1 Ѱало́мъ пѣ́сни, въ де́нь сѹббѡ́тный,
2 Бл҃го є҆́сть и҆сповѣ́датисѧ гд҇еви и҆ пѣ́ти и҆́мени твоемѹ̀, вы́шнїй:
3 возвѣща́ти заѹ́тра мл҇ть твою̀ и҆ и҆́стинѹ твою̀ на всѧ́кѹ но́щь,
4 въ десѧтострѹ́ннѣмъ ѱалти́ри съ пѣ́снїю въ гѹ́слехъ.
5 ѩ҆́кѡ возвесели́лъ мѧ̀ є҆сѝ, гд҇и, въ творе́нїи твое́мъ, и҆ въ дѣ́лѣхъ рѹкѹ̀ твоє́ю возра́дѹюсѧ.
6 ѩ҆́кѡ возвели́чишасѧ дѣла̀ твоѧ҄, гд҇и: ѕѣлѡ̀ ѹ҆глѹби́шасѧ помышлє́нїѧ твоѧ҄.
7 Мѹ́жъ безѹ́менъ не позна́етъ, и҆ неразѹми́въ не разѹмѣ́етъ си́хъ.
8 Внегда̀ прозѧбо́ща грѣ҄шницы ѩ҆́кѡ трава̀, и҆ пронико́ша всѝ дѣ́лающїи беззако́нїе, ѩ҆́кѡ да потребѧ́тсѧ въ вѣ́къ вѣ́ка:
9 ты́ же вы́шнїй во вѣ́къ, гд҇и.
10 ѩ҆́кѡ сѐ, вразѝ твоѝ, гд҇и, ѩ҆́кѡ сѐ, вразѝ твоѝ поги́бнѹтъ, и҆ разы́дѹтсѧ всѝ дѣ́лающїи беззако́нїе.
11 И҆ вознесе́тсѧ ѩ҆́кѡ є҆диноро́га ро́гъ мо́й, и҆ ста́рость моѧ̀ въ є҆ле́и масти́тѣ:
12 и҆ воззрѣ̀ ѻ҆́ко моѐ на врагѝ моѧ҄, и҆ востаю́щыѧ на мѧ̀ лѹка́внѹющыѧ ѹ҆слы́шитъ ѹ҆́хо моѐ.
13 Првдникъ ѩ҆́кѡ фі́нїѯъ процвѣте́тъ: ѩ҆́кѡ ке́дръ, и҆́же въ лїва́нѣ, ѹ҆мно́житсѧ.
14 Насажде́ни въ домѹ̀ гд҇ни во дво́рѣхъ бг҃а на́шегѡ процвѣтѹ́тъ:
15 є҆щѐ ѹ҆мно́жатсѧ въ ста́рости масти́тѣ, и҆ благопрїе́млюще бѹ́дѹтъ.
16 Да возвѣстѧ́тъ, ѩ҆́кѡ пра́въ гд҇ь бг҃ъ на́шъ, и҆ нѣ́сть непра́вды въ не́мъ.
Нашли в тексте ошибку? Выделите её и нажмите:
Ctrl + Enter
Псалтирь, псалом 91. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784