1 Въ коне́цъ, ї҆дїѳѹ́мѹ, пѣ́снь дв҃дѹ, 38.
2 Рѣ́хъ: сохраню̀ пѹти҄ моѧ҄, є҆́же не согрѣша́ти мѝ ѧ҆зы́комъ мои́мъ: положи́хъ ѹ҆стѡ́мъ мои҄мъ храни́ло, внегда̀ воста́ти грѣ́шномѹ предо мно́ю.
3 Ѡ҆нѣмѣ́хъ и҆ смири́хсѧ, и҆ ѹ҆молча́хъ ѿ бла҄гъ, и҆ болѣ́знь моѧ̀ ѡ҆бнови́сѧ.
4 Согрѣ́ѧсѧ се́рдце моѐ во мнѣ̀, и҆ въ поѹче́нїи мое́мъ разгори́тсѧ ѻ҆́гнь: глаго́лахъ ѧ҆зы́комъ мои́мъ:
5 скажи́ ми, гд҇и, кончи́нѹ мою̀ и҆ число̀ дні́й мои́хъ, ко́е є҆́сть, да разѹмѣ́ю, что̀ лиша́юсѧ а҆́зъ.
6 Сѐ, пѧ҄ди положи́лъ є҆сѝ дни҄ моѧ҄, и҆ соста́въ мо́й ѩ҆́кѡ ничто́же пред̾ тобо́ю: ѻ҆ба́че всѧ́чєскаѧ сѹета̀ всѧ́къ человѣ́къ живы́й.
7 Ѹ҆̀бо ѡ҆́бразомъ хо́дитъ человѣ́къ, ѻ҆ба́че всѹ́е мѧте́тсѧ: сокро́вищствѹетъ, и҆ не вѣ́сть, комѹ̀ собере́тъ ѧ҆̀.
8 И҆ нн҃ѣ кто̀ терпѣ́нїе моѐ; не гд҇ь ли; и҆ соста́въ мо́й ѿ тебє̀ є҆́сть.
9 Ѿ всѣ́хъ беззако́нїй мои́хъ и҆зба́ви мѧ̀: поноше́нїе безѹ́мномѹ да́лъ мѧ̀ є҆сѝ.
10 Ѡ҆нѣмѣ́хъ и҆ не ѿверзо́хъ ѹ҆́стъ мои́хъ, ѩ҆́кѡ ты̀ сотвори́лъ є҆сѝ.
11 Ѿста́ви ѿ менє̀ ра҄ны твоѧ҄: ѿ крѣ́пости бо рѹкѝ твоеѧ̀ а҆́зъ и҆зчезо́хъ.
12 Во ѡ҆бличе́нїихъ ѡ҆ беззако́нїи наказа́лъ є҆сѝ человѣ́ка, и҆ и҆ста́ѧлъ є҆сѝ ѩ҆́кѡ паѹчи́нѹ дѹ́шѹ є҆гѡ̀: ѻ҆ба́че всѹ́е всѧ́къ человѣ́къ.
13 Ѹ҆слы́ши моли́твѹ мою̀, гд҇и, и҆ моле́нїе моѐ внѹшѝ, сле́зъ мои́хъ не премолчѝ: ѩ҆́кѡ пресе́лникъ а҆́зъ є҆́смь ѹ҆ тебє̀ и҆ пришле́цъ, ѩ҆́коже всѝ ѻ҆тцы̀ моѝ.
14 Ѡ҆сла́би мѝ, да почі́ю, пре́жде да́же не ѿидѹ̀, и҆ ктомѹ̀ не бѹ́дѹ.
Нашли в тексте ошибку? Выделите её и нажмите:
Ctrl + Enter
Псалтирь, псалом 38. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784