1 Въ коне́цъ, сынѡ́мъ коре́ѡвымъ, ѱало́мъ,
2 Бл҃говоли́лъ є҆сѝ, гд҇и, зе́млю твою̀, возврати́лъ є҆сѝ плѣ́нъ ї҆а́кѡвль.
3 Ѡ҆ста́вилъ є҆сѝ беззакѡ́нїѧ люді́й твои́хъ, покры́лъ є҆сѝ всѧ҄ грѣхѝ и҆́хъ.
4 Ѹ҆кроти́лъ є҆сѝ ве́сь гнѣ́въ тво́й, возврати́лсѧ є҆сѝ ѿ гнѣ́ва ѩ҆́рости твоеѧ̀.
5 Возвратѝ на́съ, бж҃е сп҇нїй на́шихъ, и҆ ѿвратѝ ѩ҆́рость твою̀ ѿ на́съ.
6 Є҆да̀ во вѣ́ки прогнѣ́ваешисѧ на ны̀; и҆лѝ простре́ши гнѣ́въ тво́й ѿ ро́да въ ро́дъ;
7 Бж҃е, ты̀ ѡ҆бра́щьсѧ ѡ҆живи́ши ны̀, и҆ лю́дїе твоѝ возвеселѧ́тсѧ ѡ҆ тебѣ̀.
8 ѩ҆вѝ на́мъ, гд҇и, мл҇ть твою̀, и҆ сп҇нїе твоѐ да́ждь на́мъ.
9 Ѹ҆слы́шѹ, что̀ рече́тъ ѡ҆ мнѣ̀ гд҇ь бг҃ъ: ѩ҆́кѡ рече́тъ ми́ръ на лю́ди своѧ҄, и҆ на прпдбныѧ своѧ҄, и҆ на ѡ҆браща́ющыѧ сердца̀ къ немѹ̀.
10 Ѻ҆ба́че бли́з̾ боѧ́щихсѧ є҆гѡ̀ сп҇нїе є҆гѡ̀, всели́ти сла́вѹ въ зе́млю на́шѹ.
11 Мл҇ть и҆ и҆́стина срѣто́стѣсѧ, пра́вда и҆ ми́ръ ѡ҆блобыза́стасѧ:
12 и҆́стина ѿ землѝ возсїѧ̀, и҆ пра́вда съ нб҃сѐ прини́че:
13 и҆́бо гд҇ь да́стъ бл҃гость, и҆ землѧ̀ на́ша да́стъ пло́дъ сво́й.
14 Пра́вда пред̾ ни́мъ пред̾и́детъ, и҆ положи́тъ въ пѹ́ть стѡпы̀ своѧ҄.
Нашли в тексте ошибку? Выделите её и нажмите:
Ctrl + Enter
Псалтирь, псалом 84. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784