КО ЕФЕСИЕМЪ • ПОСЛАНИЯ СВЯТОГО ПАВЛА СКАЗАНИЕ • ДОКТОРОМЪ ФРАНЦИСКОМ СКОРИНОЮ, З БОЖИЕЮ ПОМОЩИЮ ПОЧИНАЕТСЯ •
Йефесъ градъ старейший былъ ест во Асіи Меншей, в немже прежде бе светый Апостолъ Павел три лета, проповедая в них слово Божие, и препирая Жиды на сонъмищехъ, и Еллины во училищехъ • И чуда великая чиняй, якоже пишеть светый Лука, во Деаниехъ Апостолкихъ • В семъ граде были сут мнози идолослужители, занеже в нем был естъ злославный всея Асіи храмъ Артемидіи богыни • К тому жили в немъ и чародейци, бо часу одного при Апостолехъ, уверивши во Христа • Сожгли суть чародейныхъ книгъ своих, имъже цена бе пятьдесятъ тысещей сребреникъ • Прото и святый Павелъ великую працу имелъ нежели навернулъ их на веру Христову • Яко самъ о томъ, во первомъ посланіи ко Коринфомъ пишет глаголя • Иже во Ефесе со зверми боряшеся • И для великое любви юже имеаше к нимъ, внегда шолъ мимо Ефесъ во Ерусалимъ, от Милита послал к нимъ • И призвав старейшины церковныя, велми ласкаве навчаше их • Яко и о томъ светчить Лука Евангелистъ во Деаниехъ Апостолскихъ • Там же и проповедаше имъ Духомъ Святым, иже повстануть в васъ мужи глаголющие развращение, абы се выстерегали от нихъ •
Потомуже и послание сие пишет к ним, седяй во оковахъ • Найпервей приводит имъ на памет превеликую, и неизреченную ласку Христову, о Немже вси мы имамы изъбавление, и Кровию Его грехомъ омытие • И верою в Него Святого Духа приатие • Затым поведаеть, иже въставичне о нихъ Бога молить • Да подасть имъ разумъ, мудрость, просвещение серца, откровение тайнъ познати, яже содея Бог во единородном Сыне Своемъ • Таж являеть, якови прежде они быша, внегда во гресехъ, духомъ лукавымъ служиша, въ гневе Божиемъ • И якови ныне вчинены суть благодатию Божиею, спасени бо суть • От веры Ісусъ Христовы, а не от своих делъ • И яко Господь нашъ Ісусъ Христосъ смирив Іудеи с ыными народы, Своимъ Благовестованиемъ • И приведе обоих во единъ Духъ ко Отцу • И того Благовестования • Еже обещано бысть всемъ людем, дана ест благодать Павлу, проповедати во языцехъ неиследимое богатество Христово • А о сих пишеть во предних трехъ главах •
Во заднихъ же трехъ главизнахъ, пишеть святый Апостолъ Павелъ, ко Ефесиемъ, яко имамы жити во добрых обычаехъ, во соединеніи веры, спомогающе другъ друга, со всякою любовию • Яко разныи уды, вси едину главу имуще Христа • Затымъ кажеть которых речей злыхъ имамы ся выстерегати, и коих добрых наследовати •
Тажъ учить, яко мужи с своими женами имають во любви жити • Приводечи на паметь тайну великую, како Христосъ возлюби Церковь Свою, то естъ собрание хрестианское • Потомъ наказуеть чада, абы слухали, и честовали родителей своих • Родители же да бы питали, и навчали чада своя • По тому жъ и слузи абы верни были господе своей • И господа не обидели слугъ своихъ •
На конци остерегаеть всехъ, иже имеваемъ брань со духы лукавыми, поведая брони духовныя, имиже з Божиею помощию, возможемъ победити козни их • Таж конает послание •
Конець сказанию •
