ, показующе милосердие с делы добрыми • Жена во молчаніи да учится со всякимъ повиновениемъ • Жене бо учити не велю, ни владети мужем • Но быти во безмолъвіи • Адамъ убо перъвее созданъ бысть, потом Евва • И Адам не прельстися • Жена же прельщена сущи во преступление бысть • Но спасется за чадородие • Аще пребудеть в вере, в любви и во святыни со чистотою •

Верно слово: аще кто еппіскопства хощеть, доброго дела жадаеть • Подобаеть убо еппископу бес порока быти • Единой жене мужу • Трезвянику, целомудрену • Говейну, страннолюбцу, учителну • Не пияници, ни бійци, ни злесобирателю • Но кротку, и справедъливу • Не тяжебнику, не сребролюбцу • Своему дому добре промышляющу • Чада имеющу во покореніи, со всякою чистотою • Аще ли же кто своего дому строити не умееть, како о Церкви Божией пристоати можеть? Не нововеръца да не разгордевся въ судъ упадеть неприязненъ • Подобает же ему, и сведетелство добро имети от внешнихъ, да не в поношение впадет, и во сет діаволю •

Такоже и діакони да будут чисти, не двоязычни, не пияници, не злесобиратели • Имеюще тайну веры, в совести чесной • Сие пакъ да искушаються прежде, потомъ да служать непорочни суще •

И женамъ их прислушіть быти чеснымъ, не клеветливымъ, не ненавидцам, трезвянымъ, во всемъ вернымъ •

Діакони да бывають единой жене мужи • Чада добре справующе, и свою челядь •

Служащие бо добре, степень добръ собе приемлють • И много дерзновение в вере, иже ест во Христе Ісусе •

Сия тобе пишу, уповая пріити к тобе скоро • Аще ли же умедлю • Да веси како подобает в дому Божиемъ жити • Иже ест церкви Бога Живаго • Столпъ, и утверженіе истинне • И исповедаемая, велика ест благочестна тайна: Богъ явися во плоти • Оправдася во Дусе • Показася Ангеломъ • Проповедася языкомъ • Веровася въ мире, вознесеся во славе •

Духъ же явне глаголеть, яко во последъняя времена • Отступять неціи от веры • Послухающе духовъ льстивыхъ, и ученией бесовскихъ, в лицемеріи лжу глаголющихъ • Ониже созжены суть съ своею совестию • Возбраняюще женитіся • И воздержатися от брашенъ яже Богъ созда ко снедению со благодарениемъ, вернымъ и познавшимъ истинну •

Всяко убо создание Божие добро ест • И ничтоже отметно, со благодарениемъ ядомо • Светит бо ся словомъ Божіимъ, и молитвою • Сия скажеши ли братии • Добръ будешъ служитель Ісусъ Христовъ • Питаяся словесы веры • И добрымъ учениемъ, егоже наследовалъ есь •

Скверныхъ пакъ, и старечьскихъ басенъ отрицайся • Обучай же себе к милосердию • Телесное бо обучение в мале ест пожиточно • Но милосердие ко всему естъ потребно • Обетование имея жизни нинешней, и грядущей •

Верно слово, и всякому приатию достойно • Для сего бо тружаемся и поношение приемлем, яко уповаемъ на Бога жива • Онъже ест Спаситель всемъ человекомъ, а найболей вернымъ • Возвещай сия, и вчи • Никтоже юностию твоею да не гордить • Но буди образъ верным, словомъ, житиемъ, и любовию • Духомъ, верою, и чистотою •

Поколе пріиду, буді пиленъ чтения, утешения, и навчения • Не ленися о своемъ даре, иже дасться тобе пророчествомъ • Со возложениемъ руку презвитерства на тя • Сихъ повчайся, в сих пребывай, и о сих размышляй • Да предспеание твое явно будет всемъ • Смотри самого себе, и учения • И пребывай въ томъ • Сее творяй себе спасеши, и послухающих тя •

Старцу не сотвори пакости, но утешай, яко отца • Младых яко братию • Старыя жены яко матере • Младице яко сестры во всякой чистоте • Вдовице имей во почтивости, еже правые вдовице суть • Аще ли кая вдовица чада или внучата имать • Да учиться первее со благовениемъ домъ свой строити • И отмену возъдати прародителемъ • Се бо ест приатно предъ Богомъ •

Истинная же вдовица, и осиротелая • Да уповаеть на Бога, и пребываеть в молитвахъ и молениехъ день и нощь • Понеже вдова во сласьтехъ живуща, мертва естъ • Сия возвещай имъ да непорочны будуть • Пак ли же коя о своих не промышляеть, наболей о домашних • Веры отметается, и естъ неверъное горши •

Вдовица же во служение да причитается, не мней шестьдесят летъ • Бывши единого мужа жена • Во делехъ добрыхъ сведетелствована • Аще чада воспитала естъ • Аще вбогые в дом свой приимовала естъ • Аще святымъ нозе умывала естъ • Аще скоръбныхъ потешала естъ • И аще всякому делу добру последовала естъ •

Младыхъ вдовиць отрицайся • Егда бо расверепують • О Христе посягати хотяще • Имеюще грехъ свой, яко первое веры отвергошеся • И тако празны учатся обыходити домы • А не толико празны, но и блядивы, и зазорливы • Глаголюще еже не подобаеть • Сего для велю младымъ за мужа ити • Чада ражати • В дому справовати • Ни единоя вины противнымъ даяти, дабы о нихъ могли хулу глаголати • Уже бо неціи совратишеся воследъ сатаны • Естъ ли же кто верный, или коя верная, имають в себе вдовице, да въспомагають их • И не отяготится церкви, дабы истинно сущимъ вдовицамъ доставало •

Попы добре справующіи, двоякое чти достойни бывають • Найболей тружающиеся во словеси учения • Глаголеть бо Писание: вола на гумне млотяща не обротиши • Достоинъ бо делатель мьзды своея •

На попа хулы не приемли, кроме точию дву, или трехъ сведетель • Согрешающих пакъ предъ всеми обличай • Да и иніи страхъ имеють • Засведетелствую предъ Богом и Господемъ Ісусъ Христомъ, и изъбранными Анъгелы Его • Да сия сохраниши предняя изъбрания, кроме всякого разъсужения • Ничтоже чиняй по умолению •

Руки скоро ни на единого возлагай, а ни приобъщайся ко грехом чуждим, себе самого чиста соблюди • К тому не пій воды, но мало вина пріимай жалудка для своего, и частых твоих недугъ • Некоих человекъ греси явни суть, предведуще на судъ • А некоих по суде объявлены бывають • Также и добрая дела явна суть, а инако имущая, утаитися не могуть •

Елици суть поддани служению, имейте своя владыки во всякой почтивости • Да имя Божие, и навчение не будеть хулено • Верные же имеюще старейшины, да не гордите ими, яко братия суть • Но болей да послужите имо, занеж верни суть, и возлюблени • Да и добродеания восприемлють • Сихъ навчай, и напоминай • Аще кто инако учинить, и не наследуеть здравыхъ словесъ Господа нашего Ісуса Христа, еже суть ко благочестивому учению • Таковый естъ гордый и ничего не умееть • Но недугуеть во гаданиехъ, и словопрениехъ • От нихже бывает зависть, и ръвение, хула, зло домышление, празно сварение • На разуме разтлевъшие людие, и лишеные истинны • Мняще благочестие быти телесное изыскание • Отлучайся от таковыхъ • Естъ убо изыскание великое, благочестие со доволством умыслу • Ничто бо внесохом в миръ, яве ни изнести что можемъ • Имущи же пищу и одеяние, сими да доволимся • Хотящіи пакъ обогатитися, впадають в напасти, и в сети дияволи • И в похоти многы несъмыслены, и вредны • Еже погружають человеки во погыбель, и во истъление • Корень бо всего злого ест сребролюбие • Егоже нецие жадающе заблудиша от веры, и воплетоша себе в болезни многы • Ты же человече Божій от сихъ бегай • Подвизайся добрымъ подвигом для веры, имися за вечную жизнь, в нуже зван бысь, и исповедай доброе исповедание, предъ многыми сведетели •

Завещеваю тобе предъ Богомъ животворящимъ все створение, и предъ Ісусъ Христомъ сведетелствовашим при Понтейстемъ Пилате доброе исповедание • Да соблюдеш заповеди сия нескверно и незазорно, до явления Господа нашего Ісуса Христа, егоже во времена своя явить, благославеный единъ силъный • Царь царъствующимъ, и Господь господьствующимъ • Сам имея бесмертие, живяй во свете неприступнемъ • Егоже никто от человекъ не виде, ни видети можеть • Ему же ест честь, и слава, и держава вечная аминь •

Богатымъ во нынейшій векъ, завещавай не высоко помышляти • Ни уповати на богатество гыбнущее • Но на Бога жива, подающего намъ вся обилно ко наслажению • Да добро делають, и богатятся во добрыхъ делехъ • Милостыню ради дающе, приобъщаются нищимъ сокривающи собе основание доброе во грядущее время, да приимут вечную жизнь •

О Тімофею, предания сохрани, уклоняяся скверныхъ тъщеглаголаней • И преложенией лъжеименитаго разума • Егоже неціи поживающе, от веры погрешиша • Благодать с тобою аминь •